ZKIZ Archives


中環在線:上京學國情金融圈搞同學會 李華華


2011-6-17  AD




 

北上到國家行政學院參加國情研習班,可以話係近呢兩三年香港政商名人同班富豪第二、三代嘅指定課餘活動,唔知係咪見得多有感情,呢班同學仔今年初組成「中國國家行政學院香港工商專業同學會」,打算定期搞吓活動,聯誼之餘,旨在大家互相過料,方便日後同監管機構傾偈。

逾百會員包括保險物流界

咪 以為呢個同學會係搞嚟hea,查實有逾百個會員,主要嚟自金融、保險同物流界,理事會廿個理事更加係響噹噹嘅人物,包括李嘉誠基金會董事洪小蓮、九倉 (004)董事易志明、恒生(011)總經理馮孝忠、財資界人士陳鳳翔;而個會嘅主席係證券業協會前會長李耀新,副主席包括保險業聯會主席朱永耀、證券學 會會長李細燕……照人腳睇,應該比船頭尺中國同學會猛料好多!

咁國情研習班到底係教咩嘅呢?08年參加首屆國情研習班嘅李細燕話,上堂可以了解到中國開放改革30年嘅經過,獲益良多。而呢個同學會之所以誕生,係咁多年嘅同學仔舊年破天荒搞咗一次珠海旅行,講講吓咁搞出嚟嘅。

華華聽班富二代講,國情研習班通常係一個星期貨仔,基本上大家都坐足鐘畀面阿爺嘅,咁邊個上堂表現至認真呢?新加坡過江龍、信和太子爺黃永光幾乎一面倒得晒所有票,香港班有錢仔係咪應該好好檢討一下呢?

李華華

LiWaWa@AppleDaily.com


中環 在線 上京 國情 金融 圈搞 同學會 同學 華華
PermaLink: https://articles.zkiz.com/?id=25748


ZKIZ Archives @ 2019