ZKIZ Archives


52歲黎耀祥壁咚激咀57歲毛舜筠一早預言睇到嘔

1 : GS(14)@2016-11-16 05:47:54

每晚放工返到屋企,換件衫開電視諗住抖下,如果你睇到呢一幕……真係當堂嚇一跳,然後得啖笑。52歲黎耀祥同57歲毛舜筠喺《愛.回家之八時入席》入面上演一幕壁咚加激咀,兩個加埋成109歲呀!劇中黎耀祥角色名係古曉臣,花名叫邦主,係一個電視台監製;毛舜筠個角色就叫林小小,花名叫細姐,本身係黎耀祥嘅秘書,之後機緣巧合之下變咗飲食節目主持。劇中邦主同細姐呢對歡喜冤家經常都鬥嘴,相信好多觀眾都有印象。有網民喺討論區開post,話好日都唔開電視,諗住開住電視食飯,點知一開就見到呢個世紀畫面。嗰位網民仲話本身大台劇嘅劇情老土都唔係第一日嘅事,不過睇完兩位「前輩級」演員激咀,本身想添飯都冇晒意欲。有另一位網民話好耐冇睇呢套嘢,咁啱請病假一出廳食藥就睇到呢個世紀之吻,嚇到個心都離一離。網民一致俾負皮,喺facebook上面都有網民話「啱啱等緊食飯,睇到呢幕..飯都食唔落,好日唔睇電視,一睇就.....有冇諗過觀眾嘅感受?!唔怪得冇人睇」、「大佬唔好咁痴線啦過百歲,我心臟唔係咁好㗎咋。」不過都有網民借呢套劇抽水話「其實我幾鐘意睇八時入席,好過睇四十歲扮貓」講緊嘅係《來自喵喵星的妳》。其實早喺今年4月,毛舜筠同黎耀祥出活動時都被問過會唔會有咀戲,當時毛毛笑言擔心觀眾睇到會嘔,估唔到預言終於成真喇……




來源: http://hk.apple.nextmedia.com/entertainment/art/20161116/19834985
52 歲黎 黎耀 耀祥 祥壁 壁咚 咚激 激咀 57 歲毛 毛舜 舜筠 一早 預言 睇到 到嘔
PermaLink: https://articles.zkiz.com/?id=315818


ZKIZ Archives @ 2019