ZKIZ Archives


收數蠱惑仔變藝術家繪出貼地藝術

1 : GS(14)@2015-10-19 07:26:31

你可能不認識他,但他的作品,你總會見過。荃灣縱橫交錯的行人天橋、油麻地眾坊街七彩繽紛的奇花樓梯,尖沙咀柏麗大道的交響樂團,甚至公立醫院的病房,都有他的畫。但其實,他行過古惑,又是第一代改圖王,在沒有軟件Photoshop的年代,顧家煇的唱片封套、《秋天的童話》的合成電影海報,都出自他的手。「藝術,唔係高高在上」。半生傳奇,黃昏之年回流香港定居,遊走18區街頭巷尾,推動他眼中師奶阿叔都看得明白的社群藝術,他是林旭輝。記者:呂麗嬋攝影:朱永倫家住柏麗灣,約訪林旭輝到眾坊街拍照,他下午又得趕到觀塘及黃大仙,為他的樓梯畫度呎,「香港好細,但每區都有佢嘅特色,荃灣呢條天橋對正食街,多年輕人聚集,又多彎位,滑雪最啱;眾坊街條樓梯屈咗入內街,畫花海顏色鮮艷,可吸引人入嚟探秘」。在加拿大生活多年,05年獲邀回流,出任馬灣《挪亞方舟》藝術顧問,索性留下來,成立非牟利藝團Omni Art,專門創作梯畫及地畫,為保守又低迷的城市,帶來驚喜。「唔係拍賣行賣到幾千萬嗰幅畫,或者威尼斯雙年獎嗰啲,先叫藝術,一般市民覺得唔關我事,就算起咗西九(文化區),個硬件幾靚都好,冇人去一樣冇用」。在輝哥眼中,藝術,並不單在博物館和畫廊才可欣賞,「就算係大師畫嘅畫,複製print出嚟,貼喺天橋俾公眾踩,若可吸引到人,產生好奇甚至主動入藝術館睇,呢樣嘢就係佢嘅價值」。實事求事,「在地」的性格,有跡可尋。中二輟學,由古惑仔到創作人,林旭輝的藝術之路,曲折離奇,「父母離異,十幾歲就喺油麻地舞廳放貴利」。前呼後擁,表面風光,就像大部份誤入歧途的故事,眼見同門兄弟死於非命,想退又沒勇氣,「有次收數,見到個男人喺度喊,我問自己,呢個如果係我老豆,我會點?」決心從良,避走台灣,見朋友畫畫,跟着學打發時間。25歲,成了人生分水嶺。「我成日同身邊年輕人講,我起步咁遲都得,點解你唔得?」最初買書自學,後來參加校外課程,跟隨留學法國的畫家黃祥習畫。「話就話讀到中二,其實得小六程度,畫室好多勁人,唔係聽爵士樂,就係讀哲學」。走出砵蘭街,天大地大,拿起畫筆日練14小時,追回時間。「進步得好快,27歲就開畫室教畫,但其實學咗兩年!」他大笑。從良收入大減,不夠養妻活兒,但乜都夠膽死的性格,再次令他遇上轉機。「今時今日,執走個眼袋好易,大把電腦軟件可以應用,但喺80年代,仲係用緊菲林嘅年代,要執一張合成照片,要寄去日本同歐洲做後期」。眼見市場無人做,買書問人,又在外國訂下工具閉門自學,憑頭啖湯,竟打出血路,「喺香港做,成本低,8、90年代,香港廣告、電影業蓬勃,生意多到做唔切」。商業廣告、電影海報,還有婚紗攝影,《秋天的童話》三個主角並列的合成照,執走鍾楚紅玉背幾粒礙眼的暗瘡,無不出自他的手。95年,事業如日方中,他卻選擇移民溫哥華,「嗰時叫做揾到錢,又結咗婚,想過番啲家庭生活」。但人的際遇就是難以預料,當年樓價有升無跌,在「賺少當輸」的年代,賣走多幢物業,人人說他走寶,誤打誤撞,卻避過98金融風暴巨浪,「如果唔走,一定死,嗰時公司發展好快,改圖由手作全面電腦化,好多大型器材好貴,要生存,就一定要投資」。由古惑仔到改圖王、由全職創作人到藝術顧問,周遊列國考察主題公園設計。由大而小,今日,輝哥全力推動社群藝術,為低沉的香港打打氣,「香港最大問題係講得太多,但落到地嘅太少,畫第一條梯畫,未做好多人撥冷水,話政府邊會批吖,排除萬難,有成功模式,再走落去,就係條新路」。由賣大包擔任義務顧問,到組織學生參與,備受好評,各區區議會,甚至民政局紛紛主動向他招手,邀請合作,「條條大路通羅馬,在乎你係咪願意行出第一步」。62歲的輝哥如是說。剝花生、撥冷水,香港怨氣冲天,林旭輝的街畫,卻帶來小陽春,網民互相轉貼,成為朝聖地。採訪期間,就有不少遊客到訪,有旅遊網形容是「城市秘景」,林旭輝直言喜出望外,「大家都好愛呢個城市,只係愛嘅方法唔同」。最感動是有市民送水送毛巾打氣,而即將落實「動筆」的地區則包括黃大仙、大埔、觀塘及灣仔。樓梯作畫,結合地形畫及壁畫的優點,既能立體展示,亦能跟公眾互動。輝哥說畫梯畫要對準角度及比例,經驗很重要,「樓梯一級級,要因應距離調節,一定要一邊畫一邊用手提電話拍照,上下比較」。由最初孤軍作戰,到建立到得力團隊,現時已有4個年輕藝術家協助,「最希望係學校同社區一齊參與,咁樣先係社群藝術嘅真義」。輝哥說,繪畫一幅大型梯畫,不計天雨等環境因素,約只需十多天;但由籌備至完成,則需至少三個多月,「要經過路政署、食環署及警務署等部門審批,就如一開始喺荃灣畫梯畫,就被街坊誤會係塗鴉,甚至要報警處理;但喺油麻地畫畫時,因為附近有街坊會,事前溝通得好,有居民送水送毛巾打氣,覺得再辛苦都值得」。





來源: http://hk.apple.nextmedia.com/news/art/20151018/19338140
收數 蠱惑 仔變 藝術家 藝術 繪出 出貼 貼地
PermaLink: https://articles.zkiz.com/?id=293341


ZKIZ Archives @ 2019