摸魚手札：DQ上市公司比向下炒傷害更大
1 :
GS(14)@2017-10-30 00:55:26上市公司DQ潮一浪接一浪，主板和創業板公司都無一倖免，金利通（8256）便是最近的例子。細看被DQ的通告，都發現DQ理由是一式一樣，就是業務、資產不足夠營運，然後聯交所按照相關的規例，進入除牌的第一階段。如果復牌建議不合聯交所心水，那公司就要除牌了，投資者所有利益都完蛋了。參考所有被DQ公司的股價走勢，凡一收到聯交所除牌通知，公司股價單日即大跌，部份更跌近七成以上，好似被擲核彈一樣，股價一下就炸落十八層地獄。聯交所以正義之名，去除質素差一點的上市公司，又有保障投資者等說法，動機雖然看似合理，但當投資者見到股價大跌七成，可能佢哋會想，到底聯交所保障了甚麼利益？要不是聯交所強制除牌，投資者至少不會單日輸大錢呢。不小心買中向下炒的股份，最多分幾年輸七成，但聯交所一個通告壓下來，單日就即輸七成，超額完成向下炒的傷害力。若論傷亡程度，聯交所的做法比向下炒更快損害投資者利益。聯交所雖獨掌大權，但香港金融市場是公開、公平的，有其核心價值所在。就算要DQ股票，起碼要有一個說法吧？至少告訴投資者一個客觀標準，例如業務要萎縮到甚麼程度，才要被人除牌。問題在於，所有被DQ的股份都沒有一個客觀理由。這個客觀標準不一定是以營業額總量去量度，也可以是一個比率。好像上市規則第14章的「須予公佈的交易」，要公佈的交易規模都有一個客觀標準，例如「特定」比率只要超過「若干」百分比，就被定義成「某類」交易，要按相關規則去向公眾公佈。上市規則第14章是以維護投資者利益為依歸，既然「須予公佈的交易」都有客觀標準，為甚麼上市規則第13.24條的「不足夠業務營運」卻沒有客觀標準呢？聯交所的做法，跟鄺其志當年的「仙股風暴」有異曲同工之妙。一份要仙股除牌的諮詢文件都可以造成天翻地覆，民間遊行、政客出動，社會怨聲載道。今次聯交所DQ上市公司，只是把當年的仙股風暴斬件處理而已。聯交所動機雖好，但好心做了壞事。奧地利學派著名經濟學家和政治哲學家F.A Hayek曾說過：「通往地獄之路是由善意所鋪成。」聯交所想港股變成清泉，背後卻扼殺了投資者得益。今次投資者輸錢輸到落地獄之路，是由善意出手的監管機構－－港交所造成的。渾水專業投資者、上市公司執行董事、90後
http://fb.com/muddydirtywater
來源:
https://hk.finance.appledaily.co ... e/20171029/20198060
摸魚手札：80萬公屋封頂係一個笑話
1 :
GS(14)@2017-11-05 15:54:17林鄭失言，不小心提出80萬公屋封頂論，距離現時76萬出租公屋只差4萬。追究80萬這個數點計出嚟，公屋是否封頂是無意義，因為這明顯是一次口若懸河，口快快唔小心講錯。不過時間係唔等人，言論一出，媒體和政客，包括建制陣營，都好像鯊魚見血，一窩蜂衝出去狂攻，林鄭慘變箭豬。最無奈的可能係陳帆局長，要面對泛民建制兩陣營圍插，明明係運房局的他，霎時政制事務局人肉錄音機上身，答一些似有還無、模稜兩可的答案。雖然佢係官場金句王，但他的答案充份表現出一個打工仔的無奈，因為老闆信口雌黃，結果佢要幫老闆孭鑊，而事實上佢都唔明點解老闆無啦啦要講呢啲。睇嚟今次靈魂要遊走的，是他。
親手粉碎置業階梯
80萬公屋封頂既政治不正確，民生亦不正確。公屋需求殷切，只加多4萬就封頂，一定唔足夠，意識形態近乎社會福利主義的政客，亦一定圍住你嚟追打。何況這項政策看似未經討論、諮詢，數字也不知從何而來，亦不符合一般行政方式。所以，林鄭根本無得唔道歉，這個公關災難實太離奇。更何況，這跟林鄭競選方針提過的房屋政策和最新的施政報告，是100%不符合。林鄭的房屋政策，常提到一個概念，叫「重建置業階梯」。何謂置業階梯？就是先增加出租公屋供應，滿足一般基層的居住需求，然後就是綠置居計劃，引公屋租戶或公屋富戶買樓，走上置業之路。同一時間，也增加居屋供應，又有「白居二」之類的政策，讓人走上置業路。換言之，這是層遞式的上進，一步一步由居住需求改成置業需求的概念演進。如果林鄭容許公屋80萬封頂，就是親手粉碎置業階梯，亦即是自打嘴巴，推倒自己過往強推的房屋政策核心理念。好簡單，行樓梯都係一級一級上，如果公屋封了頂，即係第一級樓梯無左，咁點上第二、第三級？我跳上去，定飛上去呀？置業階梯係一個幾資本色彩濃烈的概念，因為這個概念的本質是把樓看成資本，先滿足相對「剛性」（我很討厭這個非正規經濟學用字，但太多人用，故妄用之）的住屋需求，然後再過渡到置業需求。住屋需求，是社會、民生問題，但置業不是，置業是買樓上車，除了自用之外，本質上涉及保本甚至投資、投機的概念，因為樓價升值也意味自己財富上升，這是一個理財級別的問題。政客講房屋問題，多是只注重前者，或者前者、後者混為一談。不過一般人心態不難推測，滿足了住屋需求後，自然會想細屋換大屋，大屋換大大屋；公屋租戶也會想轉質素高一點的居屋，再換私樓、豪宅等。要講置業階梯，就不能忘記呢一個概念嘅本質。正常人會想得通呢個概念，但政治人不敢宣之於口，因為鼓勵投機、投資，從來都不是容易推銷的。或者咁講，由公屋80萬封頂論到置業階梯嘅討論，從頭到尾都係一個笑話。渾水專業投資者、上市公司執行董事、90後
http://fb.com/muddydirtywater
來源:
https://hk.finance.appledaily.co ... e/20171105/20205018
操盤手札記：超人系呢隻最有景
1 :
GS(14)@2017-11-05 17:06:38新股大抽獎，資金被抽乾。閱文（772）頂頭槌飛一張要成4.2億元，竟然都有51張飛！閱文股票錢未解凍，現時市場資金相對唔多，抽雷蛇（1337）或比抽閱文值博。銀根抽緊，拆息抽高，股樓受壓。現時超過九成樓按使用H按，一般以一個月拆息作基準，現約H＋1.38厘，並以P按作鎖息上限，現計2.15厘。一個月拆息由9月平均0.43厘升至如今0.815厘，已高過封頂位。美國處於加息周期，香港遲早要跟，P會上升，當按息升至3厘，供平過租嘅優勢消失，樓市就會逆轉。差餉物業估價署最新數據顯示，樓價連續11個月破頂。天水圍嘉湖山莊本周亦連續三日破頂，兩房呎價高見10,603元。按統計處數據，個人每月收入中位數為15,300元；換言之，半數打工仔就算唔飲唔食，一個月都買唔起1.5呎邊陲樓！特首林鄭月娥嘅房屋政策以置業為主導，但佢從未喺香港置過業！如果一個股票分析員從未買過股票，你聽佢支笛？加息周期當前，息即是凶呀！買樓不如買地產股，雖然地產股都息口敏感，但無咁犯本兼回報更高。今年以嚟，樓價指數CCL累升17.6%；恒生地產分類指數就升31.5%，跑贏CCL成條街，兼跑贏大市。四大地產股中，長實（1113）今年累升40.7%，恒地（012）升44.1%，新地（016）升33.1%，新世界（017）升45.7%，計埋股息仲和味。我近期就比較留意長實。長和系前年大重組，和黃地產業務歸入長實，地產以外業務就歸長和（001），但年尾長建（1038）同電能（006）合併失敗後，長實開始減少地產業務，轉戰基建，公司剛以402億元出售中環中心75%權益，成為淨現金公司。現時系內長實、長建、電能、港燈（2638）都做基建。除咗港燈專注香港電力，其餘三間業務重叠。長實逐漸變身基建股，估值有提升空間；而且系內重組基建業務機會唔低，長實現金最多，最值得諗。割柑人本欄逢周四刊出
來源:
https://hk.finance.appledaily.co ... e/20171102/20202157
摸魚手札：強積金買樓的技術考慮
1 :
GS(14)@2017-11-13 03:40:32長遠來講，不論僱員和僱主總是希望強積金制度可以取消，因為錢在自己手，總好過被基金經理蠶食。不過大家都知道這個願望難如登天，積金計劃只能被改善，很難長遠被取消。積金局最近研究過把強積金供款用來買樓，就是參考了新加坡模式去改進。
港供款比例遠遜新加坡
港人嚮往新加坡的精英管治，大眾相信：凡是新加坡做的，必有其可取之處。如果要推銷這次的積金改革，難免要推銷新加坡的美好願景。強積金供款可以跟積金局之前推出的「預設基金」並行推銷，當中會有協同效應，理論上，只要預設基金加大儲蓄成份，多一些穩陣的投資，就可以達到儲錢的目的，有利呢個方案。可是，是不是新加坡一套，就可以完整地搬了過來香港落實？新加坡的積金始於1955年，相較香港2000年才落實的強積金計劃，已行之有效多年。新加坡的積金戶口有不同的用途，主要分成置業、退休及醫療；相較香港的強積金制度，卻一直只有退休用途，感覺上靈活和彈性都比香港高一點。重點來了，為甚麼新加坡的積金置業可以做得咁有效？關鍵就在乎供款比例。香港的積金制度是僱員、僱主各供薪金5%，而且有上限。新加坡呢？卻是僱員收入的5%至20%；僱主繳納僱員收入的5.5%至15%。具體供款比率由政府因應僱員的年齡而確定。以當地一個35歲或以下的打工仔計算，每月17%薪金自動上繳公積金戶口，另外僱主供款20%。這37%的供款於置業、退休及醫療的分佈分別為23%、6%及8%。新加坡的積金供款比例和分配，是以精算方法，根據統計數字做演變，香港不行這一套。很簡單，僱主和僱員加埋才得10%，這麼少，還要搞分配？這不是費神失時嗎？積金供款買樓的前設，在於要有高的供款比例。當時此風一吹，打工仔的反應是：「香港首期咁貴，強積金供款又咁少，可以幫到幾多先？」所以，積金供款對於想上車的打工仔來講係雞肋，食之無味，棄之可惜。不過，如果積金局跟大家講，要提高供款比例，只怕暴動都似。一般打工仔對基金的表現都深惡痛絕，現在還要加大注碼去養肥班基金佬，民怨一定大爆發。這就是積金買樓改革的技術困難，唔增加供款比例又做唔到效果，增加供款比例大家又唔想。所以，積金局這個方案，用意雖好，但終歸搔不到癢處。渾水專業投資者、上市公司執行董事、90後
http://fb.com/muddydirtywater
來源:
https://hk.finance.appledaily.co ... e/20171112/20212054
操盤手札記：藍籌股折翼天使
1 :
GS(14)@2017-11-13 03:59:50呢期最紅非騰訊（700）莫屬！踏入11月以嚟，6個交易日，日日見破頂！膝下嘅親生仔、半邊仔又陸續出身，繼眾安（6060）9月尾掛牌後，本周輪到閱文（772）、搜狗（紐交所：SOGO），下周就到易鑫（2858），嚟緊仲有騰訊音樂2018年上市，有利騰訊估值進一步提升。閱文首日掛牌就升一個開，應晒騰訊同日推出嘅首款「吃雞」手遊《光榮使命》嗰句「Winner winner， chicken dinner」！感恩節就快到，聖誕節不遠矣，傳統智慧有云：「聖誕鐘，買匯豐」、「蒸糕包，買港交」，但睇今年個勢，「Mulled wine醇，買騰訊」似乎更對路！騰訊將於下周三公佈第三季業績，之前兩次公佈季績前一個月內，高低位累積升幅12.5%至17.9%，今次以月內低位345.4元計，量度升幅可見407.2元。唔少大行已上調目標價至400元以上，大摩睇420元，最牛情況更睇526元。騰訊呢兩日喺成都舉行全球合作夥伴大會，有乜新業務風聲，隨時成為再炒高藉口。大市氣氛熾熱，今年以嚟，恒指已升超過三成，除咗新股旺場外，多隻藍籌亦連番破頂。眼前冇嘢平靚正，但50隻藍籌中，仍有折翼天使（fallen angel），例如國泰（293）、聯想（992）。建滔化工（148）日前突然賣晒手上9.61%國泰股權，由中東卡塔爾航空買起，成為國泰第三大股東。單deal每股作價13.65元，建滔估計賺8億元，但卡航一接手即損手，以現價12.6元計，3日蝕近4億元。國泰股價唔爭氣，多少同呢幾日中東沙特變局有關，唔少人見勢色唔對掟貨，但低位亦有唔少人撈貨。大行如高盛、富瑞，近期亦唱好國泰，認為最壞時刻已過；不過，若然撈底，宜睇長線。國泰嘅陀衰家燃油對沖合約，將於2019上半年到期；卡航取代建滔成為股東，則具協同效應，雙方料將加強合作，國泰近年嘅熊巿有望結束。割柑人本欄逢周四刊出
來源:
https://hk.finance.appledaily.co ... e/20171109/20209167
摸魚手札：沒有騰訊，哪有改變
1 :
GS(14)@2017-12-05 00:54:08個人的第三季投資組合應該跑輸大市平均值，因為大價股一路走上，指數也有近四、五成升幅，由於我整個持倉都是一些惶恐被監管打壓、業務垃圾到不堪的細價股，既不跟升，甚至微跌。升市我固然無份享受，跌市也無份承受，算是這個浪潮中的花生友。財經討論區一片哀嚎，大家都為高位上了賊船而悲鳴。好像騰訊（700）這類股票實在是升得太急，不少基金都有持貨。一般基金都有自己的mandate和限制，例如個別股份的loading不能超過若干百份比。科技股和騰訊等是今年升市寵兒，如果年頭買落呢類股票去坐，今年這類股票持倉的loading會大增，尤其是好像瑞聲、舜宇、騰訊，甚至保險金融股的平保、匯豐等都有幾成至數倍的升幅。有時不是基金經理、分析員不看好這類股份，只是因為loading升幅太大，已超過若干比例，違反了基金組合管理的mandate，所以一有乜嘢風吹草動，一定是先找這類股份減磅。窩輪市場今年大豐收，因為大價股有勢，想刀仔鋸大樹的人太多，衍生工具市場今年條數是超了目標。好像騰訊、平保等斜角上升的股票，身邊不少朋友會以買遠價牛仔方式當正價去坐，但市況急回時，就算多遠價的牛仔，防守力總有限。買正股會傷，但坐得起，買牛仔真係有點難翻身。所以星期一、四那幾個股票「全燈師」（包括我），真係要好好檢討策略。不過檢討策略之前，還是要先打堂齋，幫已經死去的牛仔破地獄、默個哀。監管機構的出手日漸頻繁，而且空前絕後地出招。之前David Webb的文章已暗示他跟監管機構有來往，當時他用的字眼是「filed documents with」，呢個phrase有點曖昧，我英文不算好，各位讀者可以自行解讀。現在呢，連證監的代表也公開承認他們跟David Webb有緊密互動，這是不是代表David Webb跟監管機構的合作已經升了級呢？那就真的不知道了。很多人怕殼股會被進一步打擊，難炒了無疑是真的，不過大家細心留意的話，會發現近年多數出事的細價股都是香港幫主力的，內地幫的則很少出事，新加坡、馬來西亞等則更少會有大麻煩。技術上，炒內地幫的細價股，出事機會率是低一點，所以不是無得炒，只是炒法要改一改，我們要放棄香港的優勢，改投同胞的懷抱，連做投資者炒家，都要「愛國」一點。政治上這可以有很多陰謀論，到底係咪偏幫中國，還是別的，可以有排去亂估。只是，香港證監、港交所素來對內地環境不熟，就算有事故，都有跨境執法困難。何況企業管治越來越怪，光是「黨委」這個凌駕董事局，又不用申報的組織架構，已令證監的鬼佬成頭「黑人問號」了。渾水專業投資者、上市公司執行董事、90後
http://fb.com/muddydirtywater
來源:
https://hk.finance.appledaily.co ... e/20171203/20233296
操盤手札記：低端老散被玩殘
1 :
GS(14)@2017-12-05 01:01:40北京驅逐低端人口，引起極大反響。原來無論資本主義定共產主義都係向錢看，無錢就無定企！股市何嘗唔係，基本因素用嚟睇長線，短線就由錢多貨多者話事！上周港股三萬關一日遊，擺明好友想食尾糊。不過，所謂好友、淡友，其實不斷轉變，錢多貨多嘅炒家大戶，隨時好淡易位；散戶見好買升、見淡買跌，就會左一巴、右一巴。呢兩日市況，低端老散好易被玩殘。隔晚美股三大指數破頂，但北韓再射導彈，加上A股又玩過山車，港股喺期指結算日拋上拋落。恒指收29623，跌57點；即月期指以29623作結，比上月結算價28442高逾千點，好友又食糊。大市成交連續18日過千億元，估計再大跌機會唔大，29300料有支持。一個月拆息升穿一厘，見九年高位，反映年尾資金需求緊張，市場亦開始為美國12月加息做準備，鎖定資金。12月底基金埋數前，相信大市仍有take profit情況，但回調亦係吸納優質股嘅機會。今年之「升」，非科技股莫屬。所謂「Trend is your friend, until it ends」，不妨吼位吸納科技股。除咗龍頭騰訊（700）之外，騰訊持有8.19%嘅金山軟件（3888）亦可留意。金軟係中國遊戲龍頭之一，上周派第三季成績表，按年多賺68%好過預期。中金睇好其網遊業務，預計第四季同明年業績更好。金軟明年將夥拍騰訊發行三款自家研發手遊，當中《劍俠情緣三》最具增長潛力。金軟前景仲要睇另一瓣業務雲服務，而雲服務發展需時。該股近排形成圓底走勢，喺18元水平打底，放榜前已回升至頸線22元水平，放榜後升穿頸線，上周三衝上24.7元，上周五回至22.25元接近圓底頸線，再反彈至22.9元收市完成後抽。現價23.1元，企穩23元後可望挑戰25元，甚至圓底量度升幅26元。該股前年高見34.95元，舊年低見12.7元，若反彈61.8%黃金比率，可見26.45元。割柑人本欄逢周四刊出
來源:
https://hk.finance.appledaily.co ... e/20171130/20230372
操盤手札記：價值投資法未死
1 :
GS(14)@2017-12-10 23:52:06港股跟隨騰訊（700）「You jump，I jump」；騰訊跳水，係被衍生工具推落去。上周五恒指執位以嚟，騰訊牛證炒家屢敗屢戰，四個交易日合共超過120隻牛證打靶，發行商對沖持倉沽盤涉過百億元，炒家不斷加注收回價較低嘅牛證，形成越跌越沽嘅惡性循環。呢邊股市騰騰震，嗰邊樓市㷫烚烚。深水埗匯璽II一個349方呎一房單位，以折實價1,031萬元賣出。深水埗係全港第二貧窮地區，僅次於北區，一房單位要過千萬，好癲！以投資角度睇，買家係睇價格過於價值，就算物非所值，只要個價繼續升，就買得過。注意，大前提係個價要繼續升，而樓價升跌取決於經濟、息口、供求等因素。美國下周加息幾成定局，雖然香港銀行體系資金充裕，未使跟隨，但同樓按掛鈎嘅一個月拆息上周五升至近1.05厘，相對5月低見0.35厘，已升0.7厘。息口上升，利淡樓價。買樓買嘅係預期，買股票何嘗唔係！我奉行價值投資，揀股以基本因素出發，但今年市況，揸重價值股隨時跑輸大市，反而單純追蹤大市嘅ETF表現更好。事實上，近十年嚟，價值投資差強人意，皆因低息同量寬扭曲市場運作，廉價資金流入股市，壓低波幅兼推高估值。另外，經濟增長低迷，唔多受經濟增長影響嘅科技股就突圍。若冇買重呢類增長股，難免跑輸。不過，拉長嚟睇，價值股回報則比增長股可觀。以美股為例，1927年至2016年呢90年，價值股年度化回報為13.5%，增長股只得9.2%。我近日比較留意一家中小企信佳（912），雖然今年資金捧藍籌，中小企冇運行，但從價值投資嚟睇，反而係吸納時機。信佳主要產銷電子產品，上周派中期成績表，輕微多賺4.2%。仔細睇賬目，情況比表面好：一來現金流持續改善，成為淨現金公司，可繼續派高息；二來寵物業務有望分拆上市。該股現價2.57元，呈杯柄突破。割柑人本欄逢周四刊出
來源:
https://hk.finance.appledaily.co ... e/20171207/20237448
摸魚手札：香城地產商、公關和政客二三事
1 :
GS(14)@2017-12-11 00:17:44從前有一處地方，叫香城，跟香港公開考試御用城市相同。今次講一個香城最近發生的小故事，如有雷同，實屬巧合。香城某一地產商在民生上惡名昭彰，常被冠上逼走溫情舊式小店的惡名。這是民生上的原罪，市民又愛又恨，但大家看不到這間地產商的另一原罪，叫「政治不正確」。地產商的管理架構多起用親外國勢力的人，香城人覺得無問題，反正用人唯才嘛，但big brother會睇唔順眼，這是政治第一原罪。地產商的資產技術上是來自政府的，只是因為上了市，而成為「私營機構」，由「市場參與者」接收。上市是為了集資，也是為了「其他目的」。壓倒駱駝的最後一根稻草：big brother眼中的外國勢力管理層，最近竟然把數百億的資產賣了給外人基金手上！這隻基金主營美、英地產項目，主事人雖是唐人，但一定不是big brother眼中的嫡系自己人，所以在big brother眼中，這是「勾結外國勢力，賤賣香城資產」，大罪來的。結果，香城的「政治團結派」最近一窩蜂攻擊這間地產商，很多陳年舊事都挖出來，既政治上表態，也在媒體上表態。不過，政治團結派都要講論功行賞，要證明畀big brother睇你「功在黨國」，少不免要做一些出位行為，例如：政客可以憑住跟自己黨友對話，制造跟黨友之間的「錄音證據」，去證明地產商搵過公關咄咄逼人，利用輿論煽動地產商的民生原罪。故事內容合不合理，不要緊；黨友間錄音證據有無說服力，也不要緊；被人壓逼選擇不報警，亦不要緊。因為重點不是故事的真與假，而是要做到輿論出來。
涉事黨友中大伏
經此一役，政客贏了掌聲，地產商及其公關被市民用石頭擲死了。地產商及其公關老貓燒鬚，被人過了一棟，商業社會講弱肉強食，難言對錯，但重點不在此。細想之下，其實仲有一個人會中大伏，就是那位涉事的黨友。因為政客很聰明，她宣稱所有針對地產商及其公關的指控都是來自黨友的描述，她自己只是「真誠地相信黨友」的說話，而且手握錄音證據。尤其是當政客公開力證黨友的人格和誠信時，如果黨友夠聰明，想必心頭會涼一截。因為所有事端都是來自黨友的一人之言，必要時，責任就落在黨友身上了。如果地產商要「覆桌」，黨友才是真正的箭靶。所以，要講「#metoo」的不是公關或地產，而是那位黨友。至於點解自己黨友對話都要錄音，這就是巧妙之處了。黨友都有分親疏，如果你不是一直扶植的嫡系，而是中途投靠的話……噢，那就sorry了，今次要難為你做棄將。所以富不與官爭，真是至理名言。政客的聰明或奸狡，遠超商人階級。再講多次，故事如有雷同，實屬巧合。唯一有一點是真的，就是big brother is always watching you。如果咁都唔明，我就無計了。渾水專業投資者、上市公司執行董事、90後
http://fb.com/muddydirtywater
來源:
https://hk.finance.appledaily.co ... e/20171210/20240413
操盤手札記：稅改加息 誰最得益
1 :
GS(14)@2017-12-18 04:28:37上周美國《時代》雜誌選出「#MeToo」反性侵運動嘅「打破沉默者」為本年度風雲人物，美國總統特朗普屈居其後未能蟬聯。諷刺嘅係，本周即有三名女子響應「#MeToo」，再翻特朗普性騷擾舊賬；舊年大選至今，已有17名女子指控特朗普，「#MeToo」儼然成為特朗普嘅催命符！醜聞纏身嘅特朗普，仲有另一道催命符「通俄門」。喺「通俄門」越揭越臭之際，特朗普上周三突然確認耶路撒冷係以色列首都，籌備搬大使館，全世界嚇一跳。呢招可謂一舉三得：既可轉移視線；又可為競選承諾找數；更可借中東亂局，做軍火生意，賺石油美元。市場對中東局勢未致太擔心，本周係超級央行周，有十幾間央行議息，涉及全球四分之三經濟體，戲肉係美國聯儲局喺香港時間周四凌晨三時嘅決議，同日仲有歐洲、英國、瑞士央行出場。美國今次議息，係今年最後一次，明年美息走勢，要睇特朗普稅改有幾巴閉。特朗普稅改，其實係一套組合拳，對內減稅──減收企業稅、個人稅；對外則加稅──加徵反傾銷稅、反補貼稅。稅改刺激經濟增長，亦刺激通脹上升，市場原本預咗美國明年加息三次，但稅改過關後，就估四次。加息本來不利股市，但有減稅跟尾兼預期經濟加速復蘇就唔同。經濟復蘇，金融股率先受益，尤其銀行股，具美國業務嘅國際金融股匯控（005），議息開估前就抽升2%。北水中嘅大水喉平保（2318），近日亦大手掃匯控至5.01%，成第二大單一股東。藍籌之中，具美國業務盈利貢獻嘅萬洲（288）都受惠稅改。萬洲係豬肉股，首三季收入近六成嚟自美國。瑞信預計，若美國企業稅率由35%降至20%，萬洲盈利可望提升10%；美銀美林、中金亦唱好。該股現價8.77元，考慮到年尾交投將轉靜，入市不急一時，可候回吐至20天線吸納。割柑人本欄逢周四刊出
來源:
https://hk.finance.appledaily.co ... e/20171214/20244334
Next Page