前言：如果唔係公司同事兼好炒得的「姐姐」提醒我WHATSAPP我主要股東兼執董梁美嫺賣曬14.23%股權，我唔會重新留意兼即日買返630，如果贏到錢，真係要請佢食餐好。
其實之前都炒過，諗住2014年10月31日每股0.118配過股，我在呢個位咁上下都應該有尐「安全邊際」，結果是插到落0.082先停，配股價再插多3成，渣到今日（1月26日）先返配股價啊⋯⋯
其實出完執董賣股消息後股價急升，我諗大家都係同一個諗法：「易手」／「賣殻」。
令我更相信佢是賣，是因為佢在無耐嘅兩星期前，公司發盈警之餘更公佈「終止經營塑膠模具業務」。公告提到「／／誠如本公司截至二零一三年十二月三十一日止年度之年報及截至二零一四年六 月三十日止六個月之中期報告所披露,塑膠模具業務所產生之收益分別佔本集 團截至二零一三年十二月三十一日止年度及截至二零一四年六月三十日止六個 月之總收益約72.3%及76.1%。／／」佔7成幾營業額嘅業務都唔要，正常推論都是要「淨身」準備要搞下嘢吧？配合埋主要股東賣股，好難唔估佢是易手。
睇到唔做主要業務，我聯想起周顯佢2014年8月寫過630嘅一篇文，我相信呢一著是按佢所講咁行（所以我擔心緊周大師會出嚟唱好，唔好搞630住先啦周大師⋯⋯）。篇嘢提到「／／如果由我操刀，去當公司醫生的話，我會把工廠廉價賣掉，甚至以免費贈送方方給別人，也不介意，反正虧本的生意，一毛錢也不值，但必須保留銷售隊伍，代售貨品以賺取差價，目的是繼續維持業務和上市地位。這樣子，最少可以保全殼價，令到上市公司的市值提升，就是配股，每股配售價也可以拉高一點。／／」依家做緊相似嘅嘢啊，唔做膠之後嘅人力資源業務都其實都是好虛無嘅嘢，至少唔使整幾億去買廠買地好花本錢先搞到嘅嘢。
再睇返遠一點，其實在2014年6月都話要買醫療業務，都有報紙佬吹過，聽咗跟入就又中伏鳥，後尾告吹埋，2014年3月尾集咗嗰4千萬又唔使用了。
簡單講，過去呢一年左右，就是抽咗兩次水，話買嘢又無買，之後在財年完結前CUT埋主業，最後就是主要股東賣股走人。
所以，易手是合理估計。
咁有易手潛力又不等於要大炒嘅，咁呢個股市無嘢是「一定」架啦⋯⋯
其實股價都非常低殘，連0.1都穿過，最後嘅配股價都成0.118啊。其實我覺得0.1呢尐位係好特別嘅位，點解特別？我都無乜好strong嘅ground，只係見到多數供股都是用0.1去供，咁我估0.1是一個可以被市場視為底嘅特殊價位吧，股票估票，都是估架姐⋯⋯
仲有一點好重要：市值。630以今日0.117收市價計，市值只是1.79億，是好細隻。而經過近年被各傳媒嘅教育，大家都會聽過「殻價」呢個terms，依家好似吹到是5億。而就算大股東葉偉倫，換曬尐期權，都是印多6億股，以現時15.32億股本計，印埋都是市值2.5億左右。
如果我要用財演TONE去寫，只要用1.79億市值再提埋殻價5億再講加埋執董賣股＋結束主業，已經足夠寫篇稿去唱好一下，HAHA，我都有些潛質做財演吧～
最後，再請周大師唔好咁快出嚟住⋯⋯
提外話：
其實我都有睇返尐「正經」尐嘅股嘅⋯⋯有心機再上嚟寫下吧，但越正經好似越難COVER曬。我嘅心水暫時有135昆侖能源
Alcatel-Lucent (ALU)高追鳥，呢一刻仲插緊接近9﹪
如果，呢排嘅急升係因為speculate nokia (NOK) 會買ALU，我會轉VIEW，唔會買或者唔會買咁多。
唔知佢今日插得畀人勁係咪因為佢個裁員計劃，全球要裁一萬人。（Alcatel-Lucent to Reduce 10,000 Jobs as Losses Mount）
我個人LONG咗ALU可能有BIASE啦，但係我覺得裁人對公司係好事喎。佢話裁都係2G／3G嘅部門，落後就剪，一次過痛好過半死不活。壞處咪又要畀錢做restructuring，咁要畀就唔該一次過畀曬佢，股價要重新上路就一定要放手一搏，來個大整頓之後先可以重新開始，失敗咪又跌返1蚊，依家3.50，但成功嘅話，唔好講重返高峰（試過85蚊以上⋯⋯），高峰嘅10分1都8.50啦。
ALU依家重點係去返LTE加雲端，仲有佢搞埋海底電纜，我無乜研究，但聽落都好似好勁咁⋯⋯ANYWAY，ALU咁慘主要係因為被華為等強勁中國對手打到無咗好多市場，華為PLAN咗嘅R﹠D已經多過歐洲啲對手，曾經睇過有網友分享，中國工程師平過西方國家咁多，3，4個中國工程師鬥你一個鬼佬，你點夠佢鍊？依家仲要燒錢多過你，分分鐘係5個鬥你1個。
集中火力，攻有前景嘅市場，資源集中嘅話，如果從細分領域睇，就未必係5個鬥1個。
智能手機爆發，的確為呢尐網路基建設備製造商提供好大嘅商機。市場係有，個餅應會繼續大落去，搶到就你驘。ALU呢尐前朝皇者，我相信如果可以搵返自己條路，有大把遺產畀佢可以做到一尐唔係三幾年就做到嘅事，有尐好勁嘅產品，其實係幾樣嘢深耕到一個程度再整合一齊先做得到，仲有係科技嘢唔做先行者就好易踩到人地專利。如果唔肯去擺脫過去，就會好似KODAK柯達，呢間公司係發明數碼相機嘅廠商，但最後競敗在自己開發嘅產品手上。
可能輸到傻咗，吹水吹到唔記得要講乜。
ALU其實在我心目中，佢似Sony。之前有過光輝歲月，又係架構好大，但業績長期唔好，市值跌剩幾分之一，但係背後嘅實力又未必如股價般咁差。以技術實力，真係山大斬埋有柴，SONY咁計，佢地呢幾年嘅影像事業其實搞得好好，手機用嘅SENSOR佢地係全球銷量最高，iphone 5S都用佢。但可惜呢尐公司個通病係搞得太大，你賺返嚟都唔夠某尐部門去蝕。一旦「止蝕」咗呢尐部門，業績將會爆發。
正當小米手機估值去到10b美元，ALU，百年老店，8.5b（當然外加幾b負債同埋一個蝕錢業務，呢個先最大鑊）。諗到呢到，忽然有尐感嘆。但我好明白條數唔可以咁計，尤其係我係「炒」股票而唔係「投資」股票嘅人。（其實我覺得好多炒股嘅人嘅FA底，比起成日開口埋口價值投資嘅人勁好多⋯⋯睇下雪球班高手，要FA去到佢地個程度，我真係諗唔到點追上去）
老實講，ALU我係見個圖吸引，又有故事講，我先衝入去。4G LTE加雲端，就係新CEO個THE SHIFT PLAN所講嘅嘢。覺得吸引，就下註。FA嘢要吹，吹到下年都未吹完。
ALU呢尐過氣明星，一旦有新故事可以講，想像空間極大。我相信有尐嘢，係要呢個規模嘅公司先做到。無幻想空間嘅，1B市值都唔買。有嘅話，100B都可以繼續吹，何況，ALU只係一間8.5b嘅公司。佢去年12月headcount 72,000，我當佢已經cut人，再加埋2015年要減1萬人嘅plan，點計都有5萬幾人。一間5萬幾人嘅公司，如果可以重拾正軌，動能一定好勁好勁。
ALU係其中一隻TURNAROUND STORY，SNE都是，NOK都是。
科技公司，等嘅可能係一個大賣嘅產品。做基建嘅ALU都唔例外。睇下佢可唔可以出到個「殺手級」應用喇。
ALU，爭氣吧。無買中興通訊（763）都嚟支持你架。（其實係咪應該買埋763？）