街外錢 vs 股東錢 Money Cafe
http://moneycafe-icable.blogspot.hk/2013/12/vs.html同樣身在英國，立足香港。
不同之處，在於一間更國際化，一間就專注新興市場。
巧合的是、今天兩間銀行均有資本壓力!
滙控過去幾十年一向只有收購，幾乎從無分拆。
但隨著經營環境及監管要求，正式改變
英國金融時報報道、滙控近日向主要投資者諮詢，是否同意將英國業務獨立分拆上市。有關議題，亦於滙控董事會內非正式討論。
匯豐目前資本充足比率、在全英，以至歐洲均屬最高，一級資本比率多達10.6%。
惟英國監管要求更嚴，除上月底決定出年全面落實巴塞爾三規定外，當局在額外資本緩衝，及其他計算有更高要求。
大行曾經計算，匯豐可能因此要填補過百億美元資本缺口，而觸發匯豐考慮分拆，更大導火線為當地即將要遵守Vickers Rule，零售及投資銀行分隔要求。
雖然分拆英國業務仍屬初步階段、預計最多涉及分拆三成權益，但消息指，建議可以體現滙控英國業務價值以及增加資本。符合監管要求，更最要在於避免控股公司層面，受單一市場監管因素左右。
有投資者估計、分拆估值將高達200億英鎊，根據高盛計算，匯豐每股估值當中，不足百分之二十，即大約17.9港元來自歐洲，貢獻最大仍然是本港及亞太。
匯豐九十年代因為收購米特蘭銀行、而變相遷冊英國，雖然有關方面強調，分拆計劃不會改變總部地位，但預計一旦落實分拆，有關匯控遷冊揣測會再度升溫。
匯控今次最多是錢唔夠使， 最多賺下街外錢。與之相比，渣打面對問題似乎更嚴重!
剛變相盈警、盈利十年內首次出現倒退的渣打，傳出內部討論是否需要供股。
英國獨立報報道、渣打董事上周曾商討是否需要供股，以強化資產負債表。
渣打目前資本比率超過百分之十，但跟匯豐相反，比率幾乎每年下跌。
匯豐仍然有資產可供出售，但渣打問題在於核心業務放緩、而且多個新興市場好像印度、南韓，經營均面對新挑戰!
渣打金融海嘯期間曾經兩度供股集資，時間比匯豐更早。
報道指，有關構思中供股，仍在初步階段，未提升至正式董事會層面。
但潛在供股卻爆出渣打高層出面更多分歧、報稱，支持供股的主席莊貝思及反對建議的行政總裁冼博德，除是否集資問題外，兩人又對莊貝思即將退休後安排，出現分歧。
冼博德有意由自己接任主席，不過莊貝思不同意。
英國傳媒一直報道，投資者對零九年接替戴維思出任主席的莊貝思有微言，認為他在內部監管及經驗均不及格。
而手持一成八股權的淡馬鍚、近年屢次傳出不滿渣打內部管理。
城鎮化 Money Cafe
http://moneycafe-icable.blogspot.hk/2013/12/blog-post_16.html中央一貫作風: 重大政策，簡單總結, 講到十三億人民, 食粥食飯都係靠佢的城鎮化點做?八個字講晒: 「六大任務，十個不准」!
克強總理終於擔大旗, 講到城鎮化, 係自然歷史過程, 但又出動家長式「十個不准」, 青山綠水不能改, 市民不准變流民.
跟風拆建、祟洋求異, 就連居民有樓住、但萬事憂心都唔得!
好聽啲，叫做體恤百姓!
明眼人一睇就知, 中央唔放心, 驚班地方官又行舊路, 拎晒啲錢大興土木, 日以繼夜咁拆, 再夜以繼日咁起, 思維唔改，神仙難變!
新型城鎮化, 猶如「中國夢」一樣、夢幻!
但六大任務當中, 淨係睇、落戶制度, 真係有進步咩？
自毛主席年代開始, 歷代官員都擔心, 一旦比人民自由流動, 佢地就會湧晒入大城市.
如果走唔甩嘅，就集中埋一齊, 就會變貧民窟.
窮，都唔緊要, 中央避忌嘅係、城市越大，資源越多, 就會形成另一股勢力.
所以寧願小城市星羅棋佈, 都唔要一城座大!
北京、上海、廣州呢啲大城市, 反而收緊落戶條件，退步!
呢啲大城市已經成形, 經濟活動集中, 你唔俾啲已經入城嘅外來人口落籍, 反而趕佢地返鄉下, 再整個小城市, 大城市啲工邊個做？
上海姑娘會幫你掃街？老北京會去搞衛生？
靠入城嘅農民， 番去一個無產業、無就業、無資源嘅城市仔， 想達致城鎮化， 根本係緣木求魚？
人為咁、縮細大城市， 亦唔見得可以舒緩、 而家大城市嘅壓力， 「良禽擇木而棲」， 呢個道理，領導人睇唔通， 反而全國6億5農民， 最心水清!
今時唔同往日， 以為農民生活仲係望天打掛？
喺農村耕開田嘅， 你以為佢地好想「出城」？
鄉下有田、有屋住， 唔種田，國家有糧食補貼， 土地流轉金， 每年每畝地有五、六百蚊收入遇上發展商徵地， 仲可以一夜間變成百萬富翁， 邊使蝸居城市吸霧霾?
無錯，城市福利係可觀， 有社保，有醫療，有教育， 但都要睇咩城市？
京滬廣，你唔俾福利佢， 啲人捱生捱死都排住隊去， 但係自製小城市， 有無咁高水平呢？
可能有，但唔係三、五年內嘅事!
睇真啲， 理論上，城鎮化最能夠解決， 係已經進城嘅農民工問題， 喺「醒」打工！
以為搵多「蚊錢」， 點知住唔起，食唔起， 細路讀書難。
返鄉下咩？ 地，可能已經俾人收左起樓， 無得耕田， 進退兩難， 城鎮化，本來幫到佢地，但偏偏特大城市收緊落戶限制， 大城市就有待確立落戶條件， 本末倒置！
就算加大保障房建設， 繼續係中央出年工作重點， 入唔到籍嘅農民工， 仍然得番塊小瓦片遮頭， 中央無認清呢個形勢， 就將調控樓市剔除， 喺出年經濟工作六大任務之中， 城鎮化強調嘅以人為本， 恐怕又係另一個口號嚟咋!
經濟學 Money Cafe
http://moneycafe-icable.blogspot.hk/2013/12/blog-post_8017.html今年，亞洲最少產生出兩個經濟學:
包括安倍經濟學、克強經濟學。
兩個跟早年伯南克經濟學，形成三強鼎立，一度大放異彩。
外界對當今三大經濟學派，暫時評價不俗。無它，股市好，市場情緒高漲，好自然會話:
阿爺果然高招。安倍有前瞻能力。仲有伯南克力挽狂瀾。
但調轉問，如果並非無事無幹，根本用不著搞這套、做那套。結果堆砌出不同門派經濟學。
用政治人物為名經濟學，近三十年，盛極一事有列根經濟學、戴卓爾經濟學，認同與否一回事，至少尤其後者，最終目標是將經濟交回市場定奪，而非目前將經濟從市場，回歸政府左右。
於是，正當「咩咩」經濟學充斥不絕於耳，市場經濟學五個字談論就少之又少。
其實，「咩咩經濟學」之所以有回響，有聲音，根本在於經濟唔掂!! 而更重要，無論伯南克、或安倍經濟學，甚至以往內地一套，大部份程度等於用錢解決問題。
以日本為例，經濟未至完旦，但內傷嚴重，安倍銀紙彈成功在於日圓由八十五，跌至一零六，股市幾乎翻一翻，但安倍目前民望，卻上任以來最低。
美國情況相近，股市翻了幾翻，惟經濟自零九年以來，平均增長僅僅百分之一點五左右，遠低於海嘯前百分之四水平。 似乎，俾錢解決問題，但目前問題，肯定錢不能解決。
外國評論提過，政治人物為選票可能母性大發，除既要低失業、控制通脹外，近期又提到三大目標，即收窄貧富懸殊不平等。
如果將所有綱領，要由聯儲局一一接收，嘩! 好睇過戲!
如果市場等於絕對自由的話，世界上根本沒有一個真正自由市場。
市場存在，在於有規有舉之下，發揮創造性，及分配角色。由越來越多「咩咩經濟學」氾濫一日開始，真真正正市場經濟學，可能越行越遠!!
武林大會 Money Cafe
http://moneycafe-icable.blogspot.hk/2013/12/blog-post_18.html上海大攪央企改革，上海國資委會議，更加被形容為央企盛事，武林大會。
好簡單，上海作為龍頭，而央企改革、早喺年內多次會議，上海都有參與其中，備受關注都唔出奇。
央企改革要成功，一定要響，內地定義「響」，即係要勁。
上海唔止錢多，企業多，亦有概念，同先行者優勢，韓正仕途繫於其中。
韓正強調，內地央企改革，並非照抄淡馬鍚模式，某程度上: 啱!
因為，當局對上海模式嘅央企改革、相當進取，影響要比淡馬鍚、有過之而無不及。
有留意的話，內地選定三大央企改革城市，上海、天津、珠海，後兩者僅僅提升競爭力，而上海真真正正相標，有所謂二、五藍圖，包括要做二至三家符合國際水平企業，五至八家可能全球布局，跨國經營。
肯定，韓正相當了解當前央企嘅問題，特別在於央企、既欠動力，亦欠創造力。
但三至五年就達標、要上海央企煥然一新，某程度上，亦係過份進取!
內地央企大多並非新經濟行業，有條件可以平地一聲雷，以實業為主央企，等於一間大型土炮廠商一樣，錢多之餘，更需要是一股軟實力。
簡單講，要做一間唔係靠錢多，都獲得市場認受企業。
內地掌握到央企當前問題，但解決與否，屬於兩回事。
央企、就係央企，無論點樣改革，阿爺持有，「做又三十六，唔做又三十六」、呢種心態唔改，就好難會成功， 而家繼續由國資委、掌管央企改革，即係身份同時係球證、教練同球員，繼續自己玩晒。
企業要做得好，盈利，照顧股東之餘，更重要可能先具備一顆企業的心，為品牌，為用家，而非為搵新錢，有呢三樣，其實無論民企、央企，私企，都已經踏出優良企業先決條件。
八八九九 Money Cafe
http://moneycafe-icable.blogspot.hk/2013/12/blog-post_23.html不能否認，內地已經步入八八、九九時代，意即無論回購利率、拆息等等，全部升至八、至九厘。
如果今日之前仍然以為人行注資三千億為利好消息，或者局限於只懂樂觀，不曉分析。
一，數日內三千億，即真真正正意味有問題。
二，短期流動性七日為限，七日之後又如何？
三，六月拆息部份廿、三十厘，當時亦僅注入三千六百億左右，今次稍一見十，已用上了三千，難道較半年前更嚴重？
對於內地資金情況，老實，內地分析比多間外資大行來得深入，正當陶冬流於人行注資門檻提升，或其他大行認為季節性因素影響云云的同時，內地專家首先將六月及今次資金緊張比較，結論有二：
首先，半年前熱錢處於外流，區內徘徊於美國退市憂慮，所以整體上受外圍資金流向逆轉為主。
其次，上次拆息抽升局限於一周之內利息，今次蔓延至一個月，亦大大抵消人行注入短期流動性作用。
內地盛傳禁用「錢荒」字眼，我們對此深表認同。
一，頭十一個月，外匯佔款高達二萬五千億，較之去年全年三千多億，已經爆燈，十一月單月外匯佔款更為今年第三多;
二，整體M2規模多達一百零七萬多億人民幣，按年升一成四;
三，四至十一月，人行僅僅十月份進行資金淨回籠，誰說有錢荒呢？
我們經常套用「問題」呢兩個字，但真真正正屬於問題在於: 有問題但不承認存有問題、有問題，並且承認，但找不出問題所在、最後問題原來已經屬於結構性。
綜合內地情況，三者之中，最少後兩者符合。既然錢荒不是真正錢荒，又既然六月一次大大鑊，半年未夠又出現兩次，難道以後逄年結、季結、農曆年、中秋、端午、以及黃金周前，均應列為「中國結構性錢荒周」?
美林陸挺判斷問題來得實際，與其再討論拆息何時回落，更應一問金改是否一小步，已有挫折?
而更實在是，人行推行政策即使盤算有序，並且得宜，但人行在市場開放初期，跟商業銀行一樣，同樣經驗不足，評估一樣會有誤。
綜合內地分析，目前擔心會，或擔心經已出現，為利率結構性上升。君不見，年內其實長長、短短利率已經已經升逾兩厘?
構成當前困難在於原有結構問題，包括資金失衡、利率錯配、以及過份依賴同業資產。
更弊，原有結構問題浮現的同時，新存在結構問題包括，去槓桿，企業趕再融資，結果息要升、利率市場化，對銀行來說，存款為最佳緩衝，搶存款之下，結果息要升
內地社科院數字，中央及地方債總額逾二十八萬億，計算企業及居民的全國債務逾百一萬億，超過M2水平，相當於GDP二倍多，風險溢價提升的大前題，結果息亦要升!!
股王 Money Cafe
http://moneycafe-icable.blogspot.hk/2013/12/blog-post_30.html2013年將盡、除左搏炒埋半日市，大部分人都休戰，係時候做下回顧展望。
今年兩大股王、27銀娛同700騰訊，正是Kenny 年初推介兩大心水，最初大家都話佢比「行貨」，點知肯跟佢買、今年分分鐘可以提早收爐，真係唔可以唔比個「Like」鄧博士!!
最近呢轉炒700、賣點係「網遊」加「手遊」，韓國一隻「劍魂」公開測試反應良好，瑞信已經開定「盤口」，預期會成為騰訊史上最好賣一隻遊戲。
加上摩通合奏、估計出年內地手遊市場，明年可以超過200億美元，三至五年更可以超越網遊、結果搞到基金年尾都要追貨追到氣咳!
所以股王可以一鼓作氣、市值首度超過九千億!
九千億代表咩? 五大地產商、即係兩位李生、加埋郭氏兄弟，仲有新世界信和。
騰訊市值加埋，仲有找一千億!! 邊個仲夠膽話、香港有地產霸權?
其實當大家注意力仍然留在微信、可以帶來的手遊收入有幾多時，熟悉內地網絡發展的中環人，已經提醒拆局，要留意係微信同商家結合的能力、可能遠超市場想像!
同淘寶唔同、商家跟本不需要在微信開店，而係透過微信既「用戶登錄」能力，不需要再輸入帳號或密碼，用戶只要在手機按制，己經可以登錄商家既APPS、意味著商戶不再需要建立自己既帳戶體系，就可以接觸2.7億個用戶。
結合埋微信「一鍵掃碼」支付能力、可以話為商家在淘寶以外，提供全新的銷售渠道，而微信亦好識得揀點樣拓展自己銷售網絡，好似頭炮就搵左小米合作，9分55秒就「秒殺」左小米15萬部手機，創左網購銷售紀錄!
微信話好快就會向外部商家、提供有關「賬號登錄、微信支付」，首批測試商家就包括招商銀行以及多間電商、更誇張係連「廣州交警」，最近都接入微信服務號、通過微信向違規停車司機，發出最後通碟，話再唔走就要罰錢。
重要係、騰訊呢啲服務，呢一刻都係完全不收費，好肯定，當市場開始認識微信賬號功能，又有另一番RE-Rating!
最近有內地網民提出、新浪微博面對微信挑戰，已經呈現出衰落趨勢，有媒體引述、新浪微博活躍度距離高峰期，下跌近三成。在另一個社交網分享量排名中、微信既「好友」及「朋友圈」，分別佔排名一、三位，微博只能排在中間位置。
微信有兩個功能、係令微博完全無還擊之力，首先係「朋友圈」可以將原本、發到微博內容，發送到朋友圈。
加上微博不斷加人或者關注別人的做法、令到內容變得泛濫，相反微信有「賬號管理」，變成微博「淨化」版，更貼合用戶要求。
簡單講、騰訊之所以冒起，既有地利人口，但不得不數、晉身股王，最大理由，其實係天時!!
內地過去幾年最大企業趨勢、唔需要多講，正是「國進民退」，國資企業壟斷市場、民企唔死都難有發圍，唯獨互聯網，國企最初嫌細唔吼，阿爺又唔想比Google facebook 發圍、於是造就左馬化騰馬雲成功搶灘，成為內地少數可以不受干預民企，呢點恐怕雙馬自己都無諗過!
受襲 Money Cafe
http://moneycafe-icable.blogspot.hk/2014/01/blog-post_3.html緊隨一月二日半陰、半陽之後，香江股市正式受襲。
花旗姐話，一月效應、國指贏恒指，要實現，查實原來要埋牆「倒立」!!
觀乎外圍市況，香江並非獨跌，惟跌市原因，或多或少說來牽強：包括，話NPMI唔掂!!但NPMI唔掂，其實僅局限內地、跟著又賴退市!!
喟，早排宣佈退市，咪當好消息炒。要真正入型入格，或多或少，可能日本休息，但適逄美股跌過百，場外日經期指急跌五百，觸發大量歐元兌日圓交差盤拆倉，令跌勢加劑。
個市跌，是否等於個市差？未必一定，君不見，當炒股繼續升，或跌市中承托力強。更值得三思在於，與其恒指由二萬四累積跌過千，就喊得要死，更話股市已死，倒不如要罵的是，指數已死!!
國指二百五十天、五十天線同告失守，技術上等同有生命的植物人，同恒指一樣，兩指數成分股，十居其九，非舊經濟、則是產能過剩行業。
於是，調轉再問，如果恒國兩大指數升，是否代表投資者拒絕進步，更不值得興奮？
法巴鄺樂天說來有理，亦道出大戶面對痛苦，按他所言，內地改革其實不利大型央企，舊有行業，國指、以至恒指升，某程度上，可能更反映市場不相信改革成功，而市場要相信改革成功，大指數根本要跌。
但對大戶痛苦，在於所謂受惠改革股，既選擇無幾，亦非屬於指數股，礙於規條，基金動彈不能。
我地經常指，炒股不炒市，在在反映指數OUT爆，更深一層諗，是否代表負責篇制指數的恒指公司率先最OUT？答案不言而喻!!
恒指產品，五花百門，成份股、國指、已告死寂的紅籌股指數、無甚參考價值的AH股差價指數等等，唯獨新經濟類指數一概欠奉。
經營經恒指一班人，有人形容活在規條主義之下，指數股要成交夠，市值足，上市期符合一定時間，但太多情況亦顯示，成份股跟成交相者關係，可以調轉，並非先有成交，才可成為成份股。
到底，五十隻成份股，有否需要多隻內銀在內、全數大型地產股涉及其中？
當年由三十三變五十，為的是怕「查理士」．李另外起指數爐灶，礎於形勢，結果落後三年。
恒指公司同樣屬於圖利機構，惟相對摩記、富仔等等，市場人士話，人地真係睇著個市食飯，市要咩，就俾咩，就連MPF指數亦有幾個，吹咩？!
炒股不炒市大環境之下，個股只要升，回報一樣有。但指數左右市場情緒，更完全影響對中、港市了無認識的個別外資，見你持續呆滯，叫人點買你!!!
市場要進步，似乎最先應該自強不息，應該是恒指公司。
頭號重案 Money Cafe
http://moneycafe-icable.blogspot.hk/2014/01/blog-post_17.html內地理財產品問題，或多或少源於中國人太精於理財；
借三厘，尋求六、七厘回報、批六、七厘回報產品，從而提供回報十、廿厘高息民企、民間貸款。
本應，任何產品，打包後再售，籌集資金後再貸，根本屬於金融業運行之下，可惜是，內地沒有寧缺莫濫精神，氾濫屬發風險，年內二千八百多隻產品到期，命運如何，震憾程度隨時較柴可夫斯基一八一二序曲更為轟烈!!
外界持續性關注內地金融體系開題，隨中誠信托「誠至金開」理財產品問題曝光，大年初一，違約與否，隨時成為另一報導重點。
被指為今年信託業「頭號重案」, 距離大限尚餘兩星期、中證報報道，最少六十名「誠至金開」投資者，於QQ成立群組，互通消息之餘兼研究向發行單位，以及負責銷售的工商銀行爭取陪償。
到底，年初一會違約嗎？
咪傻!!財經拆局開賭，機會近乎零!!
一。中國人重視好意頭，違約，大吉利是咩!!
二，內地市況欠佳，領導人、監管者，陽光底下違約、抑或烏雲密佈下爆煲，抉擇太易。
三，從工行、中誠信托如此高調，預告兌付困難，絕不似中資一貫造法。
近四個月、內地最少有十六宗理財產品兌付危機個案，但業界指是次問題最為複雜，不排除有關方面會將產品兌付期延長，由工行負責振富債務重組，變相曲線為產品包底。
但正月大年初一不違，二月、三月、或九月初一，內地理財產品始終今年有首宗違約出現，外界已經共識，內地問題在於理財產品太多、年期錯配嚴重、抵押品形同零，甚至出現抵押再抵押現象。
更重視，凡事總有第一次，監管當局其實多次提及，中國違約絕非零可能性。
不幸是，產品去，更多產品來，而且利息回報更高。數字顯示，一月多宗新新市理財產品，百分之八十四的利息回報有介乎六至八厘，較去年底平均僅僅四成八比例大增。
同一時間，企業等錢洗，內地消息指，踏入一月，其實還有多宗愈廿厘理財產品推出市面。
內地去槓桿，目前在於減少不必要貸款氾濫，正如張化橋指，去槓桿一定需要市場利率向上配合，內地行出呢步，但高息，銀行同時收緊貸款，間接令去槓桿造就更多表外，或理財產品出現。
理財產品並非影子銀行，因為按國際金融局介定，凡非銀行以下貸款，在中國都屬於影子銀行，即規模其實更廣泛，亦可以理降內地何解要大搞民營銀行，批出網上銀行牌，事關銀行多了，影子銀行數字上自自然然就會減少!!!
染騰 Money Cafe
http://moneycafe-icable.blogspot.hk/2014/01/blog-post_16.html市場總會循環，似曾相識的一幕是九六、九七，期時個個炒紅籌、間間愛染紅，數風雲人物，點可成金，榮智健、朱小華、谷永江，還有位叫張大春。
事而世易，十多年前風流人物早已換來馬雲，與化騰，市場主題亦已經正式進入染雲，或染騰的新年代了。
中環人戲言，與其夢想按層樓、賣洋酒掘金，辭份工、搞物流還來得實際。
少少勇氣，動動腦根，將郵局、雞記、八達通、以至港交所網上平台三大元素，各抽優點，嘩，不得了。
科網跟二千年最大不同之處是，現在吹水，幻想的同時，有數據支持；
人流、用戶、平台、收入，就會構成了無邊際的橫向式垂直式放大效應。何解，網遊不提，只提網購及物流，如前所述，有數據嘛!!
首先，內地網購、電網消費額，佔全國總零售額不足百分之八，形成等於一隻八倍PE股，添加概念，吹上十二、三倍一樣，結果都在於等同空間大太。
而根據支付寶最新統計，內地去年各大城市網購金額，全部按年增幅一倍或以上，更弊在於，城市越窮，增長愈高。
去年為例，十大購網額增幅城市，七個屬於窮地方，當中廣西壯族自治區增幅達一倍六，其次為河南。
無論B2B、C2C，現時關鍵在於物流，馬雲揚言，即日訂購，即日貨到手，形成物流價更高。
提起咩咩B2B、C2C，德銀認為，淘寶或亞馬遜的C2C模式勢將成明日黃花，三年後，內地B2C市場會手執半邊江山，最少佔五成市佔率。
按獨立研究機構數據，內地B2C市場目前最大玩家仍然是馬雲，旗下天貓市佔率五成三，其次是策略投資者紅星如雲的京東、最後才是化騰。
於是，化騰郁華南城，不難理解。
兩大巨頭連環出招、繼即時通訊及手遊平台，今次騰訊入股華南城，普遍就視為在物流領域反攻阿里。
而下一步、被譽為巔峰對決，騰訊與阿里兩大巨頭大戰，蔓延到理財業務。
騰訊開通旗下微信推出的理財通、賣點是與銀行卡直接互通。標榜年化收益率6.435厘，雖然略低於對手餘額寶，但與人行活期存款利息0.35厘相比、仍然高出18倍。
就在理財通上線當日、最大對手阿里巴巴的餘額寶也公布，用戶超過4900萬，規模突破2500億元。
正因為吸金速度驚人、餘額寶一度被指是，銀行流動性緊縮的罪魁禍首。
連同百度、網易和蘇寧等同類產品、有專家估計互聯網基金市場，總規模已高達4500億元。
其實B2C會火速冒起，等同傳統零售店鋪經銷的零售股已告死亡。好簡單，任何一間內地或國際大、小、中吸品牌，要內地二線城市大搞「有形」零售點，風險大、包握低。
馬化騰要騰訊電貿「天貓」化，看中除旗下網遊機虫年輕一眾客戶層之外，最大優勢在於旗下移動平台。
正因如此，E COMMERCE，其實已經開枝散葉，預計三數年間、M COMMERCE，即流動電貿隨時大行其道。
市佔率計，M COMMERCE佔內地整體電貿僅僅百分之九，如果二零一七年一如預期升至兩成四的話，化騰既然要做天貓，馬雲想染指咩？不難預測!!
央媽救市 Money Cafe
http://moneycafe-icable.blogspot.hk/2014/01/blog-post_513.html二千五百多億逆回購，股市即彈，解構中國股市殊不複雜，說到底，當前問題一切屬於用錢解決的問題!!
內地股民認為，資金緊僅為借口，改革阻礙升勢，才屬事大，允其市場要秩序，新股不圈錢等要求，結果造成中資股持續不振。
但將新股重啟，等同於股市下跌，並不科學。最簡單，無論首日一隻，琴日八隻，通通掛牌即彈，更甚，內地創業板自新股重啟以來，指數水平較未重啟前高，而且更見新高。
匯豐呼籲盡量避開大央企股，內地股民早知啦!!
重慶市長黃奇帆對內地股市問題，尤其新股重啟後引發種種討論有個結論，按他認為，肖鋼錯在出牌順序搞錯了。
黃奇帆指，經濟學道理大家都知，如果按情況，按次序出牌，工作有序，則為一副好牌，次序打亂了，就會輸。
言之下意，黃市長基本上判決，肖鋼實為輸家，三中改革三個月未夠，最早輸掉的財金官員。
老實，黃奇帆及肖鋼分別，的而且確在於次序有別；黃奇帆認為，市旺、錢多、信心來了，新股才可以重啟。
肖鋼或多或少，希望先新股，後資金，所以太想首次新股守規有舉，結果卻被市場先舉腳反對。
無意幫黃奇帆或肖鋼任何一方，但細心想，黃奇帆形容理想改革次序，或多或少已經成為股市烏托邦，完全流於幻想，皆因每次停發新股，監管當局何償不是希望股市盡快提振，但每次事與願違。
相反，肖鋼作為銀行領導前身，企業缺水，一旦繼續大封股市集資門，公司欠錢，連帶負面影響怎樣，他一定最清楚，到時莫講提振，全國成千上萬股市，一眾騰騰震也。
股市是否見底，無人知。但要內地股民開心，太易，一切用錢就可以。
市稍為反彈幾十點，人人扮代表，讚人行央媽夠慈祥，提早向市場派紅封包，換轉下次央行再停止注資，到頭來意見又一面倒大罵。
內地搞股改，要直接融資比例增加，要股市有秩有序，經新股重啟一役，改革市場，最大敵人原來實為內地市場持股者!!
Next Page