女神tea time：炒比卡超股？先捉網龍吧！
1 :
GS(14)@2016-07-15 05:13:20作為炒友，你唔知Pokémon GO點玩唔緊要，甚至乎你連比卡超係咩都唔知，都冇問題！不過，有三樣嘢你一定要知，第一，隻game令任天堂股價六個交易日內，勁升75%；第二，隻game係採用AR技術；第三，隻game受歡迎程度係癲嘅。講咁多，自然係想派福利！冇錯，是日隆重推介網龍（777），原因四個字講晒：AR網遊！網龍本來就你一隻game股，網遊加手遊產品；同時亦大力開發教育平台業務。話說集團一早已就VR同AR作出部署，去年底已開始研發VR教育產品，今年下半年就會街。不過，公司一早已睇清形勢，副董事長梁念堅上個月接受訪問時講過，「VR是現在，AR才是未來」嘩！睇完真係覺得佢哋係先知。近幾個月，更投資兩間AR公司，分別係來自加拿大嘅ARHT，同埋本地薑Cherrypicks Alpha。網龍通過整合兩公司嘅AR技術，將用作製作內容及軟件應用到遊戲、教學、娛樂及企業等範疇。今次Pokémon GO嘅成功，完完全全幫晒網龍示範，AR技術係如何應用。他日網龍要開發AR game，無論吸用戶定係吸廣告客，一定更加容易，亦幫網龍諗埋一個廣告摸式。去一個唔覺意寫咗個大受歡迎App，廣告唔使搵都自動埋身，搵錢途無可限量！另外，網龍走在潮流尖端，率先開發結合AR元素嘅教育平台。截至去年底，網龍贏得覆蓋內地14個省或直轄市內400所學校，5,000間教室的招標，當你見到Pokémon GO強國已有老翻，就知今次Pokémon GO亦正正變相幫網龍做埋廣告，話俾廣大潛在客戶聽，「我嘅AR軟件真係好玩又好用！」公司冇錯去年業績轉盈為虧，蝕1.43億元人民幣，今年首季虧損，更由上年同期的1,091萬元人民幣，擴至1.14億元人民幣。不過，網龍的遊戲業務首季收益2.84億元人民幣，增長26.6%。網龍管理層表示，今年是公司對VR及AR的投入期，相信2017年會有收成。網龍喺周二受任天堂刺激，炒高一支大陽燭升逾6%；當任天堂都可以6日升75%，網龍冇可能已經炒完囉。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20160715/19695384
女神tea time：買科技股贏在開通前！
1 :
GS(14)@2016-08-19 06:53:24深港通公佈後，恒指再創九個月新高，升得最靚嘅騰訊（700）再創新高，市值仲打低阿里巴巴！咁已話咗畀大家聽，呢期個炒作主題係科技股！聯想（992）截至6月底止首季業績非常之好，盈利大增64%至1.73億美金，好過市場預期，呢樣已顯示公司重組做到嘢，基本因素好！好啦，咁你會問，股價由上年4月13.83元碌落嚟，插到6月最低4.285元，見底未先？講真由高空下墜，相差達七成，相信大部份基金已經打晒靶。喺靚業績支持下，就算有淡倉呢個時候都要填補番。大家另外要留意係，公司過去大跌，係因為唔buy佢收購Motorola，覺得手機市場係蘋果同三星嘅天下，有排都未到Motorola，於是大家對聯想睇法係「冇啦冇啦」。不過就算手機唔work，都唔代表佢升唔起。睇番2012年Nokia股價曾打到去最低1.2827歐元，但而家市場形勢冇變，Nokia股價已升三倍去到5歐元。除此之外，聯想9月將會推出全球首部AR手機，喺Pokémon GO嘅成功下，聯想當堂多一個超強賣點。所以係時候買入博真正轉勢！另一隻大家要望多兩眼科技股係酷派（2369），隻股已被納入深港通南下買入名單。首先呢間係一間深圳企業，第二樂視係大股東。由於酷派由於有超強有知名度，單係呢兩樣已贏在深港開通前。而喺炒作手機科技股嘅大前提下，呢隻相信會受著目！
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20160819/19741667
女神tea time：新iPhone、新能源股攻略齊發
1 :
GS(14)@2016-09-09 05:33:18蘋果iPhone7同iPhone7 Plus正式公佈，一如預期，今次新機冇咩值得預期。至於粒勁似「逗號」嘅耳機，只要唔小心唔見咗一邊，就可以為部耳機寫上句號。不過又咁，或者呢個就係庫克條橋，「你唔見咗一粒咩？買過一對啦！」係咪突然睇到蘋果條財路呢？即係咁，如果家陣用緊部機仲完好，又冇心癮想換機，就不如等多一年。話晒出年係iPhone面世10周年，所以相信蘋果應該將所有絕技，放晒喺下年部機度。同埋，或者你唔係好介意，但下年嗰部iPhone，你買咗嘅，就叫買咗「8」返屋企，而唔係買咗「7」。至於炒唔炒機呢，要炒就炒鋼琴黑128或256GB大機，最安全。講返股份推介，是日睇好隻協鑫新能源（451）。首先，近來新能源股有氣勢，中電新能源（735）、天津創業環保（1065）近來都起跳。其次係，協鑫新能源基本面來講冇得輸，上月底公佈上半年業績，純利大升1.3倍至1.67億人仔，比起8月中公佈盈喜預計嘅超過1.3億人仔仲要多。至於今年餘下月份，值得期待嘅炒作主題係深港通。今次深港通嘅港股通名單，只要係恒生綜合小型股指數成份股，同時市值有50億元以上就入圍。協鑫新能源最新市值超過80億元，相信要中選冇咩難度。咁話說佢阿媽保利協鑫（3800）一向內地知名度高，所以協鑫新能源有機子憑母貴。協鑫新能源昨日股價一突破12月嘅供股價0.45元，就一箭飆上去。不過如果大家睇耐少少，呢隻股被保利協鑫收購後，市值曾升到超過200億元，所以現時先得80億元多啲，現價安全；昨日股價先開始突破，加上仲要係毫子股，所以應該未炒完。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20160909/19764644
女神tea time：特朗普風險，完了吧
1 :
GS(14)@2016-11-11 08:09:26特朗普風險？係咩？碰！市場又唔係儍嘅，經歷過年中Brexit嘅黑天鵝，大市急跌後就成為買平嘢好時機，上次錯失良機今次又點會走寶，正如2003年沙士之後嘅樓市，跌少少就即有承接。所以特朗普效應玩完㗎啦，（當然如果佢突然因為唔知咩原因冇得做，就有另一隻黑天鵝飛出嚟）下一步就真係要迎接深港通。市場唔少人相信，深港通11月21日通車，That's why呢幾日中資股升得唔錯。山東墨龍（568）有同時喺深圳上市，A對H溢價275%，一個字，抵！另外係特朗普本身係個生意佬，油價跌對佢都冇着數。佢贏到大選變相對伊朗嘅政策可能有所改變，話晒佢之前曾批評西方與伊朗簽署的核協議，畀伊朗今年大幅增加石油出口。家陣油價有望獲支持，油服股自然有利。噚日資源股率先炒高，見一眾油服股蠢蠢欲動，呢隻有深港通概念，要繼續沿上升通道行，相信冇難度。此外，大家要留意，A股石墨烯炒起，金路集團漲停、珈瑋漲半成。今年9月工信部亦講明，下一步會扶持石墨烯發展。石墨烯被視為新寶藏，係一種能夠快速令電池快速充電嘅新超級材料。至於香港如果要數石墨烯概念，就要睇隻允升國際（1315），最新公佈與上海交通大學、同濟大學合作研發石墨烯儲能器材。研發上述器材，是為對應用於電動汽車的低成本節能型的儲應能器，希望可以達成「充電十分鐘，續航兩小時」的目標。股價低位反彈後守穩2.6元水平，可以留意。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20161111/19829558
女神tea time：注資賣殼概念齊
1 :
GS(14)@2016-12-03 05:09:10最近同位N年冇拍拖嘅女性朋友傾偈，佢唔係冇人追，但又呢樣又嗰樣。唔知係咪俾啲「港女語錄」荼毒得多，簡單來講，佢嘅要求係「有樣、有錢夾有品」。如果個男士真係有咁好條件就唔會係單身啦。佢竟然話，只係緣份未到。我冇佢咁好氣，同投資一樣，錢唔會自己跌落嚟，一係你自己出擊發掘！今日就推介一隻有幾大好條件股份——安寧（128）。華懋系來講，近來大家都係留意天安（028）全購丹楓（271）單刁成唔成事，不過識搵就要搵下一隻潛質殼股。安寧本身業績唔掂，上年開始勁蝕，今年上半年繼續見紅。加上幾年前結束國內的渡假村及酒店業務，今年再賣內地零售附屬，戰意有幾多剩？餘下業務就只有小量零售、證券投資及荃灣顯達鄉村俱樂部業務。隻股出路，一係大做，一係甩手。如果大做嘅，華懋輕輕注少少嘢入去，都夠炒起隻股。假如係甩手呢……就要計計數，安寧6月底止，手持4億幾現金，銀行貸款只有幾百萬，加埋1.9億元可出售投資，加加埋埋6億元，折合每股0.37元。注資、賣殼兩個概念都齊。安寧現價0.63元，只係cash已佔股價近六成。呢個計法，仲未計荃灣顯達鄉村俱樂部資產。目標價方面，龔如心早於2000年，以每股1.40元買入安寧34.6%控股權，名下最新持股已增至44.28%，如果他日有咩動作，以呢個作為指標都未嘗不可。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20161202/19851827
女神tea time：買定賭股過聖誕
1 :
GS(14)@2016-12-24 10:41:22臨近聖誕，無論美股到唔到二萬點，港股都係無動於衷，大家早已收爐諗去邊玩，如果近近地唔想返大陸又唔想飛，澳門都係冇得揀之下嘅選擇。澳門旅遊局長就話，聖誕節期間客房預訂唔錯，相信入住率與往年相若。預計今年訪澳旅客約3,000萬人次，過夜旅客較往年增加，達到年初指標。其實濠賭最壞情況已過，亦一早已反映晒喺股價。以銀娛（027）為例，股價下半年以來已反彈三成。追落後嘅可留意「小賭王」何猷龍旗下新濠國際（200），股價雖然都有反彈，但累積升幅只有15%，明顯落後一截。另外，新濠國際近日宣佈斥資92.07億元，從皇冠集團（Crown）手上購入新濠博亞股權，並成為單一最大股東。近年賭業係差，加上皇冠之前有18人被捕，令新濠博亞股價較兩年前高位，已經唔見三分二。皇冠已無心戀戰，咁啱何猷龍需要大展拳腳，趁低掃平貨相信必有後着；加上澳門賭收已回穩，股價月初回吐後，近日股價都企定，可買定等過年。另外，賭收有起色，澳博（880）市佔超過五分一，自會受惠。公司去年因投資失利錄一次性減值虧損2.5億元，加上衞星娛樂場暫停營業，影響盈利1.43億元；今年冇咗呢啲負累，可以一吼。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20161223/19873988
女神tea time：北水的目標
1 :
GS(14)@2016-12-30 08:13:11年尾歐美股向上，偏偏港股就弱到震。人仔係咁貶，彭博錯報在岸價（CNY）一度跌穿7算，惹來人行強烈反應，證明阿爺真心驚。事實係，?家同7算真係差唔遠，一旦觸及就會出現人踩人，令現時市場走資情況，會更加無所不用其極。新一年各公司資金可重新擺位，你要擺都會擺喺傳統嘅避難所。以海航為例，高價奪地，再一星期買兩隻殼，上星期以6億元入主珠寶銷售及製造商KTL（442），聖誕前再宣佈以近4億元收購紙質卷煙包裝供應商嘉耀控股（1626）65%股權。咁已曲線話你聽，除咗香港地皮、物業外，港股係北水嘅目標，其中買殼係重要手法之一。近兩日異動嘅綠色能源科技（979），市值只有3.4億銀，基本上只餘下建築廢料處理及塑料回收業務，業務簡單，易於轉手。公司上年曾發6,006萬元CB，換股價0.78元，最近已全數贖回；另外，今年4月收購德國廢物回收項目，涉639萬元，但當中420萬以股作交易代價；加上月中公佈配股，佔擴大後股本約16.36%，配售價0.26元。股權重新擺位，似係有重大部署。股價噚日創新高，短線博進一步突破。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20161230/19880860
女神tea time：注資後抽升有景轟！
1 :
GS(14)@2017-01-07 00:28:05資金瘋狂走佬，部份資金衝落啲嚟香港。你望吓海航，近來係咁買殼，入主KTL（442）及嘉耀控股（1626），持股逾60%以上；最近又傳買鎮科集團（859），買親嘅股價都彈高。中能國際（1096）連炒幾日，呢隻股去年中易主，?家由中國華融（2799）做大股東。華融集團總資產超過8,660億元，比年初增長44%，仲多過海航嘅6,000億元資產。有冇得炒要睇有冇動作，公司上年底先以3億元收購福建新捷天然氣16%權益其主事能源儲存、運輸及銷售、和天然氣液化石油氣，已開展注資第一步！公司去年底亦發行1.5億元可換股債券，換股價為0.48元，同華融入股個價差唔多，似圍飛格。發可換股債券落實後，中能股價即刻起跳，由5毫炒上最高0.62元，成交配合。不過現價只較華融同批CB成本價升三成。假設華融要食大茶飯，應該未升夠，或者chok兩chok後，會整固抽上。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20170106/19887548
女神tea time：上帝叫我搽藥油
1 :
GS(14)@2017-01-14 07:53:32葉劉之前話要體驗民生，走去瞓瞓就當係；林鄭宣佈辭職，出奇不意講句，「係上帝叫我參選」。能夠講得出咁反智嘅說話，一係利慾薰心到一個位，連扮有政治智慧嘅能力都冇；唔係就係覺得坐定粒六，扮都廢事。假如呢兩位是但一位當選，相信唔少香港人都會講，不如一槍打死我。近來新股旺場，有個別之前淡市掛牌嘅股份，開始生猛番啲。雅各臣（2633）上年9月，IPO定價1.5元上市。呢隻股曾經潛水多時，但自12月開始起向上行，唔單止重上招股價，月初更突破旗型向上衝，最新報1.82元，比招股價高兩成。雅各臣個名你未必好熟，但佢旗下嘅藥品，你一定細細個就聽過，好似「保濟丸」、「飛鷹活絡油」及「唐太宗活絡油」。上市後積極收購，11月先用1億元收購美達藥廠，呢間藥廠主要於香港從事非專利藥的生產及銷售；再於上月買埋「何濟公」。計計數，兩項收購加埋後，預期雅各臣今年盈利應可增長到2.2億元，按年增長五成，預測PE約15倍。同類藥股一般最少25倍，PE仍平一大截。呢兩日見唔少大行衝入去掃貨，話唔定已成為基金目標。近日股價創新高，可以搽定藥油跟進。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20170113/19895072
女神tea time：幫橙天嘉禾計計數
1 :
GS(14)@2017-02-18 00:50:36港股連續兩日千億成交，市場形勢大好，資金亦一如本欄早前所講，過咗初十五，個市就即時生猛番晒。今日指數繼續炒上，不過見之前升得勁嘅二、三線股略有回吐，但幅度唔多，似係大漲小回格局。可留意嘅有基建股中國機械工程（1829），貪佢市值相對細，加上A股仲炒緊「一帶一路」，要反彈都彈佢先。另外，早前橙天嘉禾（1132）公佈向南海控股（680），以32.9億元人民幣賣走橙天嘉禾影城，雖然股價當日見光死，不過，你睇真啲，其實?家股價大折讓。交易完成後，橙天嘉禾一大筆錢喺手，其中6.8億元將作還債，即係搞掂所有銀行貸款。睇番業績，公司至6月底止手持3.95億元現金，即係加加埋埋有33.05億元Cash，除開每股1.2元，比現價高六成；再加埋出售後資產，每股更加係值約1.31元。再者公司講明當中10億元用作派特別股息，每股折合為0.365元，佔現價近五成。計完數，講吓憧憬，公司講明計劃在出售資產後，將13億元作擴張餘下業務之用，即係有收購概念啦；另外，公司又話如果呢13億用唔着，將會用作派特別息，即係話點計股東都有着數。股價於消息公佈後見光死，但近日守穩0.73元，可買一注博一博。
Fifi
http://fb.com/lovefrystock本欄逢周五刊出
來源:
http://hk.apple.nextmedia.com/financeestate/art/20170217/19930676
Next Page