狀態回勇 連番發炮 胡官諷林鄭 「小心聆聽不如小心講嘢」
1 :
GS(14)@2017-03-22 00:19:50■狀態回勇的胡國興昨連環向林鄭開火，獲不少選委讚好。黎樹雄攝
【3.26特首決戰】【本報訊】上周出席選舉論壇時抱恙的胡國興，昨晚狀態回勇，連番向勝算最高的勁敵林鄭月娥開火，由民生問題到重啟政改，一一瞄準林鄭發炮，例如寸爆林鄭指她與其「小心聆聽」民意，倒不如「小心講嘢」，又質疑林鄭無力營造有利重啟政改的社會氣氛，令林鄭應接不暇。論壇後有提名胡的民主派選委以至提名林鄭的建制派選委，異口同聲讚胡表現佳。記者：呂浩然 陳雪玲
雖然昨晚由選委舉辦的論壇只有選委和公眾提問環節，未有候選人互相質詢，仍無阻胡國興發揮。在首輪選委提問環節上，胡國興留前鬥後，任由林鄭和曾俊華互相借回應提問暗批對手，自己則保留發言時間向林鄭穩守突擊，例如炮轟林鄭的辭職論，並揶揄林鄭未有應邀到天水圍，「佢（林鄭）去可能有第二個佔中出現都唔定」。
指「理財新哲學」僅口號
到第二輪選委提問環節，胡國興發力，先在回應特首梁振英捲UGL案的問題時，質疑林鄭首度披露廉署正在調查，然後在回應增加資源予負責開拓土地的部門時，連環向林鄭開火。當時林鄭表示要為開拓土地的部門增加資源，乘機暗寸曾俊華指，增加資源都要視乎財政司司長的理財哲學，強調自己提倡理財新哲學。胡國興聞言即大力反駁，「呢啲舊哲學、新哲學係喊口號嘅啫，最緊要有用！」即時獲得台下選委掌聲，連曾俊華亦借用胡的說話譏林鄭的理財新哲學「確實係一個口號嚟啫」。之後胡國興未有留手，趁林鄭用盡發言時間繼續狙擊。胡回應社會撕裂問題時指，林鄭在政綱提到會盡最大努力，在人大8.31框架下營造有利推動政改的社會氛圍，他反問「點營造呢？佢一落區已經多人到唔得了圍住佢，我唔知佢點營造到咁嘅氛圍」，質疑按林鄭說法，市民可能要5年以至10年才有機會重啟政改。
選委讚胡官答得最放
針對林鄭不聽民意的弱項，胡官更出重炮狙擊林鄭稱一旦當選會聽民意之說：「林鄭話會小心聆聽，不如話會小心講嘢好啲，如果講完又收番，又話頭先講嗰啲唔對路，如果我喺法庭審訊，證人前言不對後語，你話我點樣對佢吖？」論壇後提名胡國興的衞生服務界選委蘇衍霈形容，胡昨晚表現「好似返番嚟」，能以市民角度質問兩名前高官，而曾俊華及林鄭都回應不到提問，蘇更指林鄭似乎被全場圍攻，發言時予人感覺不虛心，曾俊華則表現平穩，但部份回應完全不到題。法律界選委張達明則指3候選人都有回答其提問，至少可知道他們認同本港內部事務不應被內地駐港機構干預，他指胡國興答得最放，表現較理想。提名了林鄭的飲食界選委黃傑龍則指，胡官昨晚表現好精神；同樣提名了林鄭的進出口界選委許華傑更笑言「好在有胡官」，炒熱氣氛，未提名任何人的民建聯劉國勳則指以娛樂性而言，胡表現最好。
胡國興狙擊林鄭語錄
反駁林鄭否認透露UGL案正在調查「你做咗特首會唔會調查？咁你又唔答問題喎，咁呢啲係唔係語言偽術呢？」嘲笑林鄭強調的理財新哲學「呢啲舊哲學、新哲學係喊口號嘅啫，最緊要有用！」質疑林鄭無力營造推動重啟政改的社會氛圍「點營造呢？佢一落區已經多人到圍住佢，我唔知佢點營造到咁嘅氛圍……佢去可能有第二個佔中出現都唔定。」資料來源：選舉論壇
來源:
http://hk.apple.nextmedia.com/news/art/20170320/19964107
【動畫●大台是旦】馬明亂講「冷靜啲」真心理專家：聆聽最重要
1 :
GS(14)@2017-04-22 10:50:40馬國明在電視劇《心理追兇》對住嬲到想打人咁滯的人講：「冷靜啲！」其實不太合適。
情境題：閣下好嬲好㷫好火滾，已經掃跌枱面所有嘢，忽然有個人走來同你講：「冷靜啲！」你會點？
A.0.38秒冷靜下來
B.扯起更大把火，反問：「我夠想冷靜啦，我真係好嬲呀！」
世上萬千種人，情景當然不只兩種。不過代入其中，我肯定揀B。弔詭嘅係TVB現正播放的電視劇《心理追兇》（Mind Hunter）中，飾演心理學家的馬國明竟然多次對住情緒激動甚至想自殺的人講：「冷靜啲！」我真係冷靜唔到。合該擅長安撫、知道講呢啲唔多見效的「心理學家」竟然咁講，TVB係咪貫徹是是旦旦精神呀？真‧臨床心理學家杜嘉兒點睇呢？「當我哋講『冷靜啲』時，可能會令對方覺得佢自己唔應該激動，但其實情緒係有作用，對方咁嬲也一定有原因。我哋唔希望令對方覺得有呢個情緒係錯。」她認為我哋最緊要係打開耳仔聆聽對方感受，代入對方處境。「你可以反映情緒，講『我留意到你好唔開心、好嬲喎。』但有時未必需要講好多嘢，安靜地聽都得。好多時一個人的感受被認同時，情緒已有舒緩。」馬國明在劇中的角色認真踩界，為了查與女友的死有關之案件，竟然不顧身份，用盡方法迫兇殺案倖存者、懷疑有創傷後壓力症的王君馨回想案件，搞到佢當街崩潰。「為了戲劇效果，相對上激啲、誇張啲我理解，但就同我哋現實工作有出入，我哋做臨床心理學家，須遵守好嚴格嘅專業操守，一旦有利益或角色衝突，我哋都會諗自己係咪仲適合為對方服務。」馬國明有自己目的，想向王君馨套料，又經常主動提出要幫佢，治療佢，完全無視操守夾硬來喎！杜嘉兒補充：「心理學家及受助者是合作關係，我哋會尊重對方意願，佢預備好，我哋又對治療內容有共識先會循序漸進地做。」套劇有神化馬明之嫌，佢好似有透視眼咁，識得睇穿人個心，對人的性格特點、心理狀況好快就能下判斷。杜家兒笑謂：「我都好希望自己係咁。我明白只係劇情需要，套劇某程度上都有做資料搜集嘅。」心理學家有好嚴謹嘅評估程序，必須與對方多次深入面談，再借助問卷等標準化工具，才會接近真實情況多啲。「呢啲一切都做晒，我哋係咪就看透世事呢，都唔一定！」心理學家的工作包括評估及心理治療，心理治療主要提供給情緒或精神有困擾人士。「想找合資格心理學家，可以上我哋香港心理學會臨床心理學組網頁，上面有名冊提供。」她又補充市民有需要也可向醫管局求助。
臨床心理學家杜嘉兒表示心理學家當然都有情緒，但提供服務時必須客觀，可以大膽假設，但必要小心求證。
馬明係咁逼懷疑有創傷後壓力症的王君馨回想案件，令她崩潰，不合心理學家的專業操守。
記者：葉青霞攝影：張志孟2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily緊貼「蘋果VR」熱潮，打開雙眼隨意門，讓「蘋果VR」陪您探索新世界：
https://goo.gl/b5RQAB「蘋果VR」App
App store下載：
https://goo.gl/0kW2cK
Google Play下載：
https://goo.gl/4K7EHw
來源:
http://hk.apple.nextmedia.com/su ... t/20170422/19997680