同契媽向太行街李連杰13歲細女 星二代甜姐兒
1 :
GS(14)@2017-01-12 08:08:26【仙氣美女】■李連杰的13歲細女Jetta日前現身中環行街，長髮披肩的她遺傳了媽咪利智的良好基因。
【中環】國際武打影星李連杰和前亞姐利智婚後十分低調，兩人育有一對掌上明珠，16歲長女Jane於小時候曾為劉德華伴舞，13歲細女Jetta則鮮有曝光。日前甜姐兒Jetta在香港激罕現身，在契媽向太陳嵐陪同下出巡中環，長髮披肩、樣子甜美的她長得亭亭玉立，遺傳媽咪基因擁白滑肌膚，被封為至靚星二代。
武打巨星李連杰於1988年拍電影《龍在天涯》邂逅利智，雖然當年的他已為人夫，惟跟老婆黃秋燕感情出現問題，李連杰背妻跟利智暗交，結果於1991年與元配離婚，1999年在美國洛杉磯娶利智做第二任老婆，婚後育有兩女Jane和Jetta，一家四口十分低調，曾先後定居美國及新加坡，近年舉家移居利智的家鄉上海。李連杰十分保護女兒，鮮有讓她們曝光，有傳為防止女兒出鏡，不准她們參加學校活動，惟日前13歲的Jetta在中環現身，靚爆全場。
【識擺甫士】■Jetta全程由契媽向太（左）及其助手陪着。
【名店血拼】■Jetta和向太在名店濕平完畢，由店員親自送出門口。DV圖片
白滑肌膚似利智
由於李連杰跟向華強夫婦的交情很好，每次李連杰和家人來港，都會居住在向氏夫婦的家裏，他的兩個女兒更叫向太做契媽。日前向太和鮮有曝光的Jetta出巡中環，當時兩人在助手陪同下，坐七人車到置地廣場，着白色熱褲的Jetta騷白滑長腿，遺傳了媽咪的優良基因，樣子甜美可人，雖然只有13歲，但已有5呎3吋高，長髮飄飄充滿仙氣。當時向太落車後掛住傾電話，之後一行三人入到商場時，向太又被廣場中央的巨型聖誕樹吸引，不停用手機影相，Jetta乖乖站在一旁等契媽。其後向太與Jetta入了一間名店，直接行到試身室，似乎是預約了靚衫試穿，她們逗留了約一小時才離去，男店員更親切地搭着向太的膊頭送出門口，見三人手上都沒有購物袋，相信戰利品應該會由專人送上門。向太和Jetta離開商場時，蹺着契女有說有笑，之後由司機接載離去。本報記者日前致電向太問同行美少女是否Jetta？她說：「咁你哋都認得，佢同爸爸嚟咗香港，咁佢爸爸唔方便陪佢行街，所以我咪陪佢行街囉。」問李連杰父女是否仍在她家居住？向太表示他們已離港飛去三亞。
■李連杰的大女Jane（左）及細女Jetta鮮有曝光，多年前他曾罕有帶兩女現身首映。資料圖片
■擁36F導彈的利智有樣貌有身材，是亞姐中的經典。資料圖片
■李連杰的16歲長女Jane去年曾來港出席環保活動。資料圖片
大女為環保演講
至於李連杰的長女Jane現已16歲，熱愛舞蹈的她年紀輕輕已是舞林高手，7歲時曾為劉德華演唱會擔任嘉賓，在台上與華仔大跳拉丁舞，Jetta和爸爸就坐在觀眾席欣賞，之後兩姊妹都甚少曝光，直至去年Jane才又露面，現身香港出席阿里巴巴全球XIN公益大會，年僅16歲的她在台上分享自己從事環保公益的心得。採訪、攝影：黃曉程、鍾國仁
來源:
http://hk.apple.nextmedia.com/entertainment/art/20170112/19893960
圈中星級契媽舒淇有半打契仔女 王菲契趙薇乖女
1 :
GS(14)@2017-01-12 08:08:29上契呢回事，真係好講緣份，唔係話識得嘅就有得契，都要人哋阿媽想契畀你，或者阿「契媽」想契個細路至得。而喺圈中，有唔少藝人都係契媽級，而做得佢哋啲契仔女嘅，當然都有番咁上下。王菲平日寡言嘅天后王菲，私底下其實有好多知心友，好似演而優則導嘅趙薇咁，同王菲勁好姊妹，而趙薇所生嘅囡囡黃新（小四月），更順利成為王菲契女，據知，王菲仲不時會送禮o氹契女開心。劉嘉玲影后劉嘉玲交遊廣闊，同大陸男星胡軍更係老友鬼鬼，胡軍育有一子皓康，嘉玲睇住康康大，加上佢覺得康康好有親切感，於是喺前年設宴正式同康康上契。嘉玲向傳媒表示，自己向來唔係好受小朋友歡迎，但康康就鍾意黐佢同嗲佢，加上佢覺得同康康有種前世今生嘅感覺，於是就上契。舒淇影后舒淇舊年嫁畀馮德倫升呢人妻，但佢仲做女嗰陣已經係契媽級，據佢所講，佢至少有契仔契女各3個，其中包括劉燁同法籍妻子Anais Martane所誕嘅混血BB劉諾一。唔知係咪契仔契女太多，所以好姊妹林熙蕾同林心如生B，佢都冇再上契。
Twins（鍾欣潼、蔡卓妍）娛圈萌B之一、鄭希怡（Yumiko）個女梁子柔（梁浸浸）極得網民及班uncles aunties寵愛，當中最正嘅係佢有Twins做佢契媽，鍾欣潼（阿嬌）同蔡卓妍（Sa）錫到梁浸浸燶，送禮之外，見到契女又抱又錫，恨死好多人㗎！何超蓮、G.E.M.何超蓮同鄧紫棋（G.E.M.）呢對好姊妹，雖然尚未出嫁，但佢哋就已經係另一好姊妹李蘊個寶貝女紫晞嘅契媽，呢兩個契媽仲不時去探小紫晞，母愛氾濫。而李蘊亦曾帶過小紫晞去探身在廣州開工嘅G.E.M.契媽班，當時G.E.M.仲留言話「看到她（小紫晞）就覺得世界很美好」，係咪sweet到爆先？
來源:
http://hk.apple.nextmedia.com/entertainment/art/20170112/19894272