| ||||||
搞咗咁耐，馬雲間阿里巴巴終決定美國上市，咁香港科網股係咪已經炒完？無人知！大家只知喺虛擬國度，真係咩都得。單睇阿里巴巴旗下淘寶網嘅發展，唔講得笑矣；咩都有人放上去賣，不單衣物、精品，原來而家連地皮都有得賣！小宗老友發現喺淘寶一間叫「和順百貨」、專賣雜物嘅小店，竟然放有十幾幅香港地皮售賣，價格由四百幾萬至九千八百萬人民幣不等，睇到人眼都突埋！ 淘寶上嘅貨物簡介，話係位於大埔嘅私人農地，有八萬二千九百呎，可以申請更改土地用途，起倉庫、遊樂場、居屋等等，係潛力地區。譁！連居屋都起得，小宗第一時間聯絡該店掌櫃。掌櫃操濃厚鄉音，話要收過百萬佣金作酬勞，約實去林村睇地，仲千叮萬囑唔好放飛機，點知到當日，佢放咗人飛機。 睇番呢間和順百貨，喺香港有商業登記；開業三年多，網上賣緊百多元嘅奶粉，佢標價五百多元，仲有不知名嘅十字繡，索價幾萬銀，啲價食水幾深。咁，如果小宗真係喺網上過數、成功買地，唔知會點送貨呢？塊地又點運嚟我屋企呢，又？ 職場秘笈做得好過你同事 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。有人問我如何可很快升職，我的答案是：沒有捷徑，但想被燉冬菇的方法，則有很多！在一間大公司工作（假設這公司不存在擦鞋文化或專用皇親國戚），閣下若用心工作做到下列各項，公司一定升你職：1.定下事業軌道首先要知道你的位置，以及你想將來去到的位置。你要怎樣去，要based on subjective ability（能力）and objective reality（現實），定下一個實際上可達到的目標，堅定不移進發。2.要上心要將公司的事當自己事來做，不可馬虎，求其是但！若做得求其，令公司賺少了錢或甚至虧損，公司為何升你？3.不怕蝕底在可能的情況下，儘量多做。我剛進入現在公司時，剛巧另一項目經理辭職，我頂頭上司準備請人，我的椅子還未坐暖，就膽粗粗向上司說：「可否給我試試負責埋這些項目？若做得不好，公司再請人。」我的上司頗懷疑，因他還未知我的工作能力，但也答應給我試試。當時我每天早過上司返工，遲過上司放工，午飯時吃完飯盒，繼續做，星期六、日也做！過了艱難的頭幾個月，工作開始上手，項目亦進行得順利，上司終於放心。其後公司地產愈做愈大，也沒有再請項目經理。若當年怕蝕底，只做分內事，我就失去寶貴的實踐機會（我真的要感謝當時的蔡上司）。4.建立人際關係擴大你對行業的認識，上研討會，和同業聚餐，逐漸你會識更多人，別人也認識你。在同業上慢慢建立起自己的網絡、名聲及信譽。有問題時，很容易請教到別人，很快你會超逾自己同事。5.做Team Leader要突出自己，就要做得好過你的同事。就算工作多困難，也要用高EQ去克服，慢慢其他同事就會佩服你、喜歡你，擁戴你做team leader，但切忌爭功或搶同事的嘢做。做成team leader自然多機會同老闆溝通、見面，讓老闆知道你、賞識你，你就有運行了！ 黃志祥抱外孫派二百 最近信和（83）主席黃志祥嘅愛女生咗BB，黃志祥榮升外公當然高興，旗下公司啲員工一樣有無限憧憬。憧憬啲咩？咪就係派利是囉！想當年四叔李兆基抱孫，恆基職員位位派一萬，就咁派咗一千五百萬元出去。同樣身為五大地產商之一，黃志祥無一萬都派五千啩。小宗八到，結果係：位位派二百，令員工跌曬眼鏡。其實想當年佢娶新抱，都一樣係每個員工獎賞二百元。不過信和市值話曬不及恆基，應使得使，應該嘅！ 彤孫接棒搞珠寶 新世界發展（17）創辦人彤叔，自從中風入院至今，大大話話有一年半時間無見人。記得佢最後一次以主人家身份公開露面，就係當年周大福嘅珠寶展，仲有好友如鄺美雲等捧場。今年呢類嘅珠寶活動，就有乖孫鄭志剛（Adrain）接手。本週六喺君悅酒店舉辦嘅珠寶展，推出嘅系列叫「暹粒‧璀璨光映」，係由鄭志剛親自設計。小宗睇過其中兩條項鏈，一紅一藍。一條叫「韶華之頌」，以二十七卡碧璽製成，佢話靈感來自柬埔寨吳哥窟嘅盤根榕樹；另一條叫「凝靜光粼」，由藍寶石組成，話係表達柬埔寨內湖上嘅高腳屋村落。唔，無去過柬埔寨嘅真係要俾啲想像力。不過，呢個系列只會供會員拍賣競投，知音者自然會以「銀碼」說明一切。 本週廣告 喺五，六十年代，中環寫字樓分租成行成市，但無諗過今時今日，都仲有呢支歌仔唱。最近中環街頭就貼咗呢張街招，德輔道中有二百呎獨立房出租，租金只要六千大元。小宗老友打電話問過，原來係一間會計師樓想分租一間房仔出來，間會計師樓只有五百呎，分咗二百呎出來，剩番一半多啲！公司職員話仲未租出，歡迎參觀！仲話間房丟空已久，唯有物盡其用喎，足見世界難撈也！ 金牙大狀講嘢遲嚇你就知 阿里巴巴捨港就紐，此舉是否明智，一切要由時間嚟定奪。先前李小加話過，香港唔適宜於網開一面，俾持一成股權嘅創辦人把持董事局，因為我哋尚未有高度專門化之分析師去目及實間公司，亦欠夠份量對沖基金可以同個市對敲：以免股價脫離現實。若然如此，除咗學得毛主席話齋，「由他去吧」，仲有乜辦法呢？不過由李小加開列的條件可見，阿里巴巴登陸華爾街大有可能先至係馬雲等創辦人噩夢嘅開始。除咗啲分析師同對沖基金，佢哋分分鐘仲要面對集體訴訟、Sarbanes-Oxley Act之全方位監察、美國稅局唔係人咁品嘅滋擾……等等，掣肘重重，你估會好過癮乎？去華爾街上市帶來嘅麻煩，馬雲點會唔清楚過我哋？但咁都要去，可見對佢嚟講，控制權幾咁重要。凡事有得即有失，會否有朝一日好似佢哋第一趟喺香港上市咁，搞到要除牌呢？李小加話祝福佢哋，難道另有玄機？有啲嘢未試過係冇人知者，睇嚇點？ | ||||||