| ||||||
| 揸住電訊盈科（008）嘅股票，無論係陳年儲落定天價高追，心裏總有N個謎團未解，好似最近私有化「種票」爭議，電盈母公司盈拓擺晒陣話要上訴至終審法院，雖然未知會否獲得接納，但究竟8號仔使唔使孭呢筆巨額訴訟開支，o依家都冇人答到，要「分甘同味」嘅話都唔少嘢。 咁 重大嘅孭數責任懸而未決，電盈小股東大聯盟惟有先發制人，決定搵5名獨立非執行董事履行應有責任，要求唔好再嘥8號仔嘅錢打官司。大聯盟成員陳仲翔好開心 咁同華華講，上月底一口氣增持8號仔40萬股嘅獨董、身兼東亞銀行（023）主席嘅寶哥哥李國寶好好人，火速應承聽朝10點45分立法會例會開會前，喺議 事廳門外接收請願信，又會喺記者面前同小股東傾吓偈，最重要係佢表明願意將聲音帶入電盈董事會。點都好，總算有個希望吖！ 提點咪濕身跣親 今 年70歲嘅寶哥哥仲好細心吩咐秘書話，叫電盈啲公公婆婆小股東嚟中環要小心啲，尤其係呢排大雨滂沱，千祈唔好淋濕身，仲要留神避免跣親；如果天氣唔好，佢 好樂意安排另一個時間再約見收信，真係照顧周到噃。陳仲翔就強調，大聯盟成員一定會出席6月26日嘅股東會，咁到時有乜訴求，就要視乎事情發展嘞。 李華華 | ||||||