歐洲足球員夏季之轉會買賣在九月二日午夜結束，各國球會要買賣球員嘅話，要等到明年一月才有商量。職業球員嘅身價驚人，與歐洲經濟現況嚴重脫節，啲大球會好似識印銀紙咁，出手濶綽驚人，如與歐洲失業率比較，係真真正正「朱門酒肉臭，路有凍死骨」嘅情況。最突出例子就係西班牙，全國失業率超過20%，年青人失業率高達50%，但「皇家馬德里」要買銀河之星、英超熱刺嘅左中場卑路（Gareth Bale），居然出價八千五百三十萬鎊，約等於一億歐元，係歷史上空前天價，而且私人薪酬方面，卑路週薪三十萬鎊咁高，單係佢與C朗兩人，已經拉高咗西班牙嘅堅尼係數！
皇馬買入卑路，賣出德國中場奧蕭（Ozil），收回四千二百四十萬鎊，另外免費放走巴西球星卡卡回AC米蘭，於是在薪水方面，未必有增加到，在一買一賣之間，就淨支出四千二百九十萬鎊，睇嚟會在贊助費及賣球衣所得攞得番，未必係一盤蝕本生意，但在球場上，一個卑路是否真係好過卡卡加奧蕭兩位？左丁山頗有疑問，皇馬擁躉相信亦唔會太樂觀。
一億歐元身價所帶來嘅壓力，足以令任何球員感覺沉重，表現失準。不過卑路呢位24歲年輕人好識講嘢，一到皇馬就話：「球隊波士係Ｃ朗，佢係球會與及世界上最佳球員，我要跟佢學習。」幾識得擦鞋吖，但佢又講到：「加盟皇馬係美夢成真，即使係為咗一分錢，我都恨嚟呢度踢波」，假啲噃，週薪三十萬鎊等於五個英國中產專業人士嘅年薪，點可以同一個penny相比！
講開Bale，左丁山譯作卑路，廣東音與英語音幾接近，本地報紙體育版一概譯作「巴利」，實在莫名其妙，英文單字有bale即「一大包」嘅意思，例如a bale of cotton（一包棉花）；如果查字典就知道發音和卑路相近（可以聽dictionary.com之發音），睇英超聽英文旁述，亦是如此發音，從未聽過讀成ba-le（巴利），年青學生睇英超，不應同時染上亂咁發音嘅習慣！
（按：終於搞清寫錯和黃核數師為畢馬威之「死因」，原來左丁山枱上有一份電能實業中期業績報告，電能之核數師就係畢馬威，日前寫稿時，寫得太快，一時睇錯隔籬，就構成錯誤。） 