📖 ZKIZ Archives

水清無魚 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130723/18344528
老闆Ｆ呻完港資中小經紀嘅苦況，又有機會與佢個界別嘅尊貴立法會議員張華峰見面，尊貴的張議員心廣體胖，有兩個慢必議員咁大嘅身形，有一隻馬「創新高」，上季爆冷一役，左丁山中到正，見到肥張議員，特別開心。
肥張議員又係呻到樹葉落，除咗FATCA，Prada呢啲額外合規成本外，還對夜期、延長交易時間有意見，左丁山笑佢：「你嘅功能組別選民同樣有意見，但你似乎冇法子令陳家強、證監會、港交所改變政策噃，選民會失望，你如何面對？」肥張議員話：「唔好當我冇到呀，我同經民聯一共有七票在手，希望政府會留意！」
七票在手，都要識得在適當時間適當時機運用至得，否則政府會逐個擊破，何況經民聯基本上係建制派，顧慮多多嘅。議員張最近收到不少選民意見，對證監會加強經紀行銷售金融產品規矩，係監管過甚。具體啲講，現時好多經紀行有研究推介，譬如左丁山手機就收到某經紀行推介某幾隻股票，推介之後，通常有經紀打電話嚟促銷，希望有生意做，當然推介嘅就係港交所上市嘅股票。但以後經紀要考慮及客戶嘅「適合性」是否可以承受買入推介股票後嘅股價下跌風險及冒險能力（能否承受虧損），肥張議員講：「咁即係叫所有經紀收聲，唔好主動打電話俾客戶推介股票，要守株待兔，等客戶打電話嚟啫。在淡靜交易時間，經紀唔打電話搵客戶講股票，坐在公司打遊戲機呀？點賺佣金呀？」
買賣上市股票，自不然有虧損風險，冇話實賺嘅，但自雷曼迷債事件後，客戶有輸打贏要傾向，立法會與傳媒傾向同情輸錢客戶，追打金融機構，故此一啲規管趨向矯枉必須過正，趕走咗好多大戶生意，流失咗俾新加坡，香港越係趕客，新加坡越係偷笑！前幾晚左丁山參加一個飯局，有機會與前監管人員交流，佢話監管機構必須考慮兩個問題：（一）What is the regulatory objective；（二）What is the regulatory cost。監管大前提永遠話係保護投資者，但保護條款越多，合規成本越高，太高嘅話就會扼殺創意與生意，活水變成死水，大家都沒飯吃。佢慨嘆咁講，議員俾好多壓力，立法會變成半個監管機構，故此法規漸多，形勢如此，可能係政治造成！
PermaLink: https://articles.zkiz.com/?id=69638
Next Page
ZKIZ Archives @ 2019