ZKIZ Archives


人生評論員 人在中環

http://manincentral.blogspot.hk/2013/05/blog-post_27.html
早陣子在免費報嘅專欄寫過,CK有幾個朋友都選擇響今年離開香港,「回流」返外國生活。早幾日,跟其中一個準備回流既朋友食晚飯「餞行」。

飯局裡面,大家自然會提到:「點解呢位朋友會咁大決心離開香港」呢個話題。朋友既答案亦都非常「正路」的:例如對香港既政治環境冇信心、國民教育既陰影始終揮之不去、生活質素低落、工作時間跟回報不成正比…諸如此類。呢啲原因,我覺得即使佢唔講,其實大家都估得到。不過有一個相對minor嘅原因,我覺得幾「特別」,亦值得稍稍細味一下。

話說朋友同佢太太兩年前生咗第二個小朋友。朋友既太太,希望可以放多一啲時間同小朋友相處,於是乎,決定放棄工作,做一個全職媽咪。當然,佢地有呢個決定,朋友同佢太太當然係「計過條數」,即使太太唔做嘢,生活既開支都依然可以應付得到。佢地勢估唔到,佢太太既呢個決定,會惹嚟周圍咁多三姑六婆與及多口朋友既「批評」的。

當然,三姑六婆有興趣批評佢地呢個決定,也有一些「原因」的。事關呢位朋友既太太,係一位事務律師,相比佢既工程師老公,搵錢能力仲稍為高一啲。三姑六婆既講法係:「邊有人明明可以搵咁多錢,偏偏唔去搵,走去做家庭主婦架!」,更加難聽一啲既講法係:「湊仔之嘛,請個菲傭咪搞掂囉。邊有人咁蠢好似佢兩公婆咁架!就算係唔做嘢留響屋企湊仔,應該唔做嘢果個都係個老公啦,個老公搵得少過個老婆咁多!」

朋友兩公婆,讀書多,修養亦都好。不過三姑六婆響身邊聲氣多多,聽在耳裡當然唔會好高興。最初佢地都盡量唔去理呢啲麻煩人既閒言閒語,反正佢地認為:「我自己既生活,只需要向我地自己負責架遮,你理得我丫?」不過閒言閒語既可怕之處係,即使佢動搖唔到你本人,但係佢地卻有可能動搖到你身邊,一啲你會重視既人。當呢個情況出現既時候,局面就變得好難收拾。

朋友既case,就正正係動搖到,朋友既外父外母。最初朋友既太太話做全職媽咪既時候,外父外母起初都冇乜反對既。反正有兩個孫女陪佢地玩,佢地不知幾樂在其中添。不過身邊既三姑六婆,廢話越講越多,而且越講越「人生攻擊」,朋友既外父外母,久而久之對朋友同佢太太既決定,亦越嚟越唔認同,仲不時催個女,要快啲出返去搵番份工,不然就浪費咗兩老多年嚟供書教學既投資同心血芸芸。

三姑六婆響耳邊講廢話,你還可以忍受。但搞到自己阿爸阿媽外父外母都被影響,從而加入埋「三姑六婆」既大軍當中,當中既感受,就截然不同了。

朋友感慨:「我唔明,香港地點解咁多無聊人,食飽飯冇嘢做,鍾意去評論人哋既人生嘅呢?我地邊個出去做嘢,邊個留響屋企湊仔,其實關佢地咩事?我哋又唔係因為呢個決定,會搞到唔夠錢駛,就算真係唔夠駛,我地又唔係去問佢借,佢地咁多聲氣做乜?」

咁多聲氣,係要證明,佢地自己「識諗」過你。不論關唔關佢事都好,佢地透過「踩你幾腳」而獲得「快感」。香港地,係有好多好麻煩既「人生評論員」,全職負責評論一啲同自己全無關係既人生的。

亦因為響香港地呢亭「評論員」實在太多,勢力太過龐大,年輕人響選擇自己既路既時候,少不免都會被呢班「評論員」左右。大家都多少害怕被呢班「評論員」睇中,成為批評既對像,於是唯有都盡量去選擇啲大路嘢跟住去做。

早陣子,追夢既故事成為全城焦點。響香港地追夢之所以困難,財政理由故然係其中主因,但更大既理由,我覺得係這類「人生評論員」,響呢個城市之內既密度同數量,實在高得太驚人。年輕人要抵受得住這種壓力,去選擇自己想走既路,談何容易。

朋友提到呢件事既時候,有一句說話,讓我感受好深的:「CK,我地都係人地既阿爸阿媽。可以既話,我梗係希望可以俾到一個環境啲仔女,可以有利佢地,去做自己想做既事。香港,真係一個咁既地方嗎?」

我唔知,也許到我囝囝囡囡長大既時候,可能佢會變成一個咁既地方都唔定。不過呢一刻,我還是幾認同朋友既睇法的。
人生 評論員 評論 人在 中環
PermaLink: https://articles.zkiz.com/?id=56101

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019