到陸羽飲茶，又見餐廳R帶兩位老友嚟，好似去年見過面嘅噃，一問之下，果然係。三月二十二日至二十四日係七人欖球賽之期，兩位美國客自三藩市飛嚟睇波，就好似餐廳R較早前飛去曼徹斯特睇曼聯對皇馬一樣，當然係高級遊客啦，梁振英歡迎唯恐不及，唔敢話：「對於接待七人欖球賽外來遊客，香港要檢視承接力問題！」洋人噃，一位住在金鐘Upper House，問佢房租若干，佢話：「不消提，唔包早餐㖭！」住得起Upper House，駛乜酒店包早餐吖，另一位知慳識儉，住在時代廣場側之Holiday Inn Express，佢話房間細小，但自己成日出街睇波蒲吧行街，晚上返去瞓覺啫，間房大都冇用。兩位美國老友，同來香港睇波，對住酒店之態度迥異，人之不同，各如其臉焉。
問佢地美國經濟，兩位都話有復甦跡象，住在「高等房」嘅朋友當然係有錢人，佢話高盛不久前籌集私募基金，專買美國房屋銀主盤，佢自己都有落注。高盛呢個基金猛咁掃入銀主盤，但美國最大嘅房屋業主係黑石（Blackstone），在兩大買家入貨之下，不少對沖基金開始跟風，故此最近居然出現新房屋有供不應求嘅現象，真正個人用家買唔到屋，高盛、黑石當然係趁低吸納啫，買入之後，全部收租，幾年後等地產市道真正回復舊觀，就會悉數出售，賺一鋪勁嘅！呢位老友話：「無論奧巴馬講乜，啲one-percenter（最高1%之人）永遠贏晒！」
餐廳R之故鄉市政府已經宣佈破產，仍無復甦跡象，佢話好歡迎黑石、高盛到佢鄉下掃貨。但餐廳R目前之憂慮，不在故鄉，而是在灣仔海景大廈，由華潤擁有之海景大廈平台商場（以前叫做三里屯），嗰度有不少餐廳，在平台有室外座位，中午黃昏時分人客甚多，所有餐廳生意都唔錯，過往十年一向如此，近來更好，但食環署突然最近發出清拆令，不准餐廳在平台放座椅，變相要餐廳收檔啫！餐廳R向華潤租咗一個單位，現在頭都大晒，要向張宇人議員投訴食環署及要求華潤減租。准擺設室外設座椅乃梁錦松在2003年之救市好計，不過事過境遷，梁振英高永文過橋抽板，不足為奇吖！ 