ZKIZ Archives


無薪假期 左丁山

2008-12-28 AppleDaily小 YY參加同學婚禮,女同學嫁男同學,成班青年人自然玩到癲,女同學係會計師,男同學係IT人,大學畢業已有九年,勤力積蓄之下,變成有力消費人士,捨得使錢,婚禮自然好似樣。點知結婚前夕,新娘籌備婚禮之際,畀會計師行急call幾次,叫佢務必返公司開會,於是匆匆忙忙趕回中環總部,見到公司好多人面色凝重。然後準新娘被召入房間,公司話佢可以放假一個月,但無薪水,準新娘唯有笑笑笑,當有多啲時間度蜜月可也。次日婚禮如常舉行,大家高興異常。專業證婚律師同司儀講:「唔好講婚宴呢兩個字,婚宴婚宴,聲音似分飛燕,唔好意頭,千祈咪制。」證婚律師大概見得婚禮場面多,吸收咗「婚宴」經驗,故有此言,小YY 話又學到嘢。今天之年青人都幾辛苦,讀書成為會計師、電腦專家已不容易,搵到份工,勤奮工作九年先至結婚,更不容易,點知公司贈送嘅結婚禮物就係一個月無薪假期,實在令人啼笑皆非。好彩新郎新娘有積蓄啫,否則咪要押後結婚?想當年,左丁山結婚後租一間屋住,已不名一文,唯一資產就係無限信心,覺得自己入咗銀行,泊到大碼頭,前途無可限量,明天一定更好。假若當時結咗婚就要放假一個月,冇糧出,都唔知點算好。今日香港青年男女結婚比較遲,生育率比較低,的確有其內在理由。經濟不景,生意不前,訂單不來,不一定是公司之錯,會計師行與電腦公司係純服務行業,經濟大勢唔好,呢類公司一定唔好,故新娘亦理解到僱主叫佢放長假,係逼於無奈而已,自己唯有接受。肥仔K在日本住宿舍時,認識一位新住客,就係去年自高盛辭職而申請得到日本文部省獎學金去日本讀書嘅香港仔,當時有同學認為,呢位新人既已在高盛工作幾年,花紅之多,令年青人眼紅,又可以放棄一切,東渡日本,真高人也。哈,點知今年就發生金融海嘯,高盛竟然會虧本,高層被迫放棄花紅。肥仔K等如今就覺得呢位校友醒目到極,知道何時跳船,攞埋日本獎學金在日本避風(或者係純屬巧合都唔定)。風暴一至,肥仔K都領略到世事無常,佢地以後仲會唔會take a long view(睇長啲)呢?
PermaLink: https://articles.zkiz.com/?id=4884

Next Page

ZKIZ Archives @ 2019