ZKIZ Archives

實習孟加拉 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130125/18145299
左丁山家族第三代有一位中大畢業生，去完夏威夷受訓回來，即去孟加拉做見習生（intern）。孟加拉？左丁山以為聽錯咗，香港啲大學生如有機會到紐約三藩市倫敦巴黎呢啲地方，就爭住申請啫，去孟加拉喎，學習啲乜嘢呀？親戚話孟加拉有一間世界著名，出咗一個諾貝爾和平獎得獎者嘅微型融資銀行，每年吸引到世界各地青年學生慕名前往實習，無薪水，自付所有費用，間銀行有賺冇蝕，實習生都有回報嘅，就係學習呢間世界上最著名嘅微型融資銀行嘅運作制度，返回本國，到農村推行，裨益農民。
但香港冇呢樣「社會企業」嘅啫，只有香港按揭公司去年推出微型融資，有啲類似，但服務多過賺錢，親戚三個月後返到嚟，恐怕應用不著。之不過，到孟加拉首都迪卡居住三個月，領略下第三世界人煙最稠密城市嘅日常生活，可以豐富人生經驗，一生有益。親戚過往四個月住在檀香山，離開學校就可以到沙灘曬陽光，享受清新空氣，對住太平洋欣賞海景，生活美好到極，而迪卡空氣極污染，每年風季引致傷亡慘重，月前嘅製衣廠大火令人震驚，與夏威夷相比，有啲似天堂對地獄，到咗迪卡，心理上須要調整一下。
大家都未去過孟加拉，不知孟加拉實際情況如何，反而大學生安慰眾人：「我在夏威夷訓練班有幾位印度、巴基斯坦、孟加拉同學，佢地全部話迪卡只有衞生問題，無治安問題，可能喺巴黎更易俾賊人打劫，你地唔使驚喎！」那麼居住地方如何？呢間銀行好醒目，自己開咗一間三星酒店，安排所有實習生入住，每日收房租十九美元，唔駛出糧俾實習生兼有租金可收，認真經營有術。既然講到衞生有問題，當然係去私家醫生診所打預防針先啦，醫生話：「最好就係去政府醫務所，針藥費最平，服務又快！」後來聽一位去過幾次新德里公幹嘅朋友講，到印巴孟，打針雖可防大病，但日常飲水最易中招，飲可樂加冰就令佢屙咗兩日，可講話防不勝防，有外來人小心到用樽裝水刷牙，點知沖涼時花灑射中個口，吞咗落肚，又會屙喎！