📖 ZKIZ Archives

存在價值與價值 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130113/18131772
爽報一月八日大版報導「涼班子撐劏房」，指運房局副局長邱誠武在立法會稱：「劏房有存在價值」，並引梁國雄議員語錄：「棺材夠有存在價值啦，死人瞓㗎嘛，你要唔要吖？」林大輝議員：「你既然認為劏房有存在價值，有冇更多優惠同鼓勵政策，鼓勵有更多劏房？」梁耀忠議員：「你認為劏房有存在價值……」
從以上語錄可見，邱誠武講嘅係「劏房有存在價值」，但落在陳婉嫻議員手上，就變成「劏房有價值」，陳議員在一月十日am730專欄以「劏房有價值？」為題，狠狠教訓邱誠武，其中有講到：「我亦曾經去過市區劏房瞭解，其中一個住在深水埗的個案，四口家庭擠在百多呎的板間房內，輪候了六年仍未能上樓。去年這個劏房要四千元月租，今年不知升幅如何……局長，難道這就是劏房的價值？」
「劏房有存在價值」與「劏房有價值」，係兩個不同概念，陳婉嫻議員應該聽錯，寫錯咗，故意借題發揮，大駡邱誠武而已。目前香港在特定收入水平限制下，仍然有二十幾萬人輪候公屋，佢地未輪到上樓之前，請問佢地如果唔係租樓住，租房住，可以住去邊？劏房係一個居住選項，故此邱誠武副局長話「劏房有存在價值」，係按照實情講說話。如果講「劏房有價值」，應該係業主講嘅，正是因為有大量居民（一）唔夠錢買樓；（二）唔夠錢租單一嘅四五百呎住宅；（三）收入超出申請公屋最高水平；或（四）輪候公屋途中，仍然要搵有瓦遮頭，故此有人投資經營劏房或做二房東承包劏房，市場有需求，於是供應應運而生，呢類劏房投資者/營運者會講：「劏房有價值。」假若梁振英政府有能力在五年任期內供應十五萬個公屋單位，而人口不會大升嘅話，劏房租金必然大跌，因屆時「劏房已無存在價值」，道理好容易明白嘅啫，鬧邱誠武班議員只係為鬧而鬧，將現實與道德空想糾纏在一起，佢地又能提出甚麼辦法來？目前主要問題在於（一）公屋數量不足；（二）大部份輪候人士希望住在市區公屋，市區去邊度搵到大地皮嚟興建公屋，九龍市區在哪裡有地皮可興建高密度公屋以儘量滿足需求呀？即使搵到，區議會都會同政府死過，以一百種理由阻撓興建啦，呢個係死結嚟嘅。
PermaLink: https://articles.zkiz.com/?id=42664
Next Page
ZKIZ Archives @ 2019