ZKIZ Archives


韓式教育 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121101/18053554
在商務印書館115年雅聚上,遇上不少教授博士作家。與教授S講起,香港嘅大學近年招收境外學生,雖然主要係內地生,但來自其他國家嘅學生逐年增加,歐洲學生來了不少,韓國學生亦多。係噃,前日講IHT之2012 Global Employability Survey,IHT係特別引用一個德國學生就讀香港科技大學嘅例子,話呢位學生之選擇科大,係為咗容易搵工之故,事實上佢一畢業返到德國,就搵到職位。經IHT(歐洲、亞洲同步發行)一講,以後可能有更多學生申請入讀科技大學都唔定。
既然海外學生多咗,教授S在班上討論全球化與本地內涵,隨手一指,請咗一位來自首爾之南韓學生發言。南韓人與日本人一樣,過去以不擅講英語著名,但根據最新之「EF英語能力指標2012」,亞洲地區之中,英語能力排名以新加坡第一,馬來西亞第二,印度第三,巴基斯坦第四,韓國第五,日本第六,香港只係排第七,而且得分分數係唯一下跌嘅亞洲國家/地區,香港人仲敢睇小日本韓國生嘅英語能力?
果然,教授S話南韓學生一出聲,全標準美國口音,發言異常流利,教授S十分驚奇,立即問佢:「你在韓國讀英語學校還是傳統中學?」學生答案令教授S印象深刻,學生答:「我讀一間韓國傳統中學,校規甚嚴,有典禮時,我地要穿著傳統衣服,例如你地睇韓劇大長今裡面男士女士嗰款,要讀韓國史,尊師重道,老師鬧我地不留情面,總之非常傳統,但學校有一個罰則,校內我地不准講韓語!一定要講英語,講一句韓語要罰五韓圜!」教授S聽完,只能講一句「韓學為體,西學為用」,呢間中學就係培養思想禮教十分傳統之講英語韓國學生!左丁山話呢種教學法只能在韓國實施,香港一定唔掂(我地勝在思想、言論自由,講乜做乜都有人反對),但係如果韓國學生慣咗用英語思維,談話,就未必係傳統韓國人咯喎,KAL(韓國航空)好多年前時有空難,安全成疑,後來請咗外國顧問研究安全措施,顧問一條橋就搞掂曬,就係機師只准講英文!(見Malcolm Gladwell Outliers一書),機師講英文之後,神奇地,KAL意外率急劇下降,成為安全航空。
PermaLink: https://articles.zkiz.com/?id=39483

Next Page

ZKIZ Archives @ 2019