ZKIZ Archives


人情味 PARTIPRAL 派得好

http://partipral-hk.blogspot.hk/2012/09/blog-post_25.html
租金飛漲, 最低工資再度挾升上$30, 可以百份百肯定未來本地餐飲業只會愈來愈難做. 已經不止一次寫過, 最低工資必定唔會搞死大家樂, 大快活, 美心等等連鎖快餐店, 要死要執都必然係你樓下間茶記, 飛馬鬥皇馬, 根本差幾個級數.

今時今日大家仲肯幫襯樓下茶記, 唔係因為佢比連鎖快餐店特別平, 而係因為樓下茶記, 未入到門口已經有伙記同你打招呼; 你食食下早餐打個乞嚏, 茶記呀姐都會遞張紙巾過黎俾你. 相反連鎖快餐店掃地呀嬸就算每日見到你, 都唔會記得你係邊個; 就算每日幫襯, 收銀個妹妹都唔會記得你鍾意食乜. 今時今日大家仲肯幫襯樓下茶記, 就係食呢份人情味.

好可惜既係香港地人情味唔可以當銀紙咁洗, 唔可以當租咁交, 更唔可以當糧咁出. 早幾日生果報樓民講場一篇投稿,"做老闆勞心勞力之餘, 仲搵得少過打份牛工, 咁點解仲要搏" 相信講出左好多茶記老闆既心底話. 以目前情況發展黎睇, 香港地做茶記只會係死路一條. 相信十年後香港地已經唔會再有所謂既港式茶餐廳. 就算有, 都只會係翠華, 味皇, 廣東燒味等等連鎖扮懷舊之流.

大快活為慶祝成立40週年, 今個星期一至五以懷舊價$4推出4,300個飯盒; 並且由下月初開始, 為期半年, 每日以$4-$10價錢向聖雅各福群會售賣600個飯盒, 幫助區內長者, 露宿者等低收入人士. 姑勿論集團今次推出懷舊飯盒出發點是否純粹想搞綽頭順手宣傳, 的確蝕賣數萬個飯盒, 對社會幫助並非太大. 但莫以善少而不為, 大快活今次毫無疑問係做緊一件好事, 而公司品牌價值, 客戶忠誠度正係靠呢一件件小事點點滴滴累積返黎, 並無捷徑可走.

雖然茶記逐漸式微, 將來大家行出街見到既只會係一個又一個既連鎖餐店, 但對我地黎講有分別既仍然都只係一點情. 公司如何運用"人情味" 呢張皇牌,將會直接影響品牌競爭力. 今日大快活借40週年為名大打人情牌, 呢一仗的確贏得精彩漂亮; 而作為股東, 市民, 我亦希望呢種仗, 將來會陸續有來.
PermaLink: https://articles.zkiz.com/?id=38036

Next Page

ZKIZ Archives @ 2019