Hea富生活 ：股市樓市陰謀論
1 :
GS(14)@2017-08-17 08:04:08城中熱話，自然是民主黨成員大脾釘十字架事件，究竟閉路電視中的口罩男是否當事人，警方還未講實，又何解「受害人」會唔拆釘就去見記者，大家有很多問號，但政治事件，公眾到最後都未必知道真相的全部，資訊來源只可靠傳媒，而傳媒又各有立場，間接或直接偏袒某一方，不甘被迷惑的受眾，只好相信自己的邏輯分析，所以近年我發覺「陰謀論」非常盛行。你有否發現，不少人評論政治、財經，甚至娛樂事件時，最後總結都是這句：「阿邊個梗係收咗錢做嘢，就算冇收，都梗有着數嘅！」言之鑿鑿，我對這類說法嗤之以鼻，因為但凡陰謀論者都有一個共通點，永遠從「利益」方面去猜測他人動機，雖然事實上有不少「收錢做嘢」之徒，但我不相信，亦不願相信世界上沒有真正以自己理念出發的人。說回投資世界，「財演」這常用名詞，就正正指出評論財經的人有「演出」成分，阿仔：「阿媽，個壞人咁衰嘅，親人都害。」阿媽：「傻仔嚟嘅，人哋做戲之嘛，唔使咁認真。」那財演評論或大力推介某一特定投資項目，究竟應不應該相信呢？事關信錯人買中老千股或老千盤，就不只俾人話傻仔咁簡單，小則損手爛腳，大則傾家蕩產。阿媽，我實在好亂呀！
不要盡信「專家」
年輕時也試過貪方便信專家貼士，心諗人家做足功課諗好晒策略，何況專家為保名聲，應該唔會點條黑路我行啩？好彩成績輸多贏少，否則以我的Hea格，有甜頭自會放軟手腳，也不會開始鑽研。相信讀者知道我有買開日本樓，早前獲邀於電視節目分享經驗，同場嘉賓全面看好日本樓市，認為會出現歷時幾十年的大牛市，我則保守看好，不會覺得「唔買就笨」，論租金回報，美國樓都有十厘以上，雙方看法有正有反，算有少少火花。其實這種討論最好，你話日本起賭場，可參照澳門樓價升幅十倍以上，故時機來了；我就提出日本面對低出生率，高空置率，以及日圓貶值貨幣政策能否持續問題等因素，也會影響樓價。觀眾可從中採納意見，加以判斷，任何投資都不會只有好的一面，提出操作上的「陷阱位」來提高投資者的警覺性，減低損失機會，才是我的目的。我從不會強烈推介某一個特定投資項目，讀者應該有獨立思考，不應完全相信「專家」。
郭釗
http://www.fb.com/heaology.edu本欄逢周四刊出
來源:
http://hk.apple.nextmedia.com/financeestate/art/20170817/20124063