被爆吸大麻受查T.O.P親筆信道歉：冇任何辯解嘅餘地
1 :
GS(14)@2017-06-10 12:23:00韓國天團BIGBANG嘅29歲成員T.O.P日前被爆吸食大麻而被警方調查，前日餘下4位成員喺日本開騷時，身為隊長嘅G-DRAGON就代T.O.P道歉，而T.O.P喺吸大麻事件爆光後，昨日首度透過所屬嘅YG事務所官方網站上載手寫信，就事件道歉。
T.O.P寫道：「首先最想對因為我今次犯下嘅巨大錯誤而對我失望嘅所有人，表達真摰嘅歉意。如果要我親自企喺大家面前道歉嘅話，我非常羞愧。我唔會有任何嘅辯解，真係非常後悔亦非常恐慌。」續指：「因為今次嘅事，對我組合嘅成員、所屬事務所以及大眾，仲有愛我嘅粉絲及我嘅家人都帶嚟無法挽回嘅傷害，所以無論受到點樣嘅責罰我都會接受。」
T.O.P又表示對自己都感到失望、感到慚愧，正真心地進行反省及懺悔，又承諾唔會再犯下呢種不負責任嘅錯誤。另外，有指T.O.P大前日返回服役嘅首爾江南警署後就冇再外出，一直於警署內，甚至冇去飯堂食飯，反而被目睹杯麵當飯食。而T.O.P嘅義警隊員就透露，T.O.P呢幾日跟平時嘅服役生活一樣，睇書、洗衫、跟其他人傾計，不過就被禁止外出活動。
來源:
http://hk.apple.nextmedia.com/entertainment/art/20170605/20045097