智取大市：每個板塊煲起一隻股
1 :
GS(14)@2017-05-18 02:06:02手機設備股俾沽空機構嚇一嚇之後，燃氣股又急插，資金流入其他板塊嘅話，又唔見得有乜爆升板塊選擇，內銀股轉強，港鐵（066）亦升，但同科網股相比，波幅已經差距好大。由於科網股喺港股市場當中，完全搵唔到替代品，相信沽空報告觸發嘅避險潮，只會短暫，風險胃納提升之下，始終都係要買返科網。除科網外，其他每個板塊基本只炒一隻股，內房碧桂園（2007）最強，油服股得巨濤（3303）炒得起，家電股只有海信科龍（921），基本因素好壞有一定關係，但每個Sector只煲起一隻股，趨勢不可不留意。海信科龍以前係龍尾家電股，買海爾（1169）、買創維（751）都唔輪到佢，不過，近期令小弟最深印象，係去到太古嗰間Aeon睇一睇電視機，發現海信嘅電視機陳列品佔國產電視機貨架絕大部份，創維都行開一邊。今時今日，海信嘅品牌唔差，雖然上市公司係賣白色家電，但相信一樣有品牌效應。海信科龍今年首季收入升33.7%，純利升78%，每股盈利19分，年度化13、14倍PE，股價由舊年2月至今升咗近4倍，但品牌效應對業績正面影響往往玩到三幾年，對於啱啱做得起嘅品牌嚟講，業績點都未見盡，近期股價喺10蚊有強大支持，值得考慮吸納。晉佳
http://fb.com/advanceguy1
來源:
http://hk.apple.nextmedia.com/financeestate/art/20170516/20022410