📖 ZKIZ Archives

環保就是錢 左丁山

http://hk.apple.nextmedia.com/template/apple_sub/art_main.php?&iss_id=20120422&sec_id=12187389&art_id=16270158&cat_id=255&coln_id=22
「爽報」林文宗（四月二十日）慨嘆「梁特首」在雙非問題上，迎合民粹，打殘法治，令佢抑鬱。唔好呀，「梁特首」可能在任十年，咁快就因佢而抑鬱，豈非要移民瓦魯阿圖，最弊嗰度冇馬場嘅呢！
梁 先生競選時講句唔贊成興建焚化爐，產生極大效果，令環保局之興建焚化爐撥款申請俾立法會打回頭，以前反對嘅人仍然反對，以前贊成嘅建制派議員就全部做咗詹 培忠所講之「柳樹下傀儡」，撤回支持，跣到邱騰華四腳朝天。以前左丁山認為邱騰華係及格局長，只係夠勤力啫，料不到佢竟然不跪低接旨，又唔迎風起舞，居然 夠膽為焚化爐力砌到最後一分鐘，對「南華早報」講：「怎麼要為候任特首一句說話而再等下去？」（四月二十日），咦，好打得喎，左丁山對佢為之另眼相看，這 年頭，能為自己做事原則堅持到底嘅人，少之又少，邱騰華竟然係其中一個，可以一讚，只不過，公然與候任特首講「不同理念」，佢點會仲有官運呀？
環 保上至百五億元興建焚化爐，下至六蚊買張報紙，都與市民有關，譬如左丁山每星期要丟掉近二、三十斤報紙（否則要冒上與太太頂嘴之風險），將報紙放在大廈十 八樓 C座（是但寫個地點就算）垃圾桶就算，原來大廈管理得好有效率，差不多一小時後左丁山再出去丟垃圾，報紙已經唔見曬，清潔阿嬸真係抵讚。與住在沙田第一城 一位老友講起，佢哼一聲：「你都唔知廢紙有價，外傭與阿嬸爭報紙㗎，我嗰座嘅清潔阿嬸呢輪黑口黑面，好唔爽，問佢點解唔笑一笑，佢話好激氣，冇咗下欄 喎！」講清楚啲，就係以前各戶人家丟報紙，阿嬸執曬去賣俾回收站，舊報紙就係下欄錢，幫補月薪，點知第一城管理處話推動環保，唔知俾乜人設立舊報紙回收 站，送報紙到回收站嘅可以獲贈一瓶蒸餾水，第一城城民覺得既環保，又有水，何樂而不為，於是不少報紙去曬回收站，令阿嬸全無得益，唔怪得阿嬸非常唔爽！ 咦，呢啲環保回收店又會將啲舊報紙點樣處理？恐怕又係拎去賣啩！實在係有組織性地與阿嬸爭利，好心留番啲下欄俾需要錢嘅人啦！
PermaLink: https://articles.zkiz.com/?id=33008
Next Page
ZKIZ Archives @ 2019