ZKIZ Archives


細奀時代:炒股要跟中資鬥癲

1 : GS(14)@2017-03-22 00:45:59

所謂狹路相逢勇者勝,以香港人審慎的性格,北水南下的最終結果,只會是港資在資產市場中被嚴重邊緣化。中資搶地不計成本,賣樓又未建立品牌,條數一定計唔掂,但是否有錢賺只是其次。中資的算盤是走資,不介意付出高成本,為求摸熟香港市場運作的關鍵,逐漸建立品牌。而港資手上項目賣完一個少一個,只會逐漸被逼轉型成為收租佬。在股票市場,中資出手亦凶狠得多,炒高幾倍,再急插三成,升到你唔信,然後貪心一跟又中伏。上落幅度之大,炒慣幾格牛熊證的香港人怎樣會接受得到。至於香港傳統的細價股,莊家寒酸,又無故仔講,慢慢就會被人嫌棄唔夠刺激,流失投機客。目前情況繼續落去,義無反顧的龍頭股會太貴,炒極唔起的衰股無謂買,波動太勁的概念股唔夠膽入市,於是香港股市投資者,處境就會和現時的地產商一樣,有無從入手的問題,惟有穩穩陣陣揸cash等股災。


唔夠膽賭被邊緣化

問題是國內投資者的取態,假如似海航般勇猛,股災出現的機會率便不高。不妨看一看A股市場,一早圍威喂,自己友揸晒,雖然是無力炒上,卻可以像殭屍一樣維持在極度偏貴的水平。相比之下,港股估值至少較低,一旦完成轉莊,由國內人打骰,守住目前水平甚至再高一兩成,其實並非太難。如果只想穩穩陣陣,最終結果一定慢慢沽貨最後成手cash,再尋不到機會入場,無論如何,應該要保持一個貨底,以免一旦真的出現中資話事,大時代2.0的時候後悔莫及無得追,何況就算衰極看來也有個譜。炒股票的態度亦應該改變,計到數好似好抵的香港中小型股可免則免,太過細根本不合中資口味,要炒便要和中資鬥癲,波幅大就惟有炒細啲,又或者走位密啲,當然唔容易贏,但至少會有得炒。太多人是百彈齋主,嫌升得慢,嫌波幅大,嫌唔夠平,如果樣樣合心意,唯一可能是市場當時太驚又或者股票本身有伏。由於今時今日已經好難會太驚,平嘢多數有問題。既然明知中資勢凶夾狠殺到香港,又何妨殺出去博過。唔夠膽賭,就注定被邊緣化。如果想增加勝算,不妨多加研究2015之前的A股走勢,當年未曾大升之前,情況和現時港股差不多,應該有助了解他們的套路。阿飛本欄逢周二刊出




來源: http://hk.apple.nextmedia.com/financeestate/art/20170321/19964633
PermaLink: https://articles.zkiz.com/?id=328171

Next Page

ZKIZ Archives @ 2019