ZKIZ Archives


每年買一物業 70後MK仔分享《Hea富學》

1 : GS(14)@2017-02-05 10:47:08

■郭釗將異於常人的經驗寫成書,稱此書適合「想為將來打算,或者受過社會折磨嘅人睇」。



【本報訊】窮家子、中七畢業、科科肥佬……典型廢青?郭釗(Steven)自有一套理財哲學,打工儲首期、每年買一層樓,至今夫婦名下有超過20間香港、海外物業,每日只工作兩小時,每個月去旅行,他將自己經驗命名為《Hea富學》,但講到明適合被社會折磨過的人讀,未摸索到自己路向的年輕人,若果想靠自己致富,還請大家繼續努力。郭釗自稱是70後的MK仔,小三那年父親不幸中風,只剩母親支撐家庭。從小與書無緣,中七之後理所當然地打工養家。推銷過A4紙、再轉行至建材業,適逢得老闆傾囊相授行內竅門,郭釗努力學、努力做,但老闆開始有私心,扣起他的佣金。郭釗以為自己學滿師,公司生意又大多靠他跑回來,毅然自立門戶當老闆,豈料是現實摑醒他的第一巴掌。打工與做生意又怎能混為一談?兼顧銷售、管理、入貨、甚至收貨款都是難題,性格難以與人合夥,唯有事事親力親為,「朝早七八點已經有人打嚟,要你解決問題。到夜晚八九點電話都未停。」勤勤力力賺到笑,但賠上的是健康,偏頭痛、失眠、肩膊痛纏繞至今。「寧願搵少啲,身體好啲,多啲時間做自己鍾意做嘅事。」誰不想?郭釗的做法是,將積蓄繳首期,2001年借六成按揭買下太子一間約300呎的小單位,時價117萬元。當年他可以借盡九成,但當時覺得市況未明,借得較保守「無借盡」,但亦無法挽回到2003年時,慘變負資產,樓下地產代理標價僅80萬元,「好在銀行冇Call loan。」


避免年息5厘以上借貸

銀紙貶值,磚頭保值,2006年起站穩陣腳,每年購買一項物業,3、4年前更進軍海外,出售一兩家香港物業後,在日本、澳洲、馬來西亞等地都留下「腳毛」,最近冷門到留意紐西蘭,貪其升值快、未被人發掘。他的投資心法包括:以槓桿投資,但避免年息5厘以上借貸,以免資金周轉不靈;買入優質資產Buy and hold,例如在香港有3個左右收租物業即可「印印腳」。何謂優質資產?起碼要提供高、穩定的現金流,而資產本身亦有「爆發力」,例如2012年的細價樓(400萬元以下),今日已升值幾倍,若4年前配合按揭買入放租,今日不但賺租金回報,更大賺樓價達20倍。選擇買樓收租,保障有90歲命的生活質素,令自己「爆」一段、Hea更大段時間,騰空思考下一步試甚麼、玩甚麼。「做人最開心就是有得揀。香港嘈緊咁多聲音,都是因為冇得揀。打工開心,可以做得好開心。但如果唔返工唔得,咁咪冇得揀,咁咪唔開心。」買樓致富,就是想自己有得揀,可以早起為喜歡的事努力工作,亦可以睡至11點才施施然起床飲茶按摩通淋巴,每個月去旅行。郭太透露,夫婦倆單是一月份已去了兩次日本滑雪。將異於常人的經驗寫成書後,郭釗反而不鼓吹年輕人跟車太貼,此書適合「想為將來打算,或者受過社會折磨嘅人睇。」雖然他仍相信今時今日年輕人只要稍為努力,不難獲得機會賺得第一桶金,但郭釗對想「Hea富」的讀者亦有要求,「太後生,未搵到自己條路,未知自己想做乜,(對此書)共鳴冇咁多。」記者:黃翹恩、陳家恩




來源: http://hk.apple.nextmedia.com/financeestate/art/20170204/19917723
PermaLink: https://articles.zkiz.com/?id=325374

Next Page

ZKIZ Archives @ 2019