湯文亮：如何令女兒男友知難而退
1 :
GS(14)@2017-01-09 08:06:42【明報專訊】星期日早上跑步的時候見到一個朋友，因為佢好有錢，所以，我同佢只是普通朋友，原來佢專登搵我，待我跑完步一齊去茶餐廳食早餐。
我問佢有幾多年未去過茶餐廳，佢話很多年，不過，一直有叫菲傭煮茶餐廳的食物，例如豬排撈丁，我聽到都驚，食完一碟，起碼要跑兩小時，我知佢無事不登三寶殿，於是問是否有要事找我。
對方開門見山說，有條友追佢個女，但據他了解，條友是為了錢，而且，並不是三幾百萬，簡直是想謀奪了他的家產，問我有冇計？我反問他是否能夠放下身段，唔要面的做法我有，他請我先講出來，然後再考慮。我叫佢搵人向自己追數，又貼街招，又淋紅油，我相信，打算溝佢個女的男仔知道，溝到都冇肉食，更加會被人誤會而揹了一條大債，甚至會被人追債，就算唔立刻打退堂鼓都會同佢個女保持距離，我那名朋友話考慮一下，冇埋單就走了。
貼街招淋紅油假追數 驅走貪錢徒
報章話香港有一名男演員，溝台灣乜乜大王個女，還未溝到，乜乜大王就被人淋紅油追數，而且條數仲係好大，我估計結局就是男方將會表示，他們只是普通朋友，即是話畀追數公司知道，要追數就千祈唔好搵佢。
損短期名譽 試出對方真心
其實，做生意做到乜乜大王，一定有多少地位，如果財政上有問題，應該早已被察覺，絕對不會突然發生，更加不會突然被人淋紅油追數，我估計乜乜大王為了要令女兒男朋友知難而退而出此策略。有人認為這是下策，但我認為唔係，如果他的女兒男朋友堅持着那段感情，這代表是真心的，不過，機會就比較渺茫，我還未想完，我那名朋友行番轉頭話唔記得埋單，順便問我識唔識得人貼街招淋紅油，轉數真快，抵佢有咁多錢。
紀惠集團行政總裁
[湯文亮 敢說亮話]
來源:
http://www.mpfinance.com/fin/dai ... 5671&issue=20170109