【馮仁昭四圍超】萬綺雯笑馬仔一滴淚萬幾蚊
1 :
GS(14)@2016-11-08 05:45:58馬浚偉自編自導自演嘅舞台劇《偶然．徐志摩》，前晚喺演藝學院上演尾場。騷後馬仔同萬綺雯（蚊蚊）仲有羅敏莊等演員謝幕，馬仔一出場即刻爆喊，而佢多謝蚊蚊時，蚊蚊又忍唔住狂喊。馬仔好感慨咁話：「希望大家多啲支持舞台劇，原來舞台劇難生存，唔好講話賺錢，連食飯都唔夠。」
■馬仔話雖然場場爆滿，但因成本高，連一餐飯錢都冇得賺。
4場超時罰錢
馬仔之後受訪，問佢做乜嘢咁感動，佢話：「回想番當日籌備呢套舞台劇時點搵投資者，經歷好多考驗，真係企喺街度唔知喊咗幾多次，有時心諗搞嚟做乜。」雖然賺唔到錢，但馬仔會繼續搞音樂劇同傾《偶》劇做巡迴。佢話6場舞台劇都爆滿，但就搵唔到食：「因為我哋成本好高，今次係打成平手，如果再做會控制得budget更好，起碼都要有一餐半餐飯食。」場館規定過咗夜晚11點要罰錢，馬仔話足足罰咗4場，每場罰萬幾二萬蚊，蚊蚊聽到之後就取笑馬仔話：「本來都可以走到㗎，但你晚晚企喺個台度喊，點樣唔罰吖？一滴眼淚成萬幾蚊，你話幾貴吖。」另外，前晚趙碩之同呂晶晶襯晒色孖住去睇騷，早前趙碩之暗示同拍拖兩年男友林家亮分手，但問佢係咪分手時，佢又話唔係，仲話好期待同身在加拿大嘅男友見面㖭。撰文：馮仁昭
來源:
http://hk.apple.nextmedia.com/entertainment/art/20161108/19826035