修讀藍帶課程 黃翠如三妹 黃麗茵：容祖兒係我食客
1 :
GS(14)@2016-10-05 05:24:222016-09-28 EW
修讀藍帶課程
黃翠如父親黃永華由街市賣魚佬，升呢當上市公司老闆後，家中排行第二的黃翠如，一度被喻為「78億千金」，黃家的五朵金花也廣為人注意。
繼五妹黃曉琪為候任立法會議員朱凱迪拍助選短片後，八十後藝術家的三妹黃麗茵也浮上面，在日前的活動大獻廚藝。於藍帶修讀課程的她，將藝術混入烹飪，連天后容祖兒也是其食客，不過她卻自謙︰「我只係廚房小蝦毛。」
自學廚藝
黃麗茵（Cam）自○六年畢業於中文大學藝術系後，曾於海外多地舉辦個人藝術展。不過藝術創作並非人人都懂，二家姐黃翠如曾表示︰「我細妹係畫家嚟嘅，佢係八十後畫家，佢嘅作品好深㗎。」
擁有一雙巧手的黃麗茵，揸畫筆出色，揸鑊鏟一樣了得，隨着獨自到紐約生活，自己要搞掂三餐，由對廚藝一竅不通到上年考取藍帶國際學院馬德里分校的西班牙烹飪文憑課程。近日她晚上化身廚師，黃翠如也曾聯同大家姐及自小相識的鄰居好友容祖兒到其餐廳撐場，天后也大讚「巧厲害」。她說︰「以前細個阿媽唔畀入廚房，但喺紐約就開始煮嘢食。我唔鍾意法國菜，因為太精緻，反而鍾意西班牙菜，款式有啲似中國菜。我讀藍帶，就可以攞一張通行證入廚房玩。其實我只係廚房小蝦毛，試過煮西班牙菜畀屋企人食，但佢哋反應好似麻麻哋。」
一門五傑
黃氏一家共五姐妹，雖然全是女，不但容貌相似，且全都學有所成。家中排行第二的黃翠如因是無綫花旦，較多人識，而黃麗茵是老三，大家姐黃翠紅是工程師，跟容祖兒和王祖藍是同班同學；四妹黃曉芙是 CNN旅遊編輯，現留在倫敦開了間「Lub Lub London」賣港式雞蛋仔；五妹黃曉琪同是修讀中大藝術系，因早前為朱凱迪拍了短片，睇完的網民均大讚有「仙氣」。
不過五姐妹當中，黃麗茵小時候自覺二家姐最靚女，曾以「童話中漂亮公主」來形容。問及長大了有否新睇法？她說︰「二家姐以前講靚女唔放屁唔疴屎，我細個時真係信唔屙屎㗎。至於大家姐，以前我被阿媽打，佢會為我擋。 家二家姐成日問我要唔要買嘢？佢有discount喎。」
文人老竇
五姐妹相處融洽，無所不談。至於父親黃永華，突然升呢為身家過億的上市公司大老闆，在外間看來是個傳奇人物，但在黃麗茵眼中，父親卻只是個才情橫溢的文化佬，她在紐約短暫生活時，曾收到父親充滿詩意的家書。她說︰「佢喺鄉下讀好多書，啲老師原本攜佢去讀清華大學，但後來嚟咗香港，為生活而賣魚。佢寫中文字好靚，以前同我喺大陸教書嘅公公一齊寫揮春，公公好喜歡我爸爸嘅文采。我爸爸之前有寫詩，記錄喺本簿，但被人偷咗。」
對於家庭一夜變富，她直言︰「我哋係humble family（謙遜家庭），都係咁正常生活，同以前無分別。」她笑言家人突然成為外間焦點，母親最為不習慣，曾被人問及是否「黃翠如媽媽」，竟不知如何反應，最後女兒教她笑着點頭就夠了。
慈善饗宴
剛於上周六（廿四日）首度參加聲音掏腰包及現在音樂聯辦的《Feeding Frenzy音樂饗宴》的她，一小時要煮十道菜，要跟時間競賽，絕不容易，「之前喺藍帶上堂時，啲老師好惡咁猛push我哋，都有啲怕煮唔切，但有信心搞得掂。我都煮過畀朋友食，佢哋覺ok，都有煮過brunch畀二家姐食，佢梗係讚個妹啦。但我唔會教佢烹飪，因為佢喺呢方面冇概念。」
不過是次公開大獻廚藝後，她指因出年有三個個人展覧，要重新分配時間，「我好鍾意擺展覧，雖然內容可能好飄渺，但好多人嚟同你握手，分享佢哋嘅觀後感。」看來要一嘗她的手藝，似乎要盡早訂枱。
撰文、採訪☆娛樂組 攝影☆何國豪場地提供☆A side/B side 設計☆黎志堅