ZKIZ Archives


【唔係高達柯柏文】學生砌世界級機械人 揪贏自信POWER UP

1 : GS(14)@2016-09-25 10:28:22

廖麗雲係「何南金機械戰隊」唯一一個女戰士!佢話自己喺細心方面贏晒其他戰士呀!



o依家做學生真係好慘o架,讀書叻係基本啦,仲要學多十幾樣興趣班,先可以增加升讀大學嘅機會。愉快學習、求學不是求分數、成績唔代表一切……相信一眾學生哥都覺得難聽過粗口呀。不過,喺佛教何南金中學嘅同學仔就幸福得多喇,事關學校並冇只顧住谷成績,反而着重發展學生嘅興趣。學校嘅機械人研發隊就係一個例子喇,佢哋更加喺今年七月舉行嘅2016青少年機械人世界盃香港區公開賽,贏得冠軍!



佢哋六個各有所長,各有唔同性格,但就同樣地咁熱愛手中嘅機械人。

佢就係隊中嘅「翻版都敏俊」黃家希,好多隊員都欣賞佢設計嘅機械人程式。

黃敏浩嘅強項就係畫機械人嘅草圖。

由五個「麻甩仔」加一個斯文女同學組成嘅「何南金機械戰隊」,每日放學後都會去到科技室,導師李志宏會要佢哋先做好晒功課,之後就即刻埋頭苦幹搞機…械人!要令一隻小小嘅機械人識打交、跑步、同埋跳舞真係唔容易,當中包括好多你同我都未必聽得明嘅電腦程式。不過佢哋唔單只冇俾複雜嘅電腦程式嚇怕,反而仲樂在其中,隊員黃家希話:「我好鍾意做set program,好多動作都可以靠自己想像力做到,好有成功感。即使學業嗰邊麻麻地,如果我機械人呢邊成績好嘅話,起碼自己仲有一樣嘢係叻嘅。」玩咗機械人之後,唔只自信心返晒嚟,佢哋仲可以將學到嘅電腦知識運用喺日常生活中,隊員姚敏聰曾經俾父母怪責佢玩機械人玩到好夜,荒費學業,但自從佢哋一班人得到獎、又見到報,父母開始由反對轉為支持,姚敏聰仲話試過幫屋企修理好電器:「屋企嘅風扇試過唔郁,斷咗啲電線,咁我就用屋企啲工具將佢整返好。」姚媽媽都即刻讚佢叻仔又乖仔呀。



佢哋研發嘅機械人唔只識跳舞同跑步,仲識打交o添呀!

為自己鍾意嘅嘢去努力奮鬥,呢啲就係青春!

喺香港嘅小朋友自細被呢個畸型社會同眾多怪獸家長「洗腦」,好多時同學仔嘅自信心都會因為學業成績嘅好壞所影響。好彩,喺何南金中學裏面,只要你係真心熱愛機械人,無論你係考全班第一,抑或成績一般,機械人研發隊嘅老師都會畀機會學生參加,希望能夠發展學生潛能,令佢哋從興趣中悟出做人道理,增強自信。真正嘅教育,唔係就係咁咩?採訪:植詠珊(Cathy)攝影:馮峰、Teddy導演、剪接:Roy編審:Roy、懷鈺




來源: http://hk.apple.nextmedia.com/entertainment/art/20160925/19781278
PermaLink: https://articles.zkiz.com/?id=309993

Next Page

ZKIZ Archives @ 2019