📖 ZKIZ Archives

開拓內地市場 左丁山

http://hk.apple.nextmedia.com/template/apple_sub/art_main.php?&iss_id=20111214&sec_id=12187389&art_id=15890483&cat_id=255&coln_id=22

 

參加香港經濟峰會 2012、滙豐梁兆基對明年經濟前景甚為悲觀，講到幾乎會係世界末日，聽見都有啲心寒。佢睇淡之主要原因係：世界四大經濟體系之中，日本已迷失二十年，今 天經濟增長似有若無，復遭海嘯及核子洩漏所打擊，似洩了氣的皮球；歐盟方面，亂作一團，雖云達成新協議，基本上只係用來救火，並非刺激經濟增長，為病人打 強心針，自死亡邊緣救番條命而已，並非為體育健將餵類固醇；美國就失業率高企，自 9%降到 8.6%，不足言勇，房地產繼續低迷，更多人退出勞動市場，企業盈利之增長來源係國外銷售量增加所致，而非美國境內好景；中國可望繼續增長，但因為主要出 口市場疲弱，訂單來得慢，出口企業不容樂觀。
講到尾，即係以後要多睇內地市場，所謂內需啦。一位出席經濟峰會嘅玩具廠商對左丁山講，佢呢兩三年來已察覺到中央全力開拓內需，鼓勵廠商內銷，不再獎勵出口業績。講就容易，究竟如何開拓內地市場，用甚麼策略，如何控制分銷及財務風險，以及人才何來，都係頭痛問題。
本 港公司發展內地業務初期，係從香港派人上去管理嘅，逐漸擴充之下，因內地太大，城市太多，本港總部根本冇法子搵到足夠人手派駐內地，近年已改為在內地徵聘 管理人才，並唔係一請就掂嘅噃，一間大珠寶店嘅總裁同啲分析師講，佢地有一套從經驗中學習出來嘅方法，就係盡量不用名校嘅畢業生（佢地容易轉工），主要從 省市大學招人，叫佢地從低做起，學習公司文化（例如不貪污、不攞公司小便宜、不在公司內搞派系），又明確向佢地表示：幾年後你地就有機會成為店長、區長。 幾年下來，呢個計劃成功吸引一大批核心幹部留在公司不走，可負起拓展業務，開展新分店嘅責任，而每一間分店/分銷點都由一個統一電腦系統直接與香港連線， 香港每日可以直接監督。聽就容易，做起來要一段時間與耐性投資，中小企要學習仿效，係有困難嘅。

PermaLink: https://articles.zkiz.com/?id=29983
Next Page
ZKIZ Archives @ 2019