財經評論：新地散貨有計
1 :
GS(14)@2016-03-17 14:51:07樓市成交多番少少，「小陽春」這個名字近期成為業界的陳腔濫調。不過，「小陽春」這個名詞的定義應該是價量齊升，現時樓市只是在成交量上多點，價錢未見回勇，最多只可以話跌定咗。「小陽春」呢個講法其實唔太成立，提出「小陽春」的人，講來講去都係一班地產業界人士自high。更重要的是，就連一向喜愛玩「擠牙膏」賣樓，務求做到「鋪鋪清」的新地（016），旗下元朗映御第一轉賣百幾伙都賣唔晒，現時更要面對地理位置比自己更有優勢，更向近鐵路站的嘉華（173）朗屏8號挑機，睇怕都要繼同系峻巒被長實地產（1113）世宙扯散客路後，再一次去唔到貨。
曾向買家送稅
不過，大財團勝在有能之士多的是，一定諗到計散貨。睇番2013年10月，正當樓市被額外印花稅（SSD）、買家印花稅（BSD）及雙倍印花稅（DSD）重重包圍，加上一手新例實施了好幾個月，新地率先於旗下九龍站天璽大玩送稅，為買家補貼高達7成的BSD，結果市場不知幾受落，收票成績逾2,000張。另一好例證為2013年3月底，一手新例將快實施，市場觀望氣氛重，同系元朗爾巒第一次推出50伙單位，結果只賣出2伙。差不多一年後，2014年2月，同系元朗爾巒更狠劈四成，單位呎價約6,000元起，結果被搶購一空。所以，講到散貨能力，新地絕對有「自己方式」。仲有一招，就係去年底西營盤單幢新盤山破天荒推出免息前期貸款，買家只需以一個由買方持有或近親持有的無按揭供款的住宅作為抵押，就可只付臨時定金、即樓價5%，並再可向發展商的指定財務公司借樓價15%貸款，免息、免供、免手續費及律師費。呢一招，用喺一個細樓盤試水溫，未來新地再推一手樓，隨時會有加強版用於大型項目之上，不妨等睇呢個大財團幾時出新招。記者：黃嘉銘
來源:
http://hk.apple.nextmedia.com/financeestate/art/20160317/19532676