【馮仁昭四圍超】千嬅發掘潛能 Torres愛扮BIGBANG
1 :
GS(14)@2016-01-05 08:31:26■楊千嬅話發掘到囝囝有跳舞潛能，仲諗住送佢去跟Sunny Wong學跳舞。
楊千嬅噚日以頒獎嘉賓身份去到金鐘添馬公園出席「童跑同樂馬拉松」活動，同場仲有歐陽妙芝帶埋大仔方玉丞、區永權一家、胡諾言同囡囡一齊參加，可惜天公不造美，不過千嬅就主動放低把遮冒雨頒獎。
「《寒冰掌》佢都識唱」
千嬅在場同大家分享親子關係，佢話平時會陪囝囝Torres玩室內活動，戶外活動就交畀爸爸丁子高負責。千嬅因為上年工作太忙，冇乜時間陪囝囝，所以會趁送仔上興趣班途中加深了解：「早排陪佢去體操堂，發現囝囝識打觔斗。」
■楊千嬅爆囝囝鍾意BIGBANG，成日扮佢哋唱《I am Loser》。
千嬅仲話發掘到囝囝有跳舞潛能，諗住等再大啲就送佢去跟Sunny Wong學跳舞，訓練協調性，但唔會催谷。而Torres試過模仿爸爸以前喺VRF唱歌跳舞，模仿力好好，千嬅笑話：「《寒冰掌》佢都識唱，囝囝又鍾意BIGBANG，成日唱《I am Loser》。」同場嘅歐陽妙芝就指自己近排肥咗啲：「肥咗6磅，噚日黃佩霞先送瑜伽衫畀我，嚟緊報咗學鋼管舞。」係咪想畀驚喜老公？佢話：「係畀自己，啲跳舞衫好緊，要提醒自己唔可以有半點肥肉。」撰文：馮仁昭
來源:
http://hk.apple.nextmedia.com/entertainment/art/20160104/19437789