阮兆祥 我係由唱歌開始㗎 2013年11月28日
1 :
GS(14)@2013-11-30 13:41:45http://www.am730.com.hk/article-183524
或者大家差啲忘記，阮兆祥(祥仔)係參加「新秀」入行，推出過個人大碟，唱片封套係一個低頭彈結他，醉心音樂嘅少男，派台歌之一《我心深處》feature彭羚，MV入面擺出標準失意三七面，靠牆、倚窗、坐地甫士，既憂鬱亦純情，不過……事隔已經25年。問佢，點解拎起支咪唔係做主持或者搞笑，而係正正經經唱歌？佢答：「我嘅演藝事業係由唱歌開始。」明晒！
文：賀路斯 圖：莊振邦
Hair：[email]eddykwong@salon[/email] square
Make-up：Zita Chan
場地：Hong Kong Blues Rock Guitar Shop
兩次夢想落空
自從祥仔宣布12月中將會喺伊館開個人騷，唔少人都詫異佢賣嘅，唔係觀眾較為熟識嘅搞笑技能，而係賣唱，正經唱歌，仲開夠3場，問佢覺唔覺得冒險，佢直認今次簡直係食咗豹子膽，但係為咗紀念自己快將入行30年，既然自己係由唱歌開始，今次理所當然，以唱歌嚟做個小總結。係喎，祥仔出過兩張碟㗎喎。
am=am77 祥仔=阮兆祥
am：1984年失意「新秀」，不過喺「全港十九區業餘歌唱大賽」奪得季軍，攞到香港電台電視部藝員及歌手合約，唔係名正言順做歌手咩？
祥仔：我都以為係，諗住可以唱歌啦，但當時工作量好少，太多空閒時間，我希望自己做主動嘅一個，去表態，去爭取，我就走去自薦由電視部去電台部學嘢，做DJ，做咗幾年，知名度開始高，就有唱片公司問我有冇興趣出碟，梗係好啦！咁就出咗兩隻碟。
am：出過兩隻碟，已經好過好多人，但後來發生咩事而冇唱歌？
祥仔：我做DJ，又係行內人，好清楚一隻成功唱片賣幾多隻，人人都賣緊5萬隻，我賣得5千隻，只係做到人哋十分一嘅銷量，同期係林志穎、吳奇隆，我同佢哋梗係冇得比啦，當時就諗係咪要轉型呢？例如入TVB，有慣性收視，觀眾日日睇住我，就算今日睇我唔順眼，睇10日都會睇慣，就係咁入咗TVB做主持人。
am：聽聞之後又有唱片公司搵你出碟，你仲特登為咗出碟而離開TVB，點解後來冇咗件事？
祥仔：幾次都係咁，好似距離唱歌好遠咩？突然又有機會，當時成個Project有晒Idea，聯絡晒音樂人，開始收歌，但唱片公司高層變動，高層取向唔同咗，冇辦法，唯有擱置。
am：嘩，離開咗TVB，又冇得唱歌，好大打擊啫！
祥仔：唔開心都係短時間，我覺得有問題唔放低係冇意思，要諗出路先啱，我要做主動嘅一個，克服咗就唔會有唔開心嘅回憶。
發掘搞笑天分
正當祥仔躊躇之際，多得電視台劇集監製梅小青搵佢回巢拍《娛樂插班生》，雖然只係配角，但搞笑天分就得到賞識，開始有監製搵祥仔專做丑角，但係唔講唔知，祥仔原本都唔認為自己識扮嘢，亦自覺唔識演喜劇，但事實上，觀眾受落，及後更令祥仔喺綜藝節目大展拳腳，例如近年少有搞笑搞到開騷嘅組合「福祿壽」。
am：起初睇《娛樂插班生》，覺得你演喜劇自然到不得了，反而你自己唔覺得？
祥仔：拍呢套劇之前，我曾經自薦去做體育節目主持，總監覺得我得，俾我做奧運直播，嗰日做完直播，見到粉絲，我問有冇睇我做直播呀？佢哋反應好熱烈話「有呀，有呀，你做得好好笑呀。」點解會好好笑嘅？我先至知我好認真嘅時候，觀眾都係覺得我好好笑。
am：令我諗起Bee Gees嘅《I started a Joke》……想做歌手做唔到，想正經又正經唔到，係咪好氣餒？
祥仔：冇，喜劇唔簡單，例如觀眾睇一個藝人喊，就算睇幾次都唔會話「睇過你喊啦！」但一個笑話你講超過一次，觀眾就會話「講過啦！」要求係較高，其實搞笑有好大學問，我要演好佢。
am：2007年你戲路上有好大轉變，就係《溏心風暴》入面嘅奸角舅父波，仲攞埋當年最佳男配角獎，點解會有咁大改變？
祥仔：《溏》係偶然嘅機會，係頂替黎耀祥做呢個角色，當日監製問我有冇興趣，套劇個個都係老戲骨，有夏雨、李司棋、關菊英喎，我梗係有興趣啦，監製亦俾咗好多功課我做，例如邊個場口要注意，要設計一下，套劇出咗嚟好睇，係因為大家合作得好，起到化學作用。
am：台慶你赤住上身，俾人當鼓打到紅晒，犧牲好大喎。
祥仔：個表演係成班人一齊傾，雖然得分幾鐘，但我喺個身度黐咗4個咪，調校埋大細聲要做到效果，我堅持要嚟真，堅打，打到啪啪聲，等觀眾睇到唔係配音，雖然有傳媒話我哋唔知想點，但現場觀眾反應好好，夠娛樂性，有驚喜，咁就足夠。
唱歌死心不息
首次開個人演唱會，祥仔喺上年年尾開始構思，仲自掏荷包，自組班底，孭上最大風險，但冇諗過會輸定贏，因為祥仔喺娛樂圈打滾近卅年，識落圈中好友一大籮，個個一知道佢開騷，紛紛主動支援，撐場做嘉賓不在話下，送歌送詞，令祥仔感到溫暖，深受感動，所以將演唱會主題定命為《一祥朋友》，在佢而言，經已冇輸呢回事。
am：30年後都係返上舞台唱歌，係咪一直對歌手身份念念不忘？
祥仔：我相信殊途同歸，有啲人覺得唱歌嘅，一開始到尾就只係唱歌，我就覺得唱唔到歌就搵第二條路，有機會就再返嚟唱歌，有機會就唱，我唔視唱歌為終身職業，但會視唱歌為終身興趣。
am：你落咗咁多心血，一定搏到盡，搵晒所有朋友嚟玩啦！
祥仔：唔會太多嘉賓，有田蕊妮、陳敏之等等，仲有個神秘嘉賓，7、8個左右，多數係女性，仲會喺台度擺張床，一齊傾下偈，唱下歌，唔會一次過晒冷友情，我希望下年可以搬去大啲嘅場，到時再叫多啲朋友一齊玩。
am：你喺演唱會除咗唱歌，仲會做啲咩？
祥仔：我要挑戰舞台皇者郭富城，要做番歌手本份，會唱，會跳，想唱歌感動到人，亦非常落力排舞，我依家學緊Breaking、Knocking，每日做GYM、跑步收身，我要做人哋未見過我做嘅新嘢，想人哋睇到我嘅進步。
am：你真係唔會喺演唱會入面搞笑？
祥仔：搞笑嗰部分等我啲徒子徒孫——黃子華同張達明做啦！
am：之後會唔會正式以歌手身份再戰樂壇？
祥仔：依家心態係想大家睇一睇，正經唱歌嘅祥仔係點，少少試水溫，我想首先做好演唱會，當大家喜歡祥仔唱歌先至再諗其他嘢，若果都係覺得祥仔麻麻哋，咁我就可能要再裝備自己，希望下次再有機會，再說服各位，祥仔可以係歌手。
後記：
差點忘記，在手機中的音樂清單中，有一首祥仔25年前的作品《In your eyes》，他一聽到前奏，不到兩秒已彈起身，自己的主打歌，怎會忘記？
「聽番自己舊時嘅歌，感覺又愛又恨，恨係當時太幼嫩，冇經驗，有首歌，有詞，就照住唱，唔識把握首歌，唔識搵方法去演繹；愛嘅係，好愛惜當年把聲，呢把聲我唱唔番。」
祥仔當年個人大碟《我心深處》只有黑膠唱片及錄音帶，如今，已成滄海遺珠。
「早前突然收到以前唱片公司老闆電話，佢話大概兩個禮拜後，我以前隻碟就會推出復刻版CD，我可以好好咁收藏。」
祥仔回贈他的一首新歌，訪問前一晚才錄起，這個星期將會派台，一聽，是首慢歌，唱腔改變了，若非早知道是他，必定會脫口問「邊個唱㗎？」
「為咗演唱會，早前接受黃柏高Paco訪問，佢問我準備成點，啲歌齊未？我話差隻慢歌仲揀緊，Paco叫我唔使揀，佢幫我揀，第二日朝早就打電話俾我，問我收到首歌未？我聽咗覺得好聽喎，15分鐘後Paco再打俾我，話呢隻歌唔使我出錢，佢全力幫我製作，搵埋填詞人火火，包喺佢身上，呢啲就係一場朋友，好感動，首歌叫《二把》。」
2 :
GS(14)@2013-11-30 13:43:19http://www.am730.com.hk/article-183532
唱歌唔使愁入行靠行頭
自從香港減少公開及大型嘅歌唱比賽之後，
睇落好似少咗個門路，
其實入行方法反而多咗，不過問題係唱片公司捧新人，
係一項巨大投資，宣傳一向係最大開支，
拍MV又可能要請Models或者Dancers，加上市場萎縮，
賣碟真係未必番到本，
不過，若然歌手有啲家底去幫補一下，
就好大機會成事，呢度大把例子。
文：77合作社
亞太區 林峯~外間一直有傳林峯爸爸有「廈門李嘉誠」之稱，入行係靠人事關係，不過佢喺電視台都做過侍應、士兵呢啲閒角，只係過程超短，好快就拍住吳啟華、古天樂做第二男主角，冇幾耐就坐正一線，2007年正式簽約英皇娛樂成為歌手，最為人津津樂道，當然係取代Eason連奪三屆「亞太區最受歡迎男歌手」，2011年憑《Chok》一曲仲奪得「金曲金獎」添。
粉絲強大 麥浚龍~18歲就出道嘅Juno，由於父親係中建電訊主席麥紹棠，加上短時間內經已有一班粉絲追隨，一直有傳靠父親嘅銀彈策略，聘用職業粉絲、出錢買碟、購買播放歌曲時間及各類宣傳，無論外間有咩揣測，Juno繼續我行我素，堅持理想，及至今年憑自編自導自演嘅電影《殭屍》，終於得到演藝上嘅成果及掌聲。
歌舞動人 吳雨霏~有錢與否，當然視乎同邊個比較，之不過住喺比華利山，讀得國際學校，應該屋企日日有飯開，唔會捱餓，當年Cookies 9個女仔，走下一個，走下幾個，前後11年，今日Kary仲可以站立喺樂壇，除咗靠佢本身嘅歌藝同舞藝，屋企支援相信一定唔少得，事關好多成員都為咗搵食，一早轉投其他行業發展。
注定音樂人 王梓軒~父親王英偉係港區全國人大代表，亦係香港藝術發展局主席，背景咁顯赫，王梓軒當然受到悉心栽培，佢6歲就開始學小提琴同鋼琴，亦喺大學修讀現代舞，作曲、編曲、監製及填詞嘅工作早經耳熟能詳，出隻碟可以一手包辦咁滯，返到香港唔獻身音樂事業就嘥啦！
宣傳充足 梁佑嘉~自Abella出道至今，一直有強大宣傳，例如電視廣告，個人特輯主持嘅旅遊節目，邀請台灣歌手柯有倫特意飛嚟香港同佢合唱等。佢仲專程飛去韓國學跳舞，出入有司機接送等各種超然安排，早前就有傳媒指佢其實家底豐厚，入行都係多得喺經營內地房地產富商老竇貼錢支持。
太子女 朱紫嬈~作為太子珠寶鐘錶行執行董事朱繼陶嘅女兒，Khloe當然可以稱為太子女啦，至於佢入行經過就有兩個講法，第一個係家人同金牌經理人Paco係世交，第二個係因為佢唱功不俗獲Paco睇中，不過由於佢家境富裕，令佢曾經表示，記者經常問係咪老竇出錢做宣傳，以致外界甚少留意佢嘅音樂。
唔撈歌手仲有出路
樂壇每年有咁多新人出道，點記得你邊個打邊個，
即使你唱歌有幾好聽，如果因為你恃紅生驕，
或者同負面新聞扯上關係，
又甚至只不過係你公司唔夠budget捧你，
你都未必有得撈！
其實撈唔掂歌手唔代表你唔掂，只可能時不你與，
既然係咁就無謂勉強，
因為唔撈歌手仲有出路！
Oscar 做生煎皇~Oscar喺2004年同古馳組成Bliss出道，可惜事業一直未見起色，合約完咗之後，一米九嘅佢去咗上海做模特兒。期間，佢日日食生煎包都食極唔厭，於是決定將呢種口味帶返香港，同朋友一齊開咗間正宗上海生煎皇，仲搵埋上海師傅教佢整正宗上海口味嘅生煎包。嚟緊佢仲諗住再開分店，其實做下自己鍾意又有興趣嘅嘢，咪仲好。
肥媽 做主持好過唱歌~肥媽(Maria Cordero)把聲夠晒嘹亮，後生時就已經出嚟唱lounge，之後被泰迪羅賓發掘，為電影唱主題曲而為人認識。不過佢唱嘅歌唔係太大路，外形又太有份量，以致《友誼之光》及《Ma Ma I Love You》之後，再冇大熱之作。及後佢開始喺電視台做下主持，由於煮得一手好餸，於是當上烹飪節目主持人，教大家點樣揀靚菜煮好餸。同樣係靠把口，結果做主持仲受歡迎過做歌手！
Alan@E-kids 自強拒做曱甴~E-kids入面大家可能淨係記得Tommy(因為佢聲稱同G-Dragon好熟，同埋經常俾人影到過大海賭錢，所以成日見報)，另一成員Alan自從組合拆夥後，好似唔多想同Tommy扯上關係，早前同另一成員Tim開咗場騷都冇預Tommy。Alan自從冇唱歌之後，去咗教跳舞，都叫做有份收入穩定嘅工作，總好過喺樂壇浮浮沉沉，俾人當係曱甴，就唔好啦。
陳冠希 賣潮服仲好搵~Edison嘅演藝生涯係點，毋須多講，分分鐘你仲熟過我，值得一提嘅係，佢當年一首《香港地》的確曾帶起過一陣rap熱潮。自從淫照事件宣布退出娛樂圈，及後又反口復出，接拍《蝙蝠俠—黑夜之神》，點知得一句對白咁多，引來網民取笑，就知道佢現身幕前已經冇人睇好，唯獨係佢嘅潮牌服飾，好似同佢嘅人氣成反比例咁，佢愈俾人噓，啲衫就愈賣得。
趙梓淇 組織家庭享天倫~趙梓淇Yu(趙頌茹)，當初憑住翻版鄭秀文個朵出道，好快就為人認識，加上模特兒身材，工作量都唔錯，但有傳佢工作態度欠佳，加上男友周永恆多次出事(涉嫌藏毒、毀壞公物、刑事恐嚇及毆打案等)，以致兩人形象插水！好在佢哋因為宗教信仰嘅改變而慢慢洗底，Yu後來曾做過記者，依家就專心喺屋企湊兩個可愛嘅小朋友。
梁洛施 生仔做少奶~15歲就加入英皇，出碟拍戲拍廣告，曝光率極高，仲做埋葡萄牙影后，點知突然選擇淡出娛樂圈，因為當時佢懷有李澤楷嘅骨肉。雖然最後佢同李澤楷分咗手，不過就一直過住唔使點做，齋湊仔嘅少奶奶生活。直至早前，佢喺張艾嘉執導新作《念念》嘅記者會上出現，並正式宣布復出。
杜麗莎 自己唔唱教人唱~出生自音樂世家嘅杜麗莎，六十年代就已經活躍於樂壇，但喺佢最紅嘅時候，竟毅然為愛情放棄事業，移居美國結婚生女。後來回流、移民再回流返香港，就好少推出新歌，反而一心教人唱歌，天后級嘅林憶蓮同鄭秀文，薛凱琪、傅穎同鄭融都係佢學生。
3 :
GS(14)@2013-11-30 13:43:59http://www.am730.com.hk/article-183556
香港有大把藝人歌、影兩棲，
例如天王劉德華同郭富城，又好似天后鄭秀文同楊千嬅。
不過唔係個個藝人都好似佢哋咁，可以瓣瓣撈得掂，
例如有啲人本身以歌手身份入行，但搵食艱難，
突然間轉去拍戲，有啲人明明係演員出身，
但突然爆紅，咁就走咗去出碟做歌手。
係撈
呢班人原本身份唔係歌手，不過屬於演藝界一員，由於近水樓台，當人氣夠旺，或者等到適當時機，就自動有唱片公司向佢哋招手，而佢哋大多數嘅特徵係靚仔靚女，但歌藝未必特別出色，或者真係禾稈冚珍珠，有把靚聲一直冇機會俾人知。
藝員變歌手 古巨基~1990年加入TVB，參加藝員訓練班做藝員，畢業後主要做主持同喺劇集做二打六，較令人深刻有《娛樂新聞眼》，經常訪問歌手藝人，不過呢段期間，佢喺圈中結識咗唔少朋友，亦不知不覺透露咗自己唱歌嘅天份，後來終於得到賞識，被唱片公司簽為歌手，加上一堆好歌而紅咗，終於輪到佢俾人訪問番。
新秀轉拍劇 鄭伊健~好多人以為佢係拍檸檬茶廣告入行，錯！佢係參加「新秀歌唱比賽」而簽約TVB，不過幾年間由配角成為小生，九十年代偶像派歌手抬頭，伊健亦喺1991年加盟BMG推出多隻大碟，成為多個品牌代言人，《古惑仔》系列亦爆紅，正當佢事業如日方中，突然發生「奪麵雙琪」，令其人氣一度插水，近年已甚少推出新歌，但每年梗會開演唱會見下樂迷。
玉女掌門 周慧敏~有玉女掌門人之稱嘅Vivian，1985年參加過「新秀歌唱大賽」，不過落選，後來參加香港電台嘅「業餘DJ大賽」正式投入演藝事業，佢開頭係擔任DJ，但清純嘅面孔，溫柔嘅聲線，好快就俾唱片公司睇中簽為歌手，旋即爆紅，後來加盟寶麗金唱片成為力捧女歌手，紅透九十年代初，兜兜轉轉都係做歌手，都唔知當初係TVB走漏眼，定係Vivian突然識唱歌。
模特兒入行 周柏豪~好多人都知周柏豪做歌手前係模特兒，為唔少潮流品牌行騷，不過再準確啲，其實佢應該係錄音室嘅工程師，幫歌手做Demo、唱廣告Background歌之類，加上佢識得彈結他同鋼琴，順理成章成為唱作歌手，雖然聽眾對佢啲歌冇咩大反應，不過就對佢喺社交網上嘅留言反應大好多，例如「水杯論」咁。
永不放棄 鄭俊弘~Fred係一個年輕人追逐夢想嘅完美典範，2001年參加「全球華人新秀歌唱大賽」，獲得「現場最具風采獎」、「突破新秀巨星演繹獎」、「網上完美之聲大獎」兼攞埋亞軍，卻因華星唱片業務改變，Fred成為歌手美夢落空，惟有撈演員，不過今年憑住《星夢傳奇》摘冠之餘，仲得到廣大觀眾認同，事隔12年，應該好快正式以歌手身份見大家。
網民力撐 官恩娜~大溪地靚女Ella最初喺Roadshow當主持，由於佢樣子甜美，性格爽朗，獲唱片公司賞識成為歌手，作品《地平線》亦備受好評，可惜經常捲入是非，令佢事業停滯不前，2009年雖然佢喺《超級巨聲》表現令人刮目相看，但仍未見起色，愛惜佢嘅網民決定喺FB主動成立「力捧官恩娜上位團」，希望佢可以喺樂壇再放異彩。
唔係撈
唱得歌入行，歌藝都有番咁上下，不過呢條路唔易行，首先要有唱片公司簽做歌手，之後要有唔止一首嘅好歌，一下子接唔住個勢，好易俾人遺忘，仲要夠運氣，同期唔可以有太多競爭，形象要夠突出，否則半年錄一次音真係飯都冇得開，所以轉做藝人或者幕後嘅例子都唔少。
搞笑天份高 江欣燕~1985年得18歲青春活潑嘅江欣燕，參加「新秀歌唱大賽」入行，雖然三甲不入，但被華星唱片睇中簽為歌手，早期作品有日文改編歌《夜半驚魂》，亦唱過日劇《偶像媽咪》主題曲及兒歌，可惜未能正式喺樂壇發展，相反觀眾就喜歡佢扮Maria，早年佢同吳積遜結束12年婚姻，因此又多咗見佢參演電視劇。
內地拍劇更紅 李彩樺~Rain以歌手身份加入娛樂圈，推出不下5張唱片，最令人深刻嘅歌相信係「唸口簧」唱嘅《你唔愛我啦》，不過出道時有唔少同佢風格相近嘅女歌手，形象始終唔夠鮮明亦冇突破，一直被界定為妹妹仔，最後亦要轉拍劇集，但反而令人受落，近年更主攻內地市場，比唱歌紅得多。
浪子回頭 鄭中基~唱片公司太子爺，自小受音樂薰陶，天生又有把靚聲，唔做歌手真係嘥，1996年同張學友合唱《左右為難》，令佢成為當時炙手可熱嘅新人，不過接連在飛機上醉酒鬧事，令佢事業同形象大插水，近年暫冇新歌推出，不過佢嘅喜劇細胞就令人非常受落，加上結婚生女，一洗壞孩子形象，真係浪子回頭囉。
拍劇翻身 蕭正楠~拍優之良品廣告被人發掘成為歌手，同期力壓有強大實力支持嘅麥浚龍，獲得「男新人金獎」，點知衰多口講咗句「邪不能勝正」，結果被樂壇全面封殺，搞到避走內地，2008年回港專心拍劇，幾年間得到多個演藝獎項，今年終於走到一線位置，仲被視為視帝大熱之一，之前受過咁大教訓，希望佢真係學識慎言嘅道理。
重投電視懷抱 陳展鵬~本身係TVB藝員，多數做茄喱啡，1996年得寶麗金唱片公司賞識成為歌手，曾經推出《快快》、《拉拉扯扯》等歌曲，但當時未能兼顧歌手及演員工作，決定同TVB解約，點知唱片公司被收購，連首張個人專輯都未推出就失業，後來加入ATV重新嚟過，2008年再重返TVB，今次乖乖哋拍劇，終獲力捧，真係唔知當日解約係福定係禍。
曾經滄海 羅嘉良~佢都係參加「新秀歌唱大賽」入行，不過加盟咗ATV，為當年大製作《秦始皇》唱主題曲，1987年轉投TVB為長劇《季節》又演又唱主題曲，但都係唔紅，反而九十年代演反派就彈起，從此成一線小生，1998年憑住《天地豪情》推出大碟，仲喺紅館開咗4場演唱會，但始終欠缺承接力，加上同宣萱緋聞不絕，千禧年開始轉戰內地，近年甚少拍港劇。