金手指：誠哥早知西洋菜 孫柏文
1 :
GS(14)@2013-08-06 23:48:24http://hk.apple.nextmedia.com/financeestate/art/20130806/18365899
旺角喺禮拜日嗰場Battle of Sai Yeung Choi，見到港聞版報道，話事緣喺七月尾，一位叫林慧思嘅女老師見到差人喺旺角行人專門區，認為「特別款待」長年擺檔嘅法輪功，所以就埋去理論。
短片擺上YouTube，睇嘅就會見女教師同警員辯講咗句：「What the Fuck？」之後引來好多個警察組織聲討講「粗口」老師。就係咁，討論圍繞呢句粗口。如你信呢啲分析就會中招。因前日3,000人對壘，唔係乜講粗口或選擇性執法，其實係一班香港人覺得「香港獨特性」慢慢冇咗。
香港已不是「香港」
例如每一個香港人都知，香港其中一個獨特位，就係言論自由。每次街頭見法輪功擺檔派傳單，都覺佢哋成為香港呢個煤礦中嘅金絲雀，佢哋一日仲喺到，都係「仲有自由」嘅象徵。你呢個講系統嘅前線差佬搞佢，等於成個系統已腐爛，香港，已不是「香港」。搞別群都冇咁嬲，係搞呢隻金絲雀就最大反彈。
啲警察呢？點解咁嬲？睇段原片已知。港女鬧人特性，就係原本嗰句hurt唔到你的話，就昇華。鬧你WTF唔hurt，咁鬧乜？咪鬧你公安囉！片中當警員聽到WTF其實冇乜反應，係要林慧思一句：「公安！」令個警員分別講三次：「我要糾正！我哋係香港警察！」警察諗當老師都屈佢哋係「公安」，學生會點？仲唔等於成個系統已腐爛，香港，已不是「香港」？
咁深層嘅矛盾同錢冇關嘅衝突，即錢擺唔平。早兩周孫柏文已話老行尊見繼82、89年後第三次撤資潮，李嘉誠旗下和黃（013）賣百佳，隔離利世民兄移民，實在走得前，佢哋早料會有西洋菜之戰。大家一定諗幾時燒到樓價？民主必要行，佔中幾時傾防「百分之五十加一票」暴政呢？
孫柏文
獨立股評人