好不主席：牛肉保鮮 盧先亞
1 :
GS(14)@2013-02-05 00:41:08http://hk.apple.nextmedia.com/financeestate/art/20130204/18156200
春暖還寒，只要氣溫稍跌，各式火鍋店都其門如市。港人「烚吓烚吓」的興致全年都高漲，且歷久不衰。近年不過喺「湯底」搞搞新意，由古早味嘅「沙茶」、「鴛鴦」到前幾年大熱嘅「豬骨」，到今天超人氣嘅「雞煲」，而不離其宗，始終食咗最多落肚嘅，並非其他禽畜，而係牛肉！所以我哋嘅人均牛肉消耗，喺過去五年就升咗超過一倍，若以「非回教」地區計，吞量更係冠絕全球。亦難怪五豐行在抬價方面，毫不手軟，而漲價幅度亦以倍數計。
肉檔多違規用鮮肉粉
曾經有業界友好設宴於高級火鍋店，我亦叨光適逢其會，席上有位新相識的先生，舉凡店內員工都係恭敬地「乜生」前、「乜哥」後咁稱呼，唔知仲以為佢係東家。至於當晚火鍋主打當然又是牛，甚麼頸、脊、腋、肉眼邊，好像上了一課生物堂。眾賓客興高采烈地品評不同食味，尤其是那位先生，直情如說家珍，猶似「牛肉達人」，而更不可思議的是，由始至終，他卻一塊「靚牛」都未挾過！
席間當亦有人發現，且直問是否信仰或另有原因，因為其他肉食，他都來者不拒。而先生只以「少食」作答，再無補充。大家萍水相逢，自是識趣不便追問，不過當晚也就是帶着狐疑道別。過後方知，先生竟是本地其中一位牛肉批發商，且已經營好幾十年。雖然做嗰樣，冇話一定要食嗰樣，但係自己都唔幫襯，點都有啲玄機。
終有熟知內情人士在一次酒酣耳熱後相告，先生曾經透露，經他手攞貨的零售牛肉檔，在擺賣過程沒有用到「鮮肉粉（或保鮮粉）」以保存牛肉（像）鮮度和色澤，基本上是絕無僅有。翻查報道才知，前兩年食品安全中心抽驗市面上出售的新鮮肉類，已經發現有多個樣本違法添加「保鮮粉」，即係二氧化硫，當中又以牛肉違規的情況更為嚴重。二氧化硫是食物製造業常見的防腐劑，惟法例禁止添加予新鮮、冰鮮或冷藏肉類。
二氧化硫毒性不高，並溶於水，一般會在清洗及烹煮過程中流失，市民在普通食用情況下不會對健康造成不良影響，但個別對這種防腐劑有過敏的人，可能會出現氣喘、頭痛或惡心等症狀。當然我們或會以為咁即係本身有事嘅人先會有事，但要令冰鮮或冷藏肉類看起來顏色鮮明以求混珠，這可理解。但新鮮肉類中亦發現「保鮮粉」，唯一原因就係啲肉根本已不新鮮，食後效果如何，怎說？
坊間這陣子為了牛肉供港而沸沸揚揚，但自從得悉那位行內先生敬而遠之，我亦避之則吉，更何況今天又是星期一，更要Green Monday。