中門大開：細節定成敗 添馬男
1 :
GS(14)@2013-01-31 01:11:18http://hk.apple.nextmedia.com/financeestate/art/20130130/18150863
施政報告辯論前夕，兩間大學發表民調，梁振英民望再次插水，實屬意料中事，星期四發表施政報告第二輪民調，即使冇黑熊追咬事件，施政報告都會隨時跌破兩成滿意率，都咪話唔得人驚。
成功靠執行 得把口死梗
但o依家未算大鑊，跟住一年先至甘。因為一大堆梁粉委員會陸續登場，人人磨拳擦掌，誓要做一番事業，至少威過蔡涯棉、林奮強。對政務官而言，佢哋變成特區政府花生友，等睇戲。政府施政唔同競選，選舉政客開口中，你叫佢做乜都應承，但選完就失憶。施政講求執行細節，反覆推敲各種可能性，因為隨時一個執行上嘅失誤，足以推翻整個政策。大家只要睇睇金發局，話之你班梁粉吹到天花龍鳳，點勁點勁，規格如何超然，但當漏咗一個執行細節，就係是否屬公共機構，即刻被打沉。
外來政客空降仲政府，面對一班精於籌劃執行之政務官，必死。尤其越多嘢講，吹得勁就越死得快，因為政客輕視執行力，亦無時間及興趣關心細節討論。好似賓尼迪斯帶領車路士一樣，無論賓帥戰術上如何了得，但場上球員根本執行唔到出來，一個「廢托」已經搞到大家好氣餒。反觀曼聯費Sir，在芸芸英超教頭中，相信戰術理論比唔上賓尼迪斯、文仙尼，但球員落場落力執行，冇人敢側側膊，原因除咗佢出名「風筒理論」，即半場休息，近距離頭對頭訓斥球員，口氣連對方頭髮都吹郁外，仲有係靠更衣室內一班老骨幹。佢高價收購尹佩斯，都會問兩老傑斯及史高斯。
執行會經常出錯，需要不斷修正、再修正，執行更需建立骨幹團隊，堅定不移去貫徹，而骨幹是需要有領導才能，如果一味靠把口，有功先領，有過就先卸，肯定亂曬大龍。房策半年來政出多門，講嘅人多，做嘅人少，結果敗像已呈，俾地產佬睇穿你冇料到。
水貨客事件，政務官早知唔係掃場咁簡單，但林鄭急於做場大龍鳳，未做好計劃就高調掃蕩，以為可以靠嚇。點知水貨客仲全港蔓延，化整為零。
一切錯誤，源於個「急」字，民望越低就越急，越急就越亂，政策執行細節未經深思，CY正為僭建不斷付出沉重政治代價！
添馬男