ZKIZ Archives


阿Sa睇BIGBANG差啲暈:有史以嚟最辛苦

1 : GS(14)@2017-01-23 07:45:13

韓國天團BIGBANG首次喺香港啟德郵輪碼頭舉行戶外騷,昨日頭場於晚上9點03分圓滿結束,歷時兩小時15分鐘嘅演唱會亦順利完結。雖然開場前因為入場安排等問題,搞到粉絲要排幾個鐘先入場,其間搞到附近交通好擠塞,同時大會入場時安排亦好混亂,遲來反而有得先入,令到好多粉絲都好不滿,喺網上狂熱鬧,幸好最終大部份觀眾都成功入到場內欣賞演唱會。而觀眾吸取過入場時嘅教訓,離場時就都即刻走人,唔再等大會安排嘅專車接送,大部份觀眾都寧願選擇行路出去,以免再經歷塞車之苦。當中仲見本地組合天堂鳥嘅兩位成員到場,佢哋完騷後受訪話:「我哋5點半先到,幸好啱啱趕及6點半先入場。」佢哋覺得最正係last三首歌,不過亦都彈今次演唱會安排麻麻,又呻:「未試過搞完一大輪入場要成兩個鐘,可能第一次喺呢個場搞,個入口太細,咁多人迫埋一齊入,唔係太好。」而昨午有得喺VIP區搭專車嘅阿Sa同馬天佑,離場時就唔想再等,都即係搭小巴走人,阿Sa為免被認出,仲帶上黑色口罩,阿Sa喺Instagram上載同馬天佑合照,之後留言:「有史以嚟睇得最辛苦嘅一埸演唱會...今日本身自己有啲唔舒服...頭先睇睇吓show爭啲暈低...唯有早...行咗好遠終於搵到小巴...但都等咗一陣先至有車...見到隔離等的士嗰啲人就慘喇..半個鐘都冇一架的士...唔知而家散咗場有冇多番啲車呢?」




來源: http://hk.apple.nextmedia.com/entertainment/art/20170122/19905306
PermaLink: https://articles.zkiz.com/?id=323668

Next Page

ZKIZ Archives @ 2019