好不主席：換證記
1 :
GS(14)@2012-11-07 00:56:00http://hk.apple.nextmedia.com/financeestate/art/20121106/18059163
這個多星期往返內地都要帶備護照，還有那張申領身份證的收據。事緣上月發現，我那張身份證在使用e-道（電子通道）出入境時，每有阻滯，往往要多番嘗試儀器方能讀卡，而有一次反覆「抽送」後，竟然發覺張證嘅電子晶片微微外翹，當其時我用手指輕力接觸，溫柔一，成塊晶片就咁甩咗出嚟！驚魂稍定，先識得讚嘆身為港人的驕傲，我擁有的不單止是一張智能身份證，原來還能像手機的SIM卡（冷知識，中文即係「用戶識別模組卡」）一樣，隨時隨地更換，唔係點解可以咁容易就移出。
那天趕赴開會，也無暇再作深入調研，及後返到公司將張晶片「歸位」之餘，再仔細目測，然後先留意到晶片下面，也就是「多重激光影像」（又係冷知識）個位亦出現裂痕，傷痕纍纍，當下即吩咐Joycelyn幫我約時間去進行補領手續。因為根據入境事務處網上所載，如果持證人一旦發現其身份證有任何損壞，就必須在14天內向人事登記辦事處申辦新證，不過以上都係我之後翻查而知。事實上我急着去換證，只得一個理由，就係確保唔會因為張卡失效而出入唔到境。
身份證質差 點解要畀錢換
換證過程開頭順利，仲同個負責職員有傾有講，當我反映點解張卡嘅物料咁唔掂，佢都識得話，呢啲情況或會發生喺同批次嘅成品度。及後回想，先明白佢為何只是一個普通公僕，因為佢仲會講人話。稍後，我另要面見一位高級的入境主任，例行對答，跟住佢就叫我繳交補領費用，再等攞證。我先醒起尚有一重要問題未及提問：「點解要我畀錢呀？」
若然遺失、塗污、蓄意損毀要自費補領，我完全理解，但係物料本身質素出現問題，卻要持證人自理，又係乜嘢道理？任憑我向那位入境主任表述意見，佢都只係重複規章，甚至當我即席示範如何輕易取下晶片（其實我經已觸犯不可強拆晶片的條例），兼展示裂痕，佢都只係一臉木然，不過最後都講咗句略帶感情嘅說話：「我嗰張都唔係咁嘅。」
呢啲咪係「推己及人」囉！所以如果有食客喺一間餐廳度進食後感覺不適，個經理咪話一定係佢嘅體質本身有問題，因為其他啲客之前都冇出現咁嘅情況，雖然我之後先知鄙人遭遇並非個別事件。如果市民發難就係刁民，呢期我「刁」硬。
（明天狗尾續刁）
盧先亞