好不主席： A for......
1 :
GS(14)@2012-08-15 18:48:26http://hk.apple.nextmedia.com/financeestate/art/20120815/16604851
以前我哋細個學英文都係由 A for Apple開始，但係唔知幾時已經變咗 A for Astronaut（太空人），唔好意思，咁多年慣咗，都仲未改到口叫航天員。其實以呢個並不常用的詞彙去替代 Apple，我估除咗要凸顯家陣幼兒嘅腦部發育比過往長足進步之外，更重要係配合我國偉大的航天事業發展，從小就能夠培養孩子們對國家級人才的敬仰。所以就算唔用 Astronaut，都應該係 Athlete（運動員）。若然啲家長仲想要進行活動教學，呢排更加係大好時間。啱啱先送走咗幾位航天員，家陣啲金牌運動員又話要嚟同港人打打氣，或者可能係消消氣，雖然我都係覺得呢啲「政治騷」幾已成了例行公事。
「政治騷」等於「獎食糖」
如果要剖析這些活動背後的意義，不外乎就係以「獎食糖」的手段嚟攏絡港人。即係只要啲小朋友肯乖乖哋，老竇就會畀糖佢食同帶去睇表演。不過始終有啲百厭仔會唔聽話，唔單止成日駁嘴駁舌，仲追住問老竇點解要閂埋門打阿媽；又淨係准佢唱國歌同睇喜羊羊。不過點都唔夠隔籬個明仔大膽，佢竟然話乜「屋企佢有份，所以老竇如果做得唔啱，做仔嘅都可以嬲佢喎」，真係大逆不道。不過明仔唱歌真係好好聽，個人又好有態度，成日都為其他小朋友抱不平。諗起今個週末又可以睇佢演唱會，大聲同唱「這個都市光輝到此！」就高（ High）曬，哎呀，爭啲唔記得咗啲航天員添。
聽佢哋講嘢其實都好有娛樂性嘅，譬如說，劉旺好認真咁話喺外太空都可以睇到香港嘅燈火燦爛！難怪有電子媒體訪問在場嘅一位學生，有冇諗過做航天員，佢就答驚自己嘅體能唔得。其實莫講話係呢位同學，我相信以劉旺的視力為標準，一般嘅地球人都難望項背。而佢哋雖然個個都接近神人，但係都一樣有七情六慾，所以喺唔同嘅場合都多次提及，任務在身而未能與家人多些時間相處，實為憾事。說到傷心處，總是眼泛淚光，場面感人至深。之不過既然咁難得唔使與世隔絕進行訓練，佢哋點解唔返屋企同家人聚天倫，而要山千水遠到訪特區？
港人上太空 「要有條件」
由此可見，他們對港澳同胞的情義更深，你說我哋怎能辜負這番情意。至於該如何報答，9月投票固然要知恩票報，若然你都仲未知要投邊個、唔投邊個，咁大可參照航天代表團的宴請名單。而據該團團長表示，港人在祖國航天事業上亦可參與，先決條件就係「要有條件」，意下咪即係要順應國情。至於連本地公司搞個乜「小太空人計劃」都趨之若鶩嘅家長，應該要組織起來反「反國民教育」，唔係將來個仔點會有機會坐「神65（唔通有64咩？）」上太空，總之聽教聽話就「 It's Possible」！
盧先亞