ZKIZ Archives


可樂又飲滙源果汁?專欄爆「復合」炒友會錯意 李華華

2010-06-9  AD





 

市場上嘅買賣活 動有時真係好兒戲,作為一個精明投資者,千祈唔好人哋講乜信乜呀!來路不明嘅路邊社消息,大家當然要識得懷疑;之不過好似英國《金融時報》咁響嘅朵,唔通 都信唔過?

話說滙源果汁(1886)噚日朝早無情情急升一成,華華走去八吓咩事。上網search下,原來內地有報道,一開口就引述大名鼎 鼎嘅《金融時報》,話可口可樂繼04年向滙源「提親」、俾「家長」商務部反對而撻Q之後,最近又想「翻撻」舊愛,原因係可口可樂嘅CEO穆泰康 (Muhtar Kent),近排做咗美中貿易全國委員會(USCBC)主席,佢可能會用呢個身份,去游說商務部畀可樂娶滙源。

華華一睇, 呢單新聞真係不得了,點解呢幾日睇報紙時完全冇印象嘅?華華即刻拎番份《金融時報》出嚟,幾經辛苦,至喺上星期五一個專欄第四段搵到3句,係提到呢個消 息,原來呢條「猛料」,只係《金融時報》一名評論員嘅「個人意見」,唔代表《金融時報》立場,更加唔係有咩接近內情嘅消息人士爆大鑊。

雙方 高層已否認

其實噚日有另一份內地報紙都話,滙源老總朱新禮前幾日喺個研討會上已經講明,冇乜時間諗賣盤,佢淨係諗點搞好盤生意都用晒啲精 力。另一邊廂嘅可口可樂,佢嘅中國負責人亦直接否認咗「翻撻」滙源嘅傳聞。謠言呢家嘢,唔使傳七七四十九日,滙源嘅升幅噚日去到尾市已經差唔多打回原形, 收市只升4個巴仙。會錯意嘅朋友,惟有當買個教訓啦!

李華華



PermaLink: https://articles.zkiz.com/?id=16035

Next Page

ZKIZ Archives @ 2019