隔牆有耳：煲呔臨別抽水 寸記者大聲
1 :
GS(14)@2012-04-24 23:30:56http://hk.apple.nextmedia.com/te ... 104&art_id=16276619
仲有兩個幾月，煲呔就無官一身輕，以後日日搭私人飛機都冇有怕，難怪噚日出席報業公會頒獎禮時咁風騷，致辭時句句有骨，話記者大聲提問，令佢覺得尷尬兼難堪。咦，乜咁似 CY早前批評《星島日報》記者嘅對白？睇嚟煲呔真係好緊貼新聞，連人哋對白都背埋。
煲呔話傳媒係監督政府嘅武器，輿論報道令政府認真嚴肅處理問題，自己都係傳媒監督嘅對象，仲話傳媒早前報道佢接受富豪款待，令佢深刻反省，從政者要有最高操守咁話喎。
面對批評覺得好難受
咁煲呔係咪知錯？戲肉喺後面。煲呔話當時面對洶湧而嚟嘅指摘、批評，覺得好難受；在任咁多年，面對記者嘅提問、質詢，甚至大聲喝罵，「令人相當難堪、尷尬、不知所措…你咁問，我想答又答唔出，大家都得唔到好結果」。
經常喜怒形於色嘅煲呔，直言好難掩飾個人情緒，所以被記者話佢黑口黑面喎，佢反而建議記者用另一種方式提問，提問時「細聲些少」。不過八方就認為，如果對方選擇性失聰，其實記者用咩語調、咩聲線都唔係問題。
特首選戰期間，中央話過好重視民意，視民望如浮雲嘅煲呔終於轉軚，話輿論同民意對香港走向民主化、實現普選特首好重要，記者要理性報道，以防社會走向極端同民粹。
頒獎完畢，煲呔有別於平時雞咁腳走，竟然企定定畀記者扑咪提問，唔少政治組行家都話，此情此景，簡直百年一遇呀。