📖 ZKIZ Archives

保本抵通脹 左丁山

http://hk.apple.nextmedia.com/template/apple_sub/art_main.php?&iss_id=20110815&sec_id=12187389&art_id=15523150&cat_id=255&coln_id=22

美國聯儲局聲明維持低利率（接近零）直至二○一三年中為止，消息一出，股市喘定。後來因為法國評級不穩，股市再度波動，那是另一回事了。以前曾經有專家估 計，美國經濟逐步復甦，二○一二年下半年後，利率會恢復上升軌，警告香港市民買樓時要小心，做吓壓力測試，睇睇按揭利率上升後，譬如升兩厘，供樓負擔是否 可以應付。依家唔升啦，港元利率起碼兩年不變，偏逢內地出口增長強勁，貿易順差擴大，外匯儲備不斷膨脹，即係話人民幣匯率在未來兩年有升冇跌，香港之輸入 通脹率（例如人民幣計價之豬肉）有增無減，負利率揮之不去，大概通脹會升到六至七個巴仙，存款利息幾乎等於零。
大市喘定之日，沙田陳太問左丁山有 乜好買，佢唔貪心，只望保本兼追上通脹啫。查吓中電，電能呢類傳統高息股，週息率在通脹以下，中國銀行（三九八八）幾好，派息幾好，但要扣除一成內地股息 稅，而且中銀股價似乎幾難升上去，往往跟隨大市下跌㖭。諗咗一輪，叫陳太買 iBond，佢話：「唉吔，當初有不少專家學者唱淡，我唔敢申請太多，只有兩手咋！」好過左丁山吖，自己成日唱好 iBond，點知因上網麻煩，後來仲錯過咗申請日期，依家一手都冇。查吓最新做價，大約係 105.2，於是上銀行網購入，點知銀行收費驚人，買入價連費用係 106.35，比市價高出 115個基點，食我地隻車咩。計一計，假設 iBond派息按照通脹利率六厘計，原申請人（如陳太）可每一萬元收六百，回報率六厘，以 106.35買入，回報率就只得 5.64%，以 105.2計，回報率係 5.7%。左丁山唔順氣之餘，醒起自己還有一個無動用幾年嘅證券行戶口，立即打電話搵經紀，哈，佢仲立即代為入貨，只收 25點子佣金啫，平過銀行好多。本來以為用互聯網買賣更加快捷妥當嘅，點知銀行有時收費太高，嚇怕人，難怪股票行尚有生存空間。買完之後，話聲俾財務 T聽，佢哈哈大笑：「我精過你好多，我睇見有不少人在電台報紙唱淡 iBond，最後一日入紙申請五十手，結果獲配 45手，以後三年穩賺不賠！」左丁山呢次真係笨咗咯。

PermaLink: https://articles.zkiz.com/?id=27073
Next Page
ZKIZ Archives @ 2019