|
||||||
|
此日打開電郵， 有CY Leung電郵，一睇就知道不是梁振英，因為振英哥電郵名字就是梁振英吖嘛。振英哥工作非常勤力，每星期例有大塊文章發表，除在報紙刊登外，必定以電郵廣 發友好、傳媒。左丁山在佢mailing list之中，自然有機會拜讀，兩年以來，振英哥寫文章涵蓋嘅題目非常廣泛，有最低工資、房屋、教育、醫療、十二五規劃等等，輯埋晒就立即可以出版一本競 選政綱，睇怕有二三十萬字。疑似特首候選人之中，以佢在文字方面最準備充足，唐山大兄與范徐氏望塵莫及。他日如果有候選人辯論大會嘅話，左丁山會為其他候 選人擔心，「引經據典」（指數字數據），恐怕無人夠振英哥咁熟。 之不過，根據一啲民意調查，振英哥仍然未能振作扒頭，幾蝕底噃。 話 說來電郵之CY Leung乃是資深律師梁卓恩，佢通知各位老友，佢在Baker & McKenzie工作二十四個年頭，見證中國由艱難歲月以至今天昌盛，係時候退休咯。呢位係我地識得嘅第一位CY Leung，七十年代於中大崇基社會系畢業，後到英國攻讀法律成為律師，一九八七年入Baker，親身見證中國對外開放、容納外資、紅籌股上市、國企、民 企股上市，對中國企業改革進程之熟悉，梁卓恩可以講得係中環數一數二之律師。 梁卓恩冇話退休之後會做乜嘢，以左丁山愚見，佢起碼有兩件事情 可做，其一就係返母校中大崇基學院開一個通識教育課程，佢讀書勤快，曾在一個陳醫生主辦嘅讀書會開講大塊頭著作，吉朋之羅馬帝國衰亡史（Edward Gibbon: The History of the Decline and Fall of the Roman Empire），嚇親一啲老友記，大家估唔到佢如此博學也。崇基當年有四年IBS通識課程，其中一年讀西洋文化史，或者CY對羅馬之興趣，就係自此而來。 其二就係中大法律學院應該邀請呢位資深法律界校友開授「中國企業融資」，讓佢現身說法！ |
||||||