|
||||||
|
此日吃過午飯， 覺得飽飽哋，不宜立即坐低寫稿，於是故意漫無目的咁在中環幾間大廈穿梭，中環有全世界最好嘅行人天橋系統，由國金行到雲咸街，都有瓦遮頭，夏天時份要散步 兼嘆埋冷氣，最好由中滙大廈行到去歷山大廈，過太子行，入皇九商場，再穿番入置地廣場，如此行一行，起碼十五至二十分鐘，成個人鬆晒。有一次叫公關大姐大 照辦煮碗，點知佢行咗半個圈就輕咗好多，因為沿途有太多名店，window shopping眼花繚亂，忍唔住就要放低銀両。 行呀行呀，去 到太子大廈皇九商場交界，竟然見到東京漢姆，連忙大叫一聲：「漢姆，你點解會在此出現？」漢姆為此愕然，定一定神先至認得出左丁山。真係有緣千里能相會， 上次與呢位美國賓架見面，就是在羽田機場上飛機之時，想唔到今次漫無目的咁散步，竟然會見到佢經過。漢姆話：「我去年尾自東京調咗嚟香港，今日吃過午飯， 走出嚟散步，點知會碰到你！」 漢姆太太係日本人，慣咗東京生活，311之後點都唔肯嚟香港，於是漢姆一人在港獨居，以後有大把機會相約吃 飯。佢在日本工作多年，在耶魯攻讀時，已識日文，依家當然係日本通，董特首退休後專心推動中美關係、中日關係，做足國民外交，董特首為人念舊，他日有機會 嘅話，可與漢姆講吓中美、中日之事。 雖話長江後浪推前浪，一代新人勝舊人，但以漢姆之豐富銀行經驗，見盡不少金融機構興衰，親歷幾次金融風 浪，銀行搵佢睇住信貸風險管理，自然係明白其中奧妙，好似曼聯咁，衝鋒陷陣靠年青人，但如無老將傑斯在陣，中前場就會似盲頭烏蠅，阿仙奴如果有一位傑斯， 相信不至會在英超「臨尾香」！不過好多銀行公司都會叫資深員工退休嘅，滙豐新大班歐智華一反習慣，搵番佢嘅前輩艾爾敦做滙豐顧問，唔知係唔係醒悟到老人家 仍然有用呢？ |
||||||