|
||||||
|
恒隆地產（101）主席陳啟宗，搵咗陳南祿同公關能手關則輝過檔後，好似未見有乜大搞作。不過，其實佢哋已經開始為恒隆出謀獻策。華華聽聞，恒隆高層某日聚埋傾起有乜環保新搞作時，有高層建議喺恒隆旗下物業搞天台農場，種菜種米。 收成拎返總部招呼貴賓 呢個咁有創意嘅諗頭，估唔到一呼百應，於是大家四出睇吓究竟集團旗下邊個物業個天台可以種嘢，結果搵到山頂廣場。 對 於有關傳聞，華華問咗過檔恒隆剛「滿月」嘅關則輝（CF），佢話華華消息靈通，佢哋確實有咁嘅搞作。CF話，山頂廣場一早已經有好多環保設備，包括停車場 有儲水池，儲住啲雨水用嚟冲廁，天台又有設施收集雨水用嚟淋花，可以話係集團環保「示範區」，所以一致通過揀山頂廣場做天台農場。不過，佢哋就冇種到米， 只係種咗啲木瓜。CF話：「種米太濕，唔係好適合，不過家陣研究種埋番茄呀、菜呀。」 至於收成點處置，CF話，恒隆中環總部有個大廚房，請咗大廚坐鎮，平時會喺開記者招待會嘅大會議室招呼貴賓。日後天台農場收成嘅瓜菜，就會拎返總部整新鮮沙律畀貴賓品嚐。 李華華 |
||||||