|
||||||
|
香港真係咩都有得炒！查家嘅香港興業（480）噚日搞春茗，一年一度餐餐都例講佢哋嘅心血招牌作愉景灣，今年講到，呢個寧靜嘅小島瀰漫住一片炒風，但唔係啲樓，而係高爾夫球車牌！仲要係一個炒到120萬，綠表人士買個公屋單位住都係呢個價咋！ 香港興業執行董事鍾心田話，佢哋嘅愉景灣一直標榜係零污染嘅無煙島，公共車輛唔畀去，島上居民就用高爾夫球車代步，之但係，島上發展越來越成熟，成個島o依家有成8000幾個單位，但政府只係肯發500個高爾夫球車牌照，需求咁大，所以啲牌有價有市！ 夠買青衣公屋 鍾sir又話，120萬夠綠表人士買個青衣邨公屋單位，又或者未補地價嘅天水圍居屋。但個問題係，無聽聞政府會放寬發放牌照限額，即係話，啲牌隨時炒上天價都唔出奇。 講 完高爾夫球車牌，老闆查懋成不忘硬銷一下佢哋喺二白灣嘅水療度假酒店同埋自己啲「沙龍」。神級龍友嘅佢話，農曆新年先去完新西蘭，影咗唔少靚相，好彩佢唔 係啱啱出發，如果唔係遇着基督城地震就大件事……話時話，查生你上年春茗應承請華華入去愉景灣行吓o架喎，點解無晒下文嘅？ 李華華 |
||||||