http://partipral-hk.blogspot.com/2011/02/bossini-intl-0592hk.html
營業額同比增加12%至13.1億, 同上年度下半年比增加15%, 純利增長近44%, 每股派息增加一倍至2.2仙. 純利增幅比營業額高, 可以想像到既原因係固定開支相對變動較細. 固定開支包括人工, 租金等等, 增幅相對溫和似乎租金上升對BOSSINI既影響非想像中大.
香港分部仍然係集團盈利主要來源, 營業額增加5千4百萬至 6.95億, 單計此部份稅前已賺近1.2億增長3千7百萬, 差額幾乎相等如營業額增加之數目, 再一次反映加租無乜影響 (又或者可能係未加). 另外香港分店數目係無增加過的, 營業額/盈利 增長完全來自店舖本身能力提升. 大陸方面分店數目增加7%至785間, 營業額增加22%至3.4億但反而蝕多左1千萬, 成績非常差勁, 新舊鋪頭依然處於燒銀紙階段. 台灣營業額上升1成至1.4億但又係蝕多左錢去到5千萬; 反而星馬大有改善, 蝕小左一半, 到全年可能唔駛再蝕, 算係香港以外既小小安慰, 但中台情況仍然非常惡劣, 唔知佢點搞.
短債多左1.1億, 但無解釋原因, 我估可能同存貨多左1.3億有關. 一時週轉不靈嗎? 但現金明明充足仲要借多左錢都係有D奇怪.
總括來講半年賺4.52仙, 用最白痴的推算全年賺9仙, 現價 $0.91即是P/E 10倍, 派息率50%即係股息率不足5厘, 估值唔算貴但我諗唔到有咩理由要俾更高P/E佢, 最好炒既內需概念佢完全冇, 內衰就有. 就算香港分部繼續連年增長, 賺埋都係繼續貢獻俾大陸, 現價似乎未係投資BOSSINI既最佳時機.