新世代網民對「大鼻」係乜誰摸不着頭腦，其實三年前蕭若元對啲人估極都估唔到誰是「大鼻」，已感到非常「」，並在他的謎米節目清楚揭盅：「呢個江湖上除咗成龍之外，仲有邊個人花名叫大鼻嘅呢？就係前澳門特首何厚鏵。」 其實呢個花名在澳門就讀永援中學時已經被「起朵」，直截了當，何厚鏵年輕時肥頭耷耳，與老豆何賢同一個餅印，其厚肉鼻子成為佢個人標記，同佢十分老死嘅朋友，都稱他為「大鼻」，夠晒豪爽；無獨有偶，大鼻同羅傑承、前澳門工務司歐文龍都連成一線，嗱嗱嗱，唔係講歐文龍案呀，係講佢哋間母校——粵華中學，歐文龍與羅傑承均是畢業於粵華中學，而大鼻中學時就讀的永援中學，跟粵華中學都是由天主教鮑思高慈幼會興辦，於○一年起兩間學校合併為一條龍互屬關係，以三人的「名氣」，自然榮登該校的「榮譽」校友！ 陳啟宗二次創作 恒隆老闆陳啟宗（Ronnie Chan）返到大陸，主持旗下大連恒隆廣場開幕時，擦晒鞋咁話：「現在到了中國才知自己有多窮。」朗尼陳呢句金句其實都係「二次創作」，早年北上的港人早已領略到所謂：「去到北京，先知自己官細；去到深圳，先知自己錢少；去到海南島，先知自己身體有幾好！」陳啟宗唔係做官，又冇project喺海南島，所以返到大陸淨係知自己有幾窮！陰功！ 中環寸嘴處男開鮑落柯打 工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 嗰日去IFC正斗食個quick lunch，一坐低個新進經理就介紹我食「野生鮑魚粥」，盛惠$488一碗，嘩，我兩個人咪成千銀落樓！我就話等我朋友來問吓佢肯唔肯夾份食先，朋友都話叫住一碗試吓先，我估成場都冇人會叫，我深信個新進經理都係處男落柯打呢碗粥，等佢俾上司捽數時，衰衰哋都話有客仔柯打過吖，呢隻野生鮑魚雖然係罐頭，碗粥又真係好鮮甜，要加碗白粥來溝溝佢，一嚿嚿鮑魚角，唔係薄切嘅；食呢碗粥都冇衰嘅，起碼消費超過三百蚊，有免費泊車三粒鐘，仲可以勾起絲絲回憶，以前零用錢有限，被迫扮romantic一碗粥兩份食嘅日子。 上水間東華三院甲寅年總理中學，早排先出咗個同我同姓嘅狀元，家陣學校被噴漆「香港獨立」，當年東華三院籌旗起呢間學校，都冇人夠膽攞個命名權，喺上水咁遠，驚捐完後殺校，到時仲衰過唔捐，所以咪叫「甲寅年總理」囉！點估到間學校咁「地靈人傑」，我老豆都捐咗二十分之一o架，張玉照仲掛喺學校入面，好似演唱會山頂位咁遠，寶詠琴嗰張就eye-level，如果以骨灰龕位計，寶詠琴個位最貴咯，尚在人間嘅總理仲有些少人氣嘅得番馬清偉，我作為捐款者嘅後人都會目及住間學校，隨時為學生發聲o架！ 阿媽捐身家潮州「畢菲特」惹官非 投資專家林森池家族爆出官司，上週其弟林鎮明入稟，指被林森池踢出三間家族董事局，其實呢場官司可能因阿媽捐身家而起。林森池母親吳文佩是寡母婆，四十年代由潮州帶着四名子女來港，做過小販、穿膠花，後來在新蒲崗經營布廠；呢位潮州婆婆深懂投資，識得買廠廈又自置物業收租，掃埋中電、滙豐、港燈大堆藍籌股收息，當時身家起碼三、四千萬，有感不少老人家勞苦一生，老來無依無靠，遂於八十年代成立「慈蓮覺悟佛堂」，主要在荃灣資助一間護養院，又借錢予同鄉安享晚年。五年前敝刊訪問林森池，他說過做慈善要長遠，一定要養雞生雞蛋唔殺雞，於是決定不動用、變賣母親的物業和股票，但就全數把股息和租金約每年一百萬捐出，當時九十五歲的吳文佩住喺老人院時，林森池女兒林淳陪伴她接受採訪，仲話嫲嫲在深切治療部跟她說起捐身家時，嫲嫲也點頭贊成。未知是否這套「長線投資及慈善哲學」導致這場家族官司。 | ||||