|
||||||
|
大家樂啲管理人 員原來好水皮，當初話要扣飯鐘錢，搵高層出嚟頂住，講到似層層，點知唔夠一個禮拜，就打倒昨日之我，其行政之混亂，令人失望。笑唔落者相信係大家樂啲股 東，揸住呢隻股票，點算好？既然整間公司出爾反爾，全無掌握社會情況嘅能力，點值得繼續持有呀？好多大家樂大股東係外國基金─退休金之類，佢地長期持有大 家樂作收息用途，所以要高度相信管理層之應變才能，經此一役，信心點會不動搖？ 大編輯原來經常下午返工前，幫襯大家樂，於冷場時間，大家樂 一杯o架啡只售六元，平過「太平洋咖啡」與星巴克多多聲，所以吸引到大編輯做常客，以佢觀察，大家樂員工似乎做得幾開心，甚有禮貌，故此即使其他人約定在 十一月九日罷食大家樂，佢都唔會參加嘅，不過見到陳裕光慌了手腳，搞到夥計不滿，公司形象大損，佢都話：「睇嚟呢間公司只識技術管理，管理人成班係技術官 僚，完全唔識社會政治，依家取消『食飯扣鐘』，搵盧子健做公關顧問，神仙難救啦。」 「食飯扣鐘」，據大家樂自己講，係快餐業嘅普遍做法，但點解人地做就冇人鬧（經大家樂一役，相信亦難倖免），大家樂跟風就中滿周身箭？當然係手法差之故，管理人要檢討嘞。 左 丁山由頭到尾都唔贊成最低工資，依家都係，但老早知道反對無效，最低工資立法係必然之事。既然已經有咗最低工資法，最受影響之企業必然千方百計去節制成本 或試圖加價，甚至雙管齊下。清醒啲講，大家樂及其他快餐連鎖店以後仲會有其他招數出嘅，不過唔會好似呢次做得咁論盡嘅啫。所有老闆只信奉一種力量，就係市 場力量，故此經濟蓬勃，市面暢旺之時，打工仔看風駛『巾里』唔扯盡順風旗，唔通要等到沙士重臨之時，嗌老闆唔好減人工咩，同時我地亦唔好相信最低工資可以 維護工人權益，法國工人福利好到極，何故咁多年青人失業長期冇工做？政治社會激情係解決唔到經濟問題嘅。 |
||||||